Tuku 24:1-67
24 Abarayama onunini, e mvu miandi se miayingi, Yave osambwidi Abarayama muna mawonso.+
2 Abarayama ovovese selo kiandi kiambuta, ona walunga-lunganga yawonso kakala yau muna nzo:+ “Dodokolo, sia koko kwaku oku nsi a sina dia kulu kwame,
3 wadia e ndofi muna Yave, wa Nzambi a zulu ye Nzambi a ntoto, vo kubongela mwan’ame nkento ko vana vena o wan’amakento a Anekenani, omu nsi yayi izingilanga.+
4 Kansi, ofwete kwenda kuna nsi ame, kuna kwa yitu yame,+ wabongela mwan’ame Isaki o nkento.”
5 Kansi o selo unyuvuidi vo: “Adieyi mvanga avo nkento kazolele kwiza yame ko oku nsi yayi? Nga mfwete vutula mwan’aku kuna nsi ina watuka e?”+
6 Abarayama umvutwidi vo: “Keba walembi vutula mwan’ame kuna nsi yayina.+
7 Yave wa Nzambi a zulu, ona wankatula muna nzo a se diame, muna nsi a yitu yame,+ ona wampovesa yo kundila e ndofi vo:+ ‘Kwa mbongo aku+ ivana e nsi yayi,’+ otuma e mbasi andi kuna ntwal’aku,+ i kûna kikilu obongela mwan’ame o nkento.+
8 Kansi, o nkento avo kezola kwiza yaku ko, ongeye ovevoka muna ndofi yayi. Kansi, kuvutula mwan’ame kwakuna ko.”
9 Muna diadi, o selo osidi o koko kwandi kuna nsi a sina dia kulu kwa Abarayama wa mfumu andi, undididi e ndofi muna diambu diadi.+
10 O selo obongele samo kumi muna samo za mfumu andi, otelamene, onete ma yambote ya mpila zawonso ya mfumu andi. I bosi, wele kuna Mesopotamia, kuna mbanz’a Nako.
11 Obubamese e samo lukufi ye sima kia maza kuna mbazi a mbanza. Nkokela kwakala, muna ntangwa ina akento bevaikanga mu kwenda teka o maza.
12 I bosi, osambidi vo: “E Yave wa Nzambi a mfumu ame Abarayama, unsambula do mu lumbu kia unu yo songa walakazi waku kwa mfumu ame Abarayama.
13 Tala, ntelamene ova nto a maza, o wan’amakento a mbanza mu kwiza bena bateka o maza.
14 Ozevo, yambula diavanagamena owu, o ndumba ivovesa vo: ‘Dodokolo, kulumuna o mvungu aku yanua o maza,’ kamvutula vo: ‘Nua kwaku, inuika mpe samo zaku,’ yambula kakala nkento ona osolele mu kuma kia selo kiaku Isaki; i wau izayila wo vo osongele walakazi kwa mfumu ame.”
15 Una kamene samba ko, Rebeka olweke yo mvungu andi vana vembo. Rebeka mwan’a Betwele+ kakala, wa mwan’a Mileka,+ wa nkento a Nako,+ wa mpangi a Abarayama.
16 O ndumba mote kikilu kakala, mwenze; kasidi vukana yo yakala ko. Okulumukini kuna nto, ozadisi o mvungu andi yo maza, otombokele.
17 O selo wele ntinu, wele wanana yandi. Umvovese vo: “Dodokolo, umpana fimaza mu mvungu aku yanua.”
18 Umvutwidi vo: “Nua kwaku e mfumu ame.” Vana vau, okulumwini o mvungu vana vembo, osimbinini wo ekolo kekunuikanga.
19 Vava kamanisi kunuika, ovovele vo: “Iteka mpe maza mu kuma kia samo zaku yavana ziyukuta.”
20 Odukumuni-dukumuni o mvungu andi van’e nuinu dia bulu yo kwenda e ntinu nkumbu miayingi kuna sima mu teka o maza. Okwamanene teka o maza mu kuma kia samo zandi zawonso.
21 Muna kolo kiokio, o muntu okedi e pi-i, untungunuini yo sivika, ovingìdi mu zaya kana vo Yave osambwidi o nkangalu andi yovo ve.
22 Vava e samo zimene nua, o muntu umvene nlung’a wolo wa tula mu nzunu wakala ye zitu dia ndambu a sekele* ye nlunga miole mia wolo mia moko miakala ye zitu dia sekele* kumi,
23 ovovele vo: “Unzayisa do, u mwana nani? Nga muna nzo a se diaku muna ye fulu kina tulenda leka mu fuku wau?”
