Tuku 6:1-22

  • O wan’a Nzambi babongele akento ova ntoto (1-3)

  • Luwutuku lwa Anefili (4)

  • E mbi ya wantu ikendelekele Yave (5-8)

  • Noa oveno e salu kia tunga e nzaza (9-16)

  • Nzambi ozayisi e ngiz’a Kizalu (17-22)

6  Vava wantu bayantika wokela ova ntoto yo wuta wan’amakento,  o wan’a Nzambi aludi*+ bamwene vo wan’amakento a wantu miote.* Bayantikidi kubabonga se akento au, awonso ana basolele.  Muna kuma kiaki, Yave ovovele vo: “O mwand’ame ke uyambulwila mavangu ma wantu yakwele mvu ko,+ kadi asumuki kwau.* Muna kuma kiaki, e mvu miau mikala se 120.”+  Muna lumbu yayina ye kuna kwalanda, vakedi Anefili* ova ntoto. Muna kolo kiakina, wan’a Nzambi aludi bakwamanene vukana yo wan’amakento a wantu, babawutidi wana. Yau bakala se mabamba-ngolo kuna nz’ankulu, akwa tunda.  Muna diadi, Yave omwene vo bi wa wantu se wingi ova ntoto, kadi e ntima miau miazala yo bi e ntangwa zawonso.+  Yave omwene ntantu* mu kuma kia muntu kavanga ova ntoto, o ntim’andi ukendalele.*+  Muna kuma kiaki, Yave ovovele vo: “Fwasa ifwasa wantu ana yavanga ova ntoto, ifwasa wantu kumosi ye bulu ya vata, ma iyatatanga ye ma itilumukanga muna zulu, kadi mbwen’e ntantu* wau yabavanga.”  Kansi, Noa otondakene vana meso ma Yave.  Olwalu i lusansu lwa Noa. Noa muntu ansongi kakala.+ Munkondwa-kuma vana vena wantu a tandu kiandi.* Noa wakangala yo Nzambi aludi.+ 10  Kuna kwalanda, Noa owutidi wana tatu amakala, Seme, Kami yo Yafete.+ 11  Kansi, o ntoto wafwasuka vana meso ma Nzambi aludi, wazala yo nsoki. 12  Nzambi otadidi ova ntoto, omwene vo ufwasukidi kikilu;+ mavangu ma wantu awonso* ova ntoto mambi kaka.+ 13  I bosi, Nzambi ovovese Noa vo: “Mbakidi e nzengo za fukisa wantu awonso,* kadi o ntoto uzele yo nsoki mu kuma kiau. Muna kuma kiaki, ikubafwasa kumosi yo ntoto.+ 14  Uyivangila nzaza* ya mabaya ma nti a ngofa.+ Tula yo masuku yo kusa yo dimbu+ muna kati y’oku mbazi. 15  I wau wuwu ovangila yo: E nzaza ifwete kala ye yinkoso* 300 muna lá, yinkoso 50 muna lambuka, yinkoso 30 muna zanguka. 16  Ovanga zianela mu kotesa ntemo* muna nzaza, kinkoso kimosi tuka muna nludi. Sia o mwelo a nzaza muna luvati,+ sia yo banga kiansi, banga kiazole ye banga kiatatu. 17  “Kadi omono, itwasa kizalu+ ova ntoto mu fwasa nitu zawonso zina ye fulumwinu kia moyo* oku nsi a zulu. Yawonso ina ova ntoto ifwasuka.+ 18  Nsikidisi e kangu diame yo ngeye, kota muna nzaza, ongeye yo wan’aku yo nkaz’aku ye akazi a wan’aku.+ 19  Kotesa muna nzaza e vangwa yamoyo ya mpila zawonso,+ yole-yole, koko yo nkento kimana bavuluka yaku;+ 20  e vangwa itilumukanga mun’owu wa makanda mau, e bulu ya vata mun’owu wa makanda mau ye vangwa iyatatanga ova ntoto mun’owu wa makanda mau, yole muna konso kanda ikwiza kwa ngeye muna nzaza kimana bavuluzwa.+ 21  Vo i ngeye, kutika yo lunda madia ma mpila zawonso,+ kimana ongeye ye bulu nuakala ye madia.” 22  Noa ovangidi mawonso kakanikinua kwa Nzambi. I una kikilu kavangidi.+

Mvovo vana yand'a lukaya

Yovo “ambasi.”
Yovo “ambote-mbote.”
Nanga, “kadi bevangilanga mambu muna kinitu.”
Dilenda kala vo, “Andangula,” i sia vo, ana bebwisanga akaka. Tala Nsas’a Mvovo, “Anefili.”
Mvovo wa sina: “uyibenze.”
Yovo “omwene mpasi mu ntima.”
Mvovo wa sina: “kadi ikibenze.”
Mvovo wa sina: “vana vena e mbandu andi.”
Mvovo wa sina: “nitu zawonso.”
Mvovo wa sina: “nitu zawonso.”
Mvovo wa sina: “nkela”; masuwa mampwena.
E kinkoso kimosi, centimetro 44,5. Tala Nku. B14. Owu wakala e nzaza: meta 134 muna lá, meta 22 muna lambuka, meta 13 muna zanguka.
Muna Kiyibere, tsóhar. Akaka bevovanga vo o mvovo wau zianela uyikanga. Kansi, akaka bevovanga vo nludi wayenzama un’o lá wa kinkoso kimosi uyikanga.
Yovo “mwand’a moyo.”