Tuku 4:1-26
4 Adami ovukane yo Eva wa nkaz’andi, Eva oyimiti.+ Vava kawutidi Kaini,+ ovovele vo: “Ngutidi mwan’a yakala muna lusadisu lwa Yave.”
2 Kuna kwalanda, owutidi diaka Abele+ wa nleke a Kaini.
Abele okitukidi mvungudi a mameme, vo i Kaini mvati a nsengo.
3 Vioka fikolo, Kaini otwese mbongo a ntoto se lukau kwa Yave.
4 Kansi Abele otwese akaka muna wan’antete a kambi diandi+ kumosi yo mazi mau. Yave otondele Abele yo lukau lwandi,+
5 kansi katondele Kaini ko yo lukau lwandi. Muna kuma kiaki, Kaini ofungidi kikilu makasi, e ndose andi ikafalele.
6 Yave oyuvuidi Kaini vo: “Ekuma ofungidi makasi yo kafalala e ndose?
7 Avo ovangidi oma mambote, nga kuvutuka vua dienga diame ko e? Kansi, avo kuvanga oma mambote ko, e sumu dilangididi vana mwelo ye kani dia kuyala; nga olenda dio sunda e?”
8 I bosi, Kaini ovovese Abele wa nleke andi vo: “Twenda kuna kiana.” Ekolo bakedi kuna kiana, Kaini oyilamene Abele wa nleke andi yo kumvonda.+
9 Kuna kwalanda, Yave oyuvuidi Kaini vo: “O nleke aku Abele akweyi kena?” Kaini ovutwidi vo: “Kizeye kwame ko. Nga mono i nyingidi a nleke ame?”
10 Muna diadi, Nzambi ovovele vo: “Adieyi ovangidi? Wá, o menga ma nleke aku mu kaza mena oku ngina, tuka muna ntoto.+
11 Owau osibilu, oyingilu mu ntoto wau uyaswini o nua mu tambula menga ma nleke aku ova koko kwaku.+
12 Vava ovata o ntoto, ke ukuvana mbongo* ko. Okala se nyungani ye muntayila ova ntoto.”
13 Muna diadi, Kaini ovovese Yave vo: “E zitu dia tumbu kia bi wame dingi, kilenda dio nata ko.
14 O unu ungingidi omu nsi yayi,* iswekama ova ndose aku; ikala se nyungani ye muntayila ova ntoto, konso ona okunsolola vonda kekumvonda.”
15 Yave umvovese vo: “Muna kuma kiaki, konso muntu ovonda Kaini, nkumbu nsambwadi kelandwa e kunda.”
Muna mpila yayi, Yave wasikidisa sinsu mu kuma kia Kaini kimana kalembi vondwa kwa konso muntu okunsolola.
16 I bosi, Kaini okatukidi vana ndose a Yave yo kwenda zingila kuna nsi ya Kinkole,* kuna este ya Edene.+
17 Kuna kwalanda, Kaini ovukane yo nkaz’andi,+ o nkento oyimiti yo wuta Enoke. I bosi, Kaini oyantikidi tunga e mbanza yo yikila yo muna nkumbu a Enoke wa mwan’andi.
18 I bosi, Enoke owutidi Iradi. Iradi owutidi Mekuyaele, Mekuyaele owutidi Metusaele, Metusaele owutidi Lameke.
19 Lameke obongele akento wole. Ona wantete nkumbu andi Ada, ona wanzole Sila.
20 Ada owutidi Yabali. Yandi i wantete mun’awana bezingilanga muna saba, ana bena ye twelezi.
21 E nkumbu a nleke andi Yubali. Yandi i wantete mun’awonso besikanga e kokolo ye tutu.
22 Sila wawuta mpe Tubali-kaini ona wavanganga e sadilwa ya mpila zawonso ya nsongo ye sengwa. O nsang’a Tubali-kaini, Nama.
23 I bosi, Lameke ovovese akazi andi, Ada yo Sila vo:
“Nuwá e nding’ame yeno akazi a Lameke;Nutamba o matu omu mvovo miame:
Muntu mpondele, kadimono kalwekele,
Elo, mwan’a toko, kadimono kawende.
24 Avo Kaini nkumbu 7 kelandilwa e kunda,+
Ozevo Lameke nkumbu 77.”
25 Adami ovukane diaka yo nkaz’andi, o nkento owutidi mwan’a yakala. Umven’e nkumbu Sete,*+ kadi wavova vo: “Nzambi umpene mwana wankaka* vana fulu kia Abele, kadi o Kaini wamvonda.”+
26 Sete owutidi mpe mwan’a yakala, umven’e nkumbu Enose.+ Muna ntangwa yayina, wantu bayantika vovela e nkumbu a Yave.
Mvovo vana yand'a lukaya
^ Mvovo wa sina: “ngolo zandi.”
^ Mvovo wa sina: “ova ndose a ntoto.”
^ Yovo “nsi a Nodi.”
^ Ina ye nsasa vo: “Wasolwa; Wasiwa.”
^ Mvovo wa sina: “mbongo yankaka.”