24 Rebeka umvutwidi vo: “I mwan’a Betwele+ wa mwan’a Mileka, ona kawutila Nako.”+
25 Okudikidi vo: “Tuna ye titi yayuma ye titi yankunzu. Tuna mpe ye fulu kia leka.”
26 Muna diadi, o muntu ovumbamene yo samba kwa Yave,
27 ovovele vo: “Yambula Yave wa Nzambi a mfumu ame Abarayama kakembelwa, kadi kayambwidi songa walakazi ye kwikizi kiandi ko kwa mfumu ame. Yave umfididi yamuna nzo a mpangi za mfumu ame.”
28 O mwan’a ndumba wele ntinu mu zayisa mambu mama kwa esi nzo a ngudi andi.
29 Rebeka wakala yo mpangi, e nkumbu andi Labani.+ O Labani wele ntinu kwa muntu okedi kuna mbazi, vana ndambu a nto a maza.
30 Vava kamwene o nlung’a nzunu ye nlunga miamoko kwa nsang’andi Rebeka yo wá e mvovo miandi vo: “Iwau wuwu kampovese o muntu,” Labani wele kika o muntu okedi watelama vana ndambu a samo, vana nto a maza.
31 Ovovele vo: “Wiza, ongeye wasambulwa kwa Yave. Ekuma otelamene kaka ovava? Nkubikidi kala e nzo ye fulu kia samo.”
32 Muna diadi, o muntu okotele muna nzo, Labani okatwidi mazitu vana samo, ovene titi yayuma ye titi yankunzu kwa samo. Ovene mpe maza kwa muntu kasukula malu mandi ye malu ma wantu kakedi yau.
33 Kansi, vava bamvene madia kadia, o muntu ovovele vo: “Kidia ko yavana ikuzayisa dina ngina diau.” Labani ovovele vo: “Vova kwaku.”
34 O muntu ovovele vo: “Omono i selo kia Abarayama.+
35 Yave osambulanga kikilu mfumu ame yo kumvuamisa, umvene mameme, ngombe, palata, wolo, ntaudi zamakala ye zamakento, samo ye mabuluku.+
36 Vana ntandu, o Sara wa nkaz’a mfumu ame wawutila mfumu ame o mwan’ayakala muna kinunu kiandi,+ kwa yandi kevana yawonso kena yau.+
37 O mfumu ame ndofi kandisisi, oku vo: ‘Kufwete bongela mwan’ame nkento ko vana vena wan’amakento a Anekenani, omu nsi izingilanga.+
38 Kansi, wenda kuna nzo a se diame, kuna kwa yitu yame,+ wabongela mwan’ame o nkento.’+
39 Yayuvula kwa mfumu ame vo: ‘Adieyi mvanga avo nkento kazolele kwiza yame ko?’+
40 Wamvutula vo: ‘O Yave ona isadilanga,*+ okutwikila mbasi andi+ yo sambula kieleka o nkangalu aku. Ofwete bongela mwan’ame o nkento kuna kwa yitu yame ye muna nzo a se diame.+
41 Avo wele kwa yitu yame, oyau balembi kuvana o nkento, ongeye ovevoka muna ndofi undididi. Muna mpila yayi ovevoka muna ndofi aku.’+
42 “O unu vava ngiele vana nto a maza, nsambidi vo: ‘E Yave wa Nzambi a mfumu ame Abarayama, avo ozolele sambula o nkangalu ame,
43 tala, ntelamene ova nto a maza. Ozevo, yambula diavangamena owu, o ndumba+ okwiza teka o maza, ona ivovesa vo: “Dodokolo, umpana fimaza mu mvungu aku yanua,”
44 yo kumpovesa vo: “Nua kwaku, iteka mpe maza mu kuma kia samo zaku.” Yambula kakala nkento ona Yave kasolele mu kuma kia mwan’a mfumu ame.’+
45 “Una kiamene samba ko muna ntim’ame, Rebeka olweke yo mvungu andi vana vembo, okulumukini kuna nto yo yantika teka o maza. I bosi, imvovese vo: ‘Dodokolo, umpana maza yanua.’+
46 Vana vau okulumwini o mvungu andi vana vembo, ovovele vo: ‘Nua kwaku,+ ivana mpe maza kwa samo zaku.’ I bosi nduini, ovene mpe maza kwa samo.
