Tuku 40:1-23
40 Vava mambu mama maviokele, o mfidi wa atambiki a mbungwa+ kwa ntinu a Engipito yo mfidi wa avangi a mbolo, basumukini mfumu au, wa ntinu a Engipito.
2 Muna kuma kiaki, Faro ofungidi selo yandi yole makasi, o mfidi wa atambiki a mbungwa yo mfidi wa avangi a mbolo,+
3 otumini basiwa muna pelezo ya nzo a mfidi wa ayingidi,+ muna pelezo ina yakala Yosefe.+
4 I bosi, o mfidi wa ayingidi ovene kiyekwa kwa Yosefe vo kakala yau yo kubalunga-lunga,+ bakele muna pelezo mu fikolo.*
5 O ntambiki a mbungwa yo mvangi a mbolo za ntinu a Engipito, ana basilu muna pelezo, yau awole balotele ndozi muna fuku wau umosi, konso ndozi yakala ye nsas’andi.
6 Muna mene, o Yosefe wele kubatala, omwene vo bakendalala bakala.
7 Muna kuma kiaki, oyuvuidi e selo ya Faro ana bakedi yandi muna pelezo muna nzo a mfumu andi vo: “Ekuma e ndose zeno zinina zakendalala o unu?”
8 Bamvutwidi vo: “Yeto awole ndozi tulotele, kansi ke vena muntu ko olenda zo kutusasila.” O Yosefe ubavovese vo: “Nga ke Nzambi ko i nsasidi a ndozi e?+ Dodokolo, nunzayisa zo.”
9 Muna diadi, o mfidi wa atambiki a mbungwa ozayisi e ndozi andi kwa Yosefe, oku vo: “Muna ndozi ame, mbwene nsing’a vinyu ukedi ova ntwal’ame.
10 Muna nsing’a vinyu mukedi ntayi tatu, ekolo usavukidi, uvaikisi e mvuma, muna kangi* yandi muyimini bundu yabwaka.
11 E mbungw’a Faro ikedi ova koko kwame, mbongele e bundu ya vinyu, nkamini yo muna mbungw’a Faro. I bosi, nsidi e mbungwa vana koko kwa Faro.”
12 Yosefe umvovese vo: “E nsas’andi i yau yiyi: E ntayi tatu, i lumbu tatu.
13 Lumbu tatu kaka ivioka, Faro okuvaikisa,* okuvutula muna salu kiaku,+ okwamanana sia e mbungw’a Faro vana koko kwandi nze una wavangidinge vava wakedi ntambiki a mbungwa.+
14 Kansi vava mambu maku metoma, unsungamena. Dodokolo, unsonga walakazi, umpovela kuna kwa Faro, kimana kankatula ova fulu kiaki.
15 Muna vova e ludi, yiwa yayiwa kuna nsi ya Ayibere.+ Okwaku mpe kiavangidi kwame diambu diambi ko dina bafwete kunsila mu pelezo.”*+
16 Vava mfidi wa avangi a mbolo kamwene vo Yosefe diambu diambote kasasidi, umvovese vo: “Omono mpe muna ndozi ame, mbwene mbangu tatu za mbolo zampembe vana ntu ame,
17 muna mbangu ikedi vana ntandu, mukedi mpila zawonso za madia mayokwa ma Faro, e nuni zizidi dia madia makedi muna mbangu ikedi vana ntandu.”
18 I bosi, Yosefe ovutwidi vo: “E nsas’andi i yau yiyi: E mbangu tatu, i lumbu tatu.
19 Lumbu tatu kaka ivioka, Faro ukuzenga o ntu yo kumanika vana nti, e nuni zidia e nitu aku.”+
20 Muna lumbu kiatatu kina kiakala vo kia luwutuku lwa Faro,+ okubikidi e lambu mu kuma kia ntaudi zandi; ovaikisi* mfidi wa atambiki a mbungwa yo mfidi wa avangi a mbolo, ubasidi vana ndose a ntaudi zandi.
21 Ovutulwisi mfidi wa atambiki a mbungwa muna salu kiandi, okwamanene vana e mbungwa kwa Faro.
22 Vo i mfidi wa avangi a mbolo, omanikinu vana nti nze una Yosefe kabasasila.+
23 Kansi, o mfidi wa atambiki a mbungwa kasungamena Yosefe ko; wamvilakana kwandi.+
Mvovo vana yand'a lukaya
^ Mvovo wa sina: “lumbu yakete.”
^ Yovo “saki.”
^ Mvovo wa sina: “ozangula o ntu aku.”
^ Mvovo wa sina: “wulu dia maza; wulu.”
^ Mvovo wa sina: “ozangwidi o ntu wa.”
