Tuku 44:1-34
44 I bosi, Yosefe okanikini o muntu watwadisanga e nzo andi vo: “Zadisa e nsaku za wantu ye madia mana balenda nata, sia e nzimbu za konso muntu muna nu’a nsaku andi.+
2 Kansi, sia e mbungwa ame, e mbungw’a palata muna nu’a nsaku a ndiona wa nleke kumosi ye nzimbu zandi za witi.” Ovangidi una kavoveso kwa Yosefe.
3 Muna mene vava o kuma kukiele, o wantu basindikilu ye mabuluku mau.
4 Ke badilwakidi kwandá ko ye mbanza, Yosefe ovovese muntu watwadisanga e nzo andi vo: “Telama! Wenda landi o wantu! Avo ubabakidi, ubavovesa vo: ‘Ekuma nuvutulwidi o bi muna wete?
5 Ekuma nusidi bongela e mbungwa ina o mfumu ame kenuinanga yo sadila mu sasila e sinsu ye sikididi kiawonso? Diambu diambi kikilu nuvangidi.’”
6 Vava kababakidi, ubavovese mvovo miami.
7 Kansi, bamvutwidi vo: “E mfumu ame, ekuma ovovele diambu diadi? E ntaudi zaku ke zilendi vanga diambu dia mpila yayi ko.
8 Tala, e nzimbu twawana muna nua mia nsaku zeto, twakutwasila zo tuka kuna nsi ya Kenani.+ Ozevo, ekuma twadi yiyila e palata yovo wolo muna nzo a mfumu aku?
9 Avo e mbungwa isolokele kwa mosi muna ntaudi zaku, yambula kafwa. Vo i yeto tukituka se abundu a mfumu ame.”
10 Ubavutwidi vo: “Yambula diavangamena una nuvovele: Ndiona osoloka ye mbungwa, okituka se mbundu ame, vo i yeno ke nukala ye kuma ko.”
11 Vana vau, konso muntu okulumwini e nsaku andi vana ntoto yo ziula yo.
12 Otomene satulula, oyantikidi muna ndiona wambuta yo fokolwela muna ndiona wanleke. I bosi, e mbungwa isolokele muna nsaku a Benyamini.+
13 Batiazwini e mvuatu miau, konso muntu ovutwidi e nsaku andi vana buluku diandi, bavutukidi kuna mbanza.
14 Yosefe kakivaikila ko vava Yuda+ ye mpangi zandi balwaka muna nzo andi; bavumbamene vana ndose andi.+
15 Yosefe ubayuvuidi vo: “Nkia diambu dia mpila yayi nuvangidi? Nga ke nuzeye wo ko vo muntu nze mono olenda sasila sinsu ye sikididi kiawonso e?”+
16 Muna diadi, Yuda ovutwidi vo: “Adieyi tukuvovesa e mfumu ame? Adieyi tuvova? Aweyi tulenda kuyisongela vo tu akwa unsongi? Nzambi aludi osolwele o bi wa ntaudi zaku.+ Owau, oyeto yo ndiona osolokele ye mbungwa, se tu abundu a mfumu ame!”
17 Kansi, Yosefe ovutwidi vo: “Kilendi wo vanga nkutu ko! Ndiona kaka osolokele ye mbungwa, yandi okituka se mbundu ame.+ Vo i yeno, nutomboka kwa se dieno kuna luvuvamu.”
18 Yuda umfinamene yo vova vo: “Idodokele e mfumu, yambula do ntaudi aku kavovana yaku, kufungila ntaudi aku makasi ko, kadi ngeye una nze Faro.+
19 E mfumu ame wayuvula ntaudi zaku vo: ‘Nga o se dieno wakinu o moyo e? Nga mpangi ankaka nuna yandi e?’
20 Twavutula kwa mfumu ame vo: ‘O se dieto dia nunu wakinu o moyo yo nlek’eto+ wa mwan’a kinunu kiandi. Kansi, o mpangi andi wafwa,+ yandi kaka wasala muna wan’a ngudi andi,+ o se diandi otoma kunzolanga.’
21 I bosi, wavovesa e ntaudi zaku vo: ‘Nuntwasila yandi kimana yamona.’+
22 Kansi, twavovesa mfumu ame vo: ‘O nleke kalendi sisa se diandi ko. Avo unsisidi, o se diandi fwa kefwa.’+
23 I bosi, wavovesa e ntaudi zaku vo: ‘Avo nlek’eno kezidi yeno ko, ke nuizi diaka oku ngina ko.’+
24 “Muna diadi, twayenda kwa ntaudi aku, wa se diame yo kunzayisa e mvovo mia mfumu ame.
25 I bosi, se dieto ovovele vo: ‘Nuvutuka, nuatusumbila fimadia.’+
26 Kansi tuvovele vo: ‘Ke tulendi kulumuka ko. Avo tukwenda kumosi yo nlek’eto, ozevo tukulumuka. Kadi ke tulendi kwenda kuna kena ko, avo ke twele kumosi yo nlek’eto ko.’+
27 O ntaudi aku, wa se diame utuvovese vo: ‘Nutomene wo zaya vo nkaz’ame wana wole kaka kangutila.+
28 Mosi muna yau wansisa, yavova vo: “Kieleka, omene tiazununua!”+ Yamu unu kikumonanga diaka ko.
29 Avo nukatwidi diaka ondioyo ova ntadisi ame ye kabwilwa e sumbula kia lufwa, ozevo mu mpasi+ nukulumwinina e mvu zame muna Ziami.’*+
30 “Owau, avo tuvutukidi kwa ntaudi aku, wa se diame kondwa kwa nleke, wau vo otoma zolanga nleke ndioyo lutila nkutu o moyo a yandi kibeni,
31 vava kemona kaka vo nleke kena yeto ko, fwa kefwa. Ozevo, e ntaudi zaku mu ntantu bekulumwinina e mvu za ntaudi aku, wa se dieto muna Ziami.*
32 Mono ntaudi aku yasia nsilu kwa se diame vo: ‘Avo kitwasidi yandi ko, ozevo isumukina se diame muna zingu kiame kiawonso.’+
33 Muna kuma kiaki, idodokele, yambula ntaudi aku kasala vana fulu kia nleke se mbundu a mfumu ame, kimana o nleke kavutuka ye mpangi zandi.
34 Aweyi ivutukila kwa se diame kondwa kwa nleke? Kilenda zizidila mona mpasi zibwila se diame ko!”
Mvovo vana yand'a lukaya
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Yovo “Seol,” i sia vo, ziami kia wantu awonso. Tala Nsas’a Mvovo.