47 I bosi, inyuvuidi: ‘Ongeye u mwan’a nani?’ Umvutwidi vo: ‘I mwan’a Betwele wa mwan’a Mileka, ona kawutila Nako.’ Muna kuma kiaki, insidi o nlunga mu nzunu ye muna moko mandi.+
48 Ngienzekele o ntu yo samba kwa Yave, nkembelele Yave wa Nzambi a mfumu ame Abarayama,+ ona wamfididi muna nzil’ambote kimana yabonga mwan’ankento a mpangi a mfumu ame mu kuma kia mwan’andi.
49 Owau, nunzayisa kana vo nuzolele songa walakazi ye kwikizi kwa mfumu ame; kansi avo ke wau ko, nunzayisa, kimana yazaya dina ivanga.”*+
50 Labani yo Betwele bavutwidi vo: “Wau vo e diambu diadi kwa Yave ditukidi, katulendi vova ko vo elo yovo ve.*
51 O Rebeka yandi oyu ova ntadisi aku. Umbonga wenda yandi, yambula kakituka nkento a mwan’a mfumu aku, wauna o Yave kavovele.”
52 Vava selo kia Abarayama kawidi e mvovo miau, ovumbamene vana ntoto, vana ndose a Yave.
53 O selo oyantikidi vaikisa e nlunga ye nsanga mia palata ye wolo ye mvuatu, ovene mio kwa Rebeka, ovene lekwa yantalu kwa mpangi andi ye kwa ngudi andi.
54 I bosi, o selo yo wantu bakedi yandi badidi yo nua, balele mûna.
Vava selo kasikamene muna mene, ovovele vo: “Nunsindika kwa mfumu ame.”
55 Muna diadi, o mpangi yo ngudi a Rebeka bavovele vo: “Yambula o ndumba kakala yeto kana lumbu kumi kaka. I bosi kekwenda kwandi.”
56 Kansi o selo ubavovese vo: “Ke nunsimbi diaka ko, wau vo Yave osambwidi o nkangalu ame. Nunsindika, kimana ngienda kwa mfumu ame.”
57 Bavovele vo: “Yambula twabokela mwan’a ndumba, twanyuvula.”
58 Babokele Rebeka, banyuvuidi: “Nga ozolele kwenda kumosi yo muntu ndioyu e?” Ovutwidi vo: “Nzolele kwenda.”
59 Basindikidi nsang’au Rebeka+ yo ndezi andi,*+ selo kia Abarayama yo wantu andi.
60 Basambwidi Rebeka yo kumvovesa vo: “E nsang’eto, yambula wakituka ngudi a mazunda ma mafunda kumi,* yambula e mbongo aku yavua e mbanz’a* mbeni zau.”+
61 Rebeka ye ntaudi zandi bakubamene, bamente muna samo, balende o muntu. Muna mpila yayi, o selo obongele Rebeka, wele kwandi.
62 O Isaki wizidi akangadinge muna nzil’a Bela-kairoi,+ kadi mu nsi ya Nengebe+ kazingilanga.
63 Isaki ovaikidi muna nkokela, mu kangala fioti muna mpatu yo yindula.+ Vava kasengwele o meso, omwene samo zikwizanga!
64 Vava Rebeka kasengol’o meso, omwene Isaki, vana vau okulumukini vana samo.
65 Oyuvuidi kwa selo vo: “Nani ndiona okwizanga mu mpatu mu wanana yeto?” O selo ovutwidi vo: “I mfumu ame.” Muna diadi, Rebeka obongele fukwa yo fukila ntu andi.
66 O selo ozayisi Isaki mawonso kavangidi.
67 I bosi, Isaki onete Rebeka muna saba kia Sara wa ngudi andi.+ Muna mpila yayi, Isaki obongele Rebeka se nkaz’andi; unzolele kwayingi.+ Isaki ofiaulwisu mu kuma kia lufwa lwa ngudi andi.+
Mvovo vana yand'a lukaya
^ Mvovo wa sina: “ona ikangadilanga oku ndose andi.”
^ Mvovo wa sina: “yaviluka ku lunene yovo ku lumonso.”
^ Yovo “Ke tuna ye owu tuvovela edi diambi ko ngatu diambote kwa ngeye.”
^ I sia vo, ndezi andi ona wakituka se ntaudi andi.
^ Mvovo wa sina: “Yambula wakituka mazunda ma mazunda.”
^ Mvovo wa sina: “vitu dia.”
