Kuna kwa Esi Roma 14:1-23
14 Ndiona wayoya muna lukwikilu,+ nuntambula, kansi ke numfundisi ko mu kuma kia mpila yaswaswana kebadikilanga mambu.
2 O muntu una ye lukwikilu lwasikila lekwa yawonso dia kwandi, kansi ona wayoya muna lukwikilu, makaya kaka kedianga.
3 Ndiona odianga lekwa yawonso kavezi ona olembi dianga lekwa yawonso ko, ndiona olembi dianga+ lekwa yawonso, kafundisi ona odianga lekwa yawonso ko, kadi Nzambi untambwidi.
4 Ngeye u nani kimana wafundisa selo kiangani?+ Mfumu andi kaka olenda kuntelamesa yovo kumbwisa.+ Kieleka, telameswa ketelameswa, kadi Yave* olenda kuntelamesa.
5 Muntu mosi okwikilanga vo e lumbu kimosi kisundidi e lumbu yankaka;+ wankaka okwikilanga vo e lumbu yawonso yafwanana kwandi;+ yambula konso muntu kakala ye ziku vo dina kekwikilanga dialudi.
6 Ndiona olundanga e lumbu, yambula kalunda kio mu kuma kia Yave.* Ndiona odianga lekwa yawonso mpe, yambula kadia mu kuma kia Yave,* kadi kwa Nzambi kevutulanga matondo;+ ndiona olembi dianga lekwa yawonso, yambula kalembi dia mu kuma kia Yave,* kadi kwa Nzambi mpe kevutulanga matondo.+
7 Kieleka, ke mosi ko mu yeto ozinganga mu kuma kia yandi kibeni,+ ke mosi ko ofwanga mu kuma kia yandi kibeni.
8 Kadi avo tuzinga, tuzinga mu kuma kia Yave,*+ avo tufwa, tufwa mu kuma kia Yave.* Dianu vo, avo tuzinga yovo tufwa, kwa Yave* tuvuilu.+
9 Kadi, i kuma Kristu kafwila yo zinga, kimana kakala Mfumu kw’awana bafwa ye awana bena o moyo.+
10 Kansi, ekuma ofundisila mpangi aku?+ Yovo ekuma ovezela mpangi aku? Kadi yeto awonso tusinga telama vana kunda kia Nzambi kia lufundisu.+
11 Kadi diasonama vo: “‘Ndidi e ndofi mu mono kibeni,’+ u kavovele o Yave,* ‘o makungunu mawonso mekumfukamena, o tubini twawonso tutambulwila Nzambi.’”+
12 Ozevo, konso muntu mu yeto, okuyitela mbalu kwa Nzambi.+
13 Dianu vo, ke tufundana diaka ko,+ kansi tukala kaka ye kani dialembi sia sakuba ngatu nkaku vana vena mpangi.+
14 Nzeye wo yo kwikila muna Mfumu Yesu vo kavena lekwa kiafunzuka ko muna kiau kibeni;+ vava kaka muntu kebadikilanga lekwa vo kiafunzuka, kuna kwa yandi kiafunzuka.
15 Kadi avo okendelekele mpangi aku mu kuma kia madia, kukangalelanga diaka mu zola ko.+ Ndiona Kristu kafwila, kumfwasila muna madia maku ko.+
16 Dianu vo, ke nuyambula ko vo mambu mambote nuvanganga matiangunua.
17 Kadi e Kintinu kia Nzambi ke dia yo nua ko,+ kansi unsongi ye luvuvamu ye kiese muna mwand’avelela.
18 Konso ntaudi a Kristu ona osonganga e fu yayi, otondwa kwa Nzambi yo yangalelwa kwa wantu.
19 Dianu vo, yambula twatatidila mambu metwasanga luvuvamu+ yo kasakesa muntu yo nkwandi.+
20 Nuyambula fwasa salu kia Nzambi muna diambu dia madia.+ Kieleka, lekwa yawonso yavelela, kansi diambi kwa muntu mu dia lekwa avo kitesesa ankaka e sakuba.+
21 Ke diambote ko mu dia mbizi yovo nua vinyu ngatu vanga konso diambu ditesesa mpangi aku e sakuba.+
22 O lukwikilu una lwau, kala lwau kaka ngeye kibeni vana ndose a Nzambi. Nkwa kiese ndiona olembi kukitumba muna mambu keyangalelanga.
23 Kansi avo muntu una yo lukatikisu odidi, otumbilu kala, kadi kadididi mu lukwikilu ko. Ozevo, mawonso mevangilwanga kondwa lukwikilu, sumu.
