Tuku 50:1-26
50 Yosefe uyitubidi vana ntandu a se diandi,+ undididi yo kumfiba.
2 I bosi, Yosefe okanikini selo yandi, e nganga za mawuku vo bakusa se diandi e nlongo kalembi wola.+ E nganga za mawuku bakusidi Isaele e nlongo.
3 Lumbu 40 bavangidi muna kunkusa e nlongo, kadi eyayi i lumbu yazingilanga e salu kia kusa e nlongo. Esi Engipito bandididi mu lumbu 70.
4 Vava kiavioka e lumbu ya dilu mu kuma kiandi, Yosefe ovovese mbanda-mbanda za* Faro vo: “Avo mbweno e dienga ova meso meno, nusamunuina Faro vo:
5 ‘O se diame ndofi kandisisa,+ oku vo: “Tala! O lufwa lwame lufinamene.+ Unzikila muna ziami kiame,+ kina yazoka muna nsi a Kenani.”+ Ungiambula do, yatomboka ngienda zika se diame, i bosi ivutuka.’”
6 Faro ovutwidi vo: “Wenda, wazika se diaku wauna kadisisa e ndofi.”+
7 Yosefe otombokele kazika se diandi, e selo yawonso ya Faro, akuluntu+ a lûmbu lwandi ye akuluntu a nsi ya Engipito bele yandi,
8 esi nzo awonso a Yosefe ye mpangi zandi ye esi nzo a se diandi.+ Basisidi kaka yingiana-ngiana yau ye mameme mau ye ngombe zau muna nsi a Ngosene.
9 O makalu+ ye akwa mvalu batombokele yandi, ndonga kikilu bakedi.
10 Vava balweke vana bundilu dia Atadi, dina muna zunga kia Yodani, i vana badidìdi dilu kiayingi ye kiangolo, Yosefe odididi se diandi mu lumbu nsambwadi.
11 O nkangu a nsi yayina, i sia vo, Anekenani, babamwene bedilanga kuna bundilu dia Atadi, basivikidi yo vova vo: “Ekiaki dilu kianene kia esi Engipito!” Muna diadi, bayikidi e fulu kiokio vo Abele-miseraime,* kina muna zunga kia Yodani.
12 I bosi, o wan’a Yakobo bamvangidi wauna kabakanikina.+
13 O wan’andi banete kuna nsi ya Kenani, banzikidi muna nduk’a mpatu a Makepela, e mpatu ina mantalani ye Mamere ina Abarayama kasumba kwa Eferone wa Nkete, yakala se ziami kia kuvuila.+
14 Vava kazikidi o se diandi, Yosefe ovutukidi kuna Engipito kumosi ye mpangi zandi ye awonso bayenda yandi mu zika o se diandi.
15 Vava mpangi za Yosefe bamwene vo se diau ofwidi, bavovele vo: “Nanga o Yosefe makasi kekutulundilanga, owau okutuvutulwila e mbi yawonso twamvanga.”+
16 Muna kuma kiaki, batwikidi e nsangu kwa Yosefe, oku vo: “Vitila kafwa, o se diaku wavova vo:
17 ‘I wau wuwu nuvova kwa Yosefe: “Idodokele, loloka do o bi wa mpangi zaku ye sumu bavola muna kuvanga e mbi.”’ Owau, dodokolo, loloka o bi wa ntaudi za Nzambi a se diaku.” Yosefe odididi vava banzayisi mambu mama.
18 I bosi, e mpangi zandi mpe bezidi yo vumbama vana ndose andi, bavovele vo: “Utuvanga una ozolele, tu ntaudi zaku.”+
19 Yosefe ubavovese vo: “Ke numoni wonga ko. Nga mono i Nzambi yanufundisa e?
20 Kana una vo mbi nuakana kumpanga,+ Nzambi wakala ye kani dia kitula dio se diambu diambote muna vuluza mioyo mia wantu ayingi, i diau kevanganga o unu kiaki.+
21 Ozevo, ke numoni wonga ko. Ikwamanana kunuvana madia kumosi yo wan’eno.”+ Muna mpila yayi, ubafiaulwisi yo kubavuvika ye mvovo mia ngemba.
22 Yosefe okwamanene zingila muna Engipito, oyandi ye esi nzo a se diandi, Yosefe mvu 110 kazinga.
23 Yosefe omwene mbandu ya tatu ya wan’a Eferaime,+ omwene mpe wan’a Makire,+ wa mwan’a Manase. Bakele kwa Yosefe nze wan’andi.*
24 I bosi, Yosefe ovovese mpangi zandi vo: “O lufwa lwame lufinamene, kansi Nzambi ovutula kikilu e sungididi kiandi kwa yeno,+ kieleka okunutombola tuka mu nsi yayi yakuna nsi kadila e ndofi kwa Abarayama, Isaki yo Yakobo vo okubavana yo.”+
25 Muna diadi, Yosefe odisisi wan’a Isaele e ndofi, oku vo: “Nzambi ovutula kikilu e sungididi kiandi kwa yeno. Nundila e ndofi vo katula nukatula e visi yame omwamu.”+
26 Yosefe ofwidi ye kimbuta kia mvu 110; batumini bankusa e nlongo kalembi wola,+ bansidi mu nkela muna Engipito.
Mvovo vana yand'a lukaya
^ Yovo “esi nzo a.”
^ Ina ye nsasa vo: “Dilu kia esi Engipito.”
^ Mvovo wa sina: “Bawutukidi vana makungunu ma Yosefe.”
