Tuku 30:1-43
30 Vava Rakele kamwene vo kawutidi Yakobo wana ko, omwenene mpangi andi kimpala, ovovese Yakobo vo: “Umpana o wana, avo ke wau ko, fwa ifwa.”
2 Yakobo ofungidi Rakele makasi, ovovele vo: “Nga mono i Nzambi e? Nga mono yakanga o mawuta maku e?”*
3 Rakele ovovele vo: “O Bila+ wa ntaudi ame yandi oyu. Vukana yandi kimana kangutila o wana,* yavuil’o wana muna yandi.”
4 Rakele ovene Bila wa ntaudi andi kwa Yakobo kakala se nkaz’andi, Yakobo ovukane yandi.+
5 Bila oyimiti yo wutila Yakobo mwan’ayakala.
6 Rakele ovovele vo: “Nzambi i mfundisi ame, owidi e nding’ame yo kumpana mwan’ayakala.” Ikuma kamvanini e nkumbu vo Dani.*+
7 Bila wa ntaudi a Rakele oyimiti diaka, owutidi Yakobo mwan’ayakala, i mwana wanzole.
8 Rakele ovovele vo: “Ndwan’angolo ndwene yo mpangi ame, insundidi!” Muna diadi umven’e nkumbu Nafetali.*+
9 Vava Lea kamwene vo mawuta mandi makangamene, obongele Zilepa wa ntaudi andi, umvene kwa Yakobo kakala nkaz’andi.+
10 Zilepa wa ntaudi a Lea owutidi Yakobo mwan’ayakala.
11 Lea ovovele vo: “Nsambu zame!” Muna diadi umven’e nkumbu vo Ngadi.*+
12 I bosi, Zilepa wa ntaudi a Lea owutidi Yakobo mwan’ayakala, i mwana wanzole.
13 Lea ovovele vo: “Kiese kiame! Kadi o wan’a makento bekungikila vo i nkwa kiese.”+ Muna diadi umven’e nkumbu vo Asere.*+
14 Muna lumbu ya nkutik’a witi, Rubeni+ wele kangadi muna mpatu, osolwele bundu ya mandrangore.* Otwese yo kwa Lea wa ngudi andi. Muna diadi o Rakele ovovese Lea vo: “Dodokolo, umpana e yaka bundu ya mandrangore ya mwan’aku.”
15 Lea ovovese Rakele vo: “Nga obenze vo diambu diakete wau wabonga o nkaz’ame?+ Nga ozolele diaka baka e bundu ya mandrangore ya mwan’ame?” Rakele ovovele vo: “Ke diambu ko, tusobana o unu, oyandi oleka yaku o fuku wau, ongeye umpana e bundu ya mandrangore ya mwan’aku.”
16 Vava Yakobo katukidi muna kiana muna nkokela, Lea wele kunkika, ovovele vo: “O unu mono ovukana yandi, kadi mu bundu ya mandrangore ya mwan’ame nsumbidi o nswa wau.” Muna kuma kiaki, Yakobo olele yandi muna fuku wowo.
17 Nzambi oven’e mvutu za sambu kia Lea, oyimiti yo wutila Yakobo mwan’ayakala, i mwana wantanu.
18 Lea ovovele vo: “Nzambi umpene o mfutu ame,* kadi mpene ntaudi ame kwa nkaz’ame.” Muna diadi umven’e nkumbu vo Yisakare.*+
19 Lea oyimiti diaka yo wutila Yakobo mwan’ayakala, i mwana wasambanu.+
20 Lea ovovele vo: “Nzambi umpene, elo, umpene lukau lwambote. Owau, o nkaz’ame okungiangalela,+ kadi inwutidi wana sambanu amakala.”+ Muna diadi umvene nkumbu vo Zebulune.*+
21 I bosi, Lea owutidi mwan’ankento, umvene nkumbu Dina.+
22 I bosi, Nzambi osidi e sungididi kwa Rakele, Nzambi ovene mvutu za sambu kiandi, unsadisi kayimita.*+
23 Rakele oyimiti, owutidi mwan’ayakala. Ovovele vo: “Nzambi okatwidi luvezo lwame!”+
24 Muna diadi umven’e nkumbu vo Yosefe,*+ ovovele vo: “Yave unkudikidi mwana wankaka wa yakala.”
25 Vava Rakele kawutidi Yosefe, vana vau Yakobo ovovese Labani vo: “Ungiambula ngienda kwame kuna nzo ame, kuna nsi ame.+
