Tuku 39:1-23
39 O Yosefe okulumwinu kuna Engipito.+ Musi Engipito mosi una ye nkumbu vo Potifa,+ wa mbanda-mband’a Faro, wa mfumu a ayingidi, unsumbidi vana moko ma Aneyisemaele+ ana banata kuna Engipito.
2 Kansi, Yave okedi yo Yosefe.+ Muna kuma kiaki, osambwilu yo siwa se mfidi a nzo a mfumu andi, wa musi Engipito.
3 O mfumu andi omwene vo Yave una yandi, Yave okunsambulanga muna mawonso kevanganga.
4 Yosefe omweno e dienga vana ndose a Potifa, okitukidi se selo kiandi kabundang’e vuvu. Muna kuma kiaki, Potifa untumbikidi e kinkengi kia nzo andi, umvene kiyekwa kia lunga-lunga e lekwa yandi yawonso.
5 Tuka muna ntangwa kantumbikila e kinkengi kia nzo andi yo kumvana kiyekwa kia lunga-lunga lekwa yandi yawonso, Yave wasambulanga e nzo ya musi Engipito mu kuma kia Yosefe. Yave wasambula yawonso kakala yau muna nzo ye muna mpatu.+
6 Kuna kwalanda, Potifa wavana Yosefe e kiyekwa kia lunga-lunga lekwa yandi yawonso, katokanenanga kana diambu dimosi ko, nanga kina kedia kaka. Vana ntandu, Yosefe okitukidi mote muna mpwa ye muna ndose.
7 Kuna kwalanda, nkaz’a mfumu andi oyantikidi sia Yosefe o meso yo vova vo: “Leka yame.”
8 Kansi, Yosefe katondanga ko, wavovesanga nkaz’a mfumu andi vo: “O mfumu ame nkutu kazeye ko eyi ngina yau omu nzo, yawonso kena yau osidi yo ova koko kwame yalunga-lunga yo.
9 Ke vena muntu ko unsundidi mu nzo yayi, kangimini mpe kana lekwa kimosi ko, nanga ngeye kaka, kadi ongeye u nkaz’andi. Ozevo, aweyi ndenda vangila diambu diadi diambi-mbidimbi yo sumukina Nzambi e?”+
10 O nkento wavovesanga Yosefe lumbu yawonso, kansi kasidi tambulwila leka yandi ko ngatu kala yandi vamosi.
11 Kansi lumbu kimosi, Yosefe okotele muna nzo kasala e salu kiandi, muna nzo ke mwakala kana ntaudi mosi ko.
12 O nkento umbakidi muna mvuatu andi yo vova vo: “Leka yame!” Kansi, Yosefe osisidi o mvuatu andi vana koko kwa nkento, otinini kuna mbazi.
13 Vava o nkento kamwene vo Yosefe osisidi o mvuatu andi vana koko kwandi yo tina kuna mbazi,
14 o nkento oyantikidi kaza yo bokela wan’amakala a nzo andi, ubavovese vo: “Tala, o Nyibere ndioyu katutwasidi o nkaz’ame ozolele kutukitula se ma kia sakanena. Wizidi oku ngina kaleka yame, kansi ngiantikidi kaza mu nding’angolo.
15 Vava kawidi vo ntatwidi e ndinga yo kaza, osisidi o mvuatu andi ova ndambu ame yo tina kuna mbazi.”
16 I bosi, o nkento osidi o mvuatu a Yosefe vana ndambu andi, yavana o Potifa wa mfumu a Yosefe kayiza.
17 O nkento ovovele diambu diau dimosi kwa Potifa, oku vo: “O selo wa Nyibere ona watutwasila, wizidi oku ngina kankitula se ma kia sakanena.
18 Kansi vava ntatwidi e ndinga yo kaza, osisidi o mvuatu andi ova ndambu ame, otinini kuna mbazi.”
19 Vava mfumu andi kawidi e mvovo mia nkaz’andi, oku vo: “Omama i mambu kampangidi o selo kiaku,” ofungidi kikilu makasi.
20 O mfumu obakidi Yosefe, unsidi muna pelezo, e fulu kiasiwanga abakami a ntinu, okedi muna pelezo.+
21 Kansi Yave okedi yo Yosefe, okwamanene kunsonga walakazi yo kunsambula yo vua e dienga vana meso ma mfidi a pelezo.+
22 O mfidi a pelezo otumbikidi Yosefe se mfumu wa abakami awonso bakala muna pelezo, e salu yawonso bavanganga abakami muna pelezo mu lutumu lwandi bavangilanga yo.+
23 O mfidi a pelezo katokanenanga kana diambu dimosi ko diakala muna kiyekwa kia Yosefe, kadi o Yave okedi yo Yosefe, Yave wasambulanga mawonso kavanganga.+
