Tuku 28:1-22
28 Muna kuma kiaki, Isaki obokele Yakobo unsambwidi yo kunkanikina vo: “Kufwete bongela nkento muna wan’amakento a Kenani ko.+
2 Wenda kuna Padani-arami muna nzo a Betwele wa nkak’aku, wabongela nkento muna wan’amakento a Labani+ wa ngudi aku ankazi.
3 O Nzambi a Mpungu-ngolo okusambula yo kuvana wana yo wokesa e mbongo aku, okituka se nkangu ayingi.+
4 Nzambi ovana kwa ngeye ye kwa mbongo aku e nsambu kasia o nsilu kwa Abarayama,+ kimana wavua e nsi ozingilanga se nzenza, eyi o Nzambi kavana kwa Abarayama.”+
5 I bosi, Isaki osindikidi Yakobo, o Yakobo wele kuna Padani-arami kwa Labani wa mwan’a Betwele wa musi Arami,+ wa mpangi a Rebeka,+ wa ngudi a Yakobo yo Esau.
6 Esau omwene vo Isaki osambwidi Yakobo yo kunsindika kuna Padani-arami kabongela nkento kûna, vava kansambwidinge unkanikini vo: “Kubongela nkento muna wan’amakento a Kenani ko,”+
7 omwene mpe vo Yakobo olemvokele se yo ngudi andi, wele kuna Padani-arami.+
8 Esau obakwidi vo Isaki+ wa se diandi ke yangalelanga wan’amakento a Kenani ko.
9 Muna kuma kiaki, Esau wele kwa Yisemaele wa mwan’a Abarayama, obongele Makalata wa mwan’a Yisemaele, wa nsang’a Nebayote, kakudikila muna akento andi.+
10 Yakobo okatukidi kuna Bere-seba yo kwenda kuna Karani.+
11 Vava kalweke va fulu kimosi, olele vana, kadi e ntangwa idimukini. Obongele tadi dimosi vana fulu kiokio, osidi dio se mfik’a ntu,+ olavalele vavana.
12 I bosi, olotele ndozi, omwene sikada idongamene vana ntoto, o ntu a sikada ulweke yakuna zulu; e mbasi za Nzambi zimentenge yo kulumuka muna sikada.+
13 Yave okedi vana ntandu a sikada, ovovele vo:
“Mono i Yave wa Nzambi a Abarayama wa se diaku ye Nzambi a Isaki.+ E nsi yayi olavalele, ivana yo kwa ngeye ye kwa mbongo aku.+
14 E mbongo aku ikala nze senge,+ isayana kuna weste, kuna este, kuna node ye kuna sude; makanda mawonso ma nza omu ngeye ye muna mbongo aku mesambulwilwa.*+
15 Ngina yaku, ikutanina konso kuna okwenda, ikuvutula mwamu nsi yayi.+ Kikuyambula ko yavana ilungisa mana yasia o nsilu kwa ngeye.”+
16 Yakobo osikamene kuna tulu yo vova vo: “Kieleka, Yave una va fulu kiaki, omono kizeye wo ko.”
17 Omwene o wonga yo kudikila vo: “E fulu kiaki ke kiankatu ko, kiavauka! Kieleka eyayi i nzo a Nzambi,+ owau i mwelo a zulu.”+
18 Yakobo osikamene muna mene-mene, obongele tadi kasidi se mfik’a ntu, otelamese dio nze lunzi yo yitila dio mazi vana ntandu.+
19 Oyikidi e fulu kiokio vo Betele.* Kansi entete, e mbanza yayikilwanga vo Luzi.+
20 I bosi, Yakobo osidi o nsilu vo: “Avo Nzambi okala yame yo kuntanina muna nkangalu ame, kampana madia yadia ye mvuatu yavuata,
21 kamputula mu luvuvamu kuna nzo a se diame, ozevo Yave osonga kieleka vo Nzambi ame.
22 E tadi diadi ntelamese nze lunzi dikituka se nzo a Nzambi,+ ikuvana kieleka tini kia kumi muna yawonso okumpana.”
Mvovo vana yand'a lukaya
^ Yovo “mekuyibakila e nsambu.” I sia vo, makanda mafwete vanga diambu muna vua e nsambu.
^ Ina ye nsasa vo: “Nzo a Nzambi.”