26 Umpana akento ame yo wan’ame ana isadidi, kimana ngienda kwame, kadi otomene zaya e salu yasadidi.”+
27 Labani umvovese vo: “Avo ntondakene ova ndose aku,—Mbakwidi mun’owu wa sinsu* vo Yave omu ngeye kekunsambulwilanga.”
28 Okudikidi vo: “Sikidisa o mfutu aku, ikuvana wo.”+
29 Yakobo ovovese Labani vo: “Ozeye salu yasadidi ye una e kambi diaku diwokelele ova moko mame;+
30 kadi e kambi diaku diakete diakala vitila ngiza kwaku, kansi owau diwokele kikilu, Yave okusambulanga tuka yalwakila. Owau, nkia ntangwa isala muna wete dia esi nzo ame?”+
31 Labani oyuvuidi vo: “Nki mfwete kuvana?” Yakobo ovutwidi vo: “Kukumpana lekwa ko! Avo okumpangila edi ikulomba, ivutuka o vungula yo lungalunga e kambi diaku.+
32 O unu iviokela muna kambi diaku diawonso. Ongeye vambula mameme mawonso mankento mena ye matete-matete ye matona-matona yo wan’a mameme awonso amakoko a se kia mbwaki afufukila. Vambula mpe e nkombo zawonso zankento zina ye matete-matete ye matona-matona. Ina iwutuka tuka owau, ikala se mfutu ame.+
33 O unsongi wame ukumpovela* muna lumbu okwiza fimpa o mfutu ame. Avo vasolokele nkombo yankento yakondwa matete-matete ye matona-matona ye wan’a mameme amakoko ke bena ye se kia mbwaki afufukila ko, ozevo ya ngiya.”
34 Muna diadi, Labani ovovele vo: “Ngindu zambote! Yambula diavangamena wauna ovovele.”+
35 Muna lumbu kiakina, Labani ovambwidi e nkombo zamakoko za nzilanzila ye za matona-matona, nkombo zankento za matete-matete ye matona-matona, ye konso ina yakala ye tona dia mpembe ye wan’a mameme awonso a makoko a se kia mbwaki afufukila, ovene mo kwa wan’andi bavungulanga mo.
36 Labani ovambwidi e kambi diandi yo Yakobo mu tini kia nkangalu a lumbu tatu. Yakobo okwamanene vungula e kambi dia Labani dina diasala.
37 Yakobo obongele nzwangi* mia nkunzu mia nti a pepele, amande ye pelatane, ovangidi mio matona ma mpembe, osenzekele ndambu ya mpembe ya nzwangi.
38 I bosi, osidi e nzwangi kavangidi matona vana ntadisi a kambi, vana nlungu mia maza, vana nuinu, vana vayiza nuinanga makambi, kimana bavukanena vana ntadisi a nzwangi vava bekwiza nua maza.
39 Muna mpila yayi, makambi mavukanenanga vana ntadisi a nzwangi yo wuta wana bakala ye nzilanzila, matete ye matona-matona.
40 I bosi, Yakobo ovambwidi wan’a mameme amakoko a nzilanzila ye mawonso mambwaki afufukila, otalanese mo ye kambi dia Labani. Ovambwidi e kambi diandi, kasangidi dio ko ye kambi dia Labani.
41 Vava e bulu yakumama yalwakanga muna ntangw’a vukana, Yakobo wasianga nzwangi muna manuinu, vana ntadisi a makambi, kimana bavukanena vana ndambu a nzwangi.
42 Kansi, avo e bulu yatovoka, kasianga vo nzwangi ko. Muna mpila yayi, e bulu yatovoka yakalanga ya Labani, kansi ina yakumama ya Yakobo.+
43 Muna diadi, Yakobo ovueme kikilu, okedi yo makambi manene, ntaudi zamakento ye ntaudi zamakala, samo ye mabuluku.+
Mvovo vana yand'a lukaya
^ Yovo “Nga mono yayimina e mbongo a vumu?”
^ Mvovo wa sina: “kawutila va makungunu mame.”
^ Ina ye nsasa vo: “Mfundisi.”
^ Ina ye nsasa vo: “Ndwana Zame.”
^ Ina ye nsasa vo: “Nsambu.”
^ Ina ye nsasa vo: “Kiese; Luyangalalu.”
^ Akento badianga e bundu yayi kadi edi bayindulanga vo ikubasadisa mu yimita.
^ Yovo “mfutu a nsadi.”
^ Ina ye nsasa vo: “Oyandi i Mfutu.”
^ Ina ye nsasa vo: “Luyambulwilu.”
^ Mvovo wa sina: “Nzambi owidi e sambu kiandi, unziwidi e vumu.”
^ I mpila yankufi ya yikila e nkumbu Yosefia, ina ye nsasa vo: “YA Kakudikila (Kawokesa).”
^ Yovo “mpandu.”
^ Yovo “E ziku kiame kikumpovela.”
^ Yovo “nzwadi.”
