Mavangu ma Zintumwa 15:1-41
15 Wantu akaka batukidi kuna Yuda, bakulumukini kuna Antiokia, bayantikidi longa ampangi vo: “Avo ke nuzengelo ko mun’owu wa nsiku a Mose,+ ke nuvuluzwa ko.”
2 Kansi, vava kiabwa e ntantani zangolo yo filana e mpaka vana vena wantu awaya ye Paulu yo Banaba, basikidisi vo Paulu yo Banaba kumosi ye akaka benda kwa antumwa ye akuluntu kuna Yerusaleme+ mu kuma kia diambu diadi.*
3 Vava nkutakani yele kubasindika, bakwamanene nkangalu au, baviokele muna Fenisia ye Samaria, bele zayisinge una esi zula bavilukidi o ntima, ediadi diatwasanga kiese kiayingi kwa mpangi zawonso.
4 Vava balweke muna Yerusaleme, batomene tambulwa kwa nkutakani, antumwa ye akuluntu, babasamunuini mambu mayingi kavangidi Nzambi muna yau.
5 Kansi, ankaka muna alandi a malongi ma Afarisi, ana bakituka minkwikizi, batelamene yo vova vo: “Diamfunu bazengwa yo kubakanikina vo balunda o Nsiku a Mose.”+
6 Muna kuma kiaki, antumwa ye akuluntu bakutakene mu fimpa e diambu diadi.
7 Vava batantanene kwayingi, Petelo otelamene, ubavovese vo: “Ampangi, nutomene wo zaya vo tuka muna lumbu yantete, Nzambi wansola vovo nuina kimana esi zula bawila e diambu dia nsangu zambote mu nu’ame yo kwikila.+
8 O Nzambi, ona ozeye e ntima,+ wasia umbangi muna kubavana mwand’avelela,+ nze una kavanga kwa yeto.
9 Ke kutuswaswanesanga ko yo yau,+ kansi ovelelese ntima miau muna lukwikilu.+
10 Ozevo, ekuma nutontelanga Nzambi muna yekeka mazitu kw’alongoki+ mana mase meto yo yeto kibeni ke tulendi nata ko?+
11 Kuna diak’e sambu, oyeto tukwikilanga vo muna nsambu za Mfumu Yesu tuvuluzilwa,+ oyau mpe i wau bekwikilanga.”+
12 Awonso badingalele, bawinikini Banaba yo Paulu ekolo beyikanga e sinsu ye masivi mayingi kavangidi o Nzambi muna yau vana vena esi zula.
13 Vava bamene vova, Yakobo ovutwidi vo: “Ampangi, nungwila.
14 Simeone+ watoma samuna una Nzambi kasongela dienga diandi kwa esi zula muna nkumbu antete, kimana kasola vana bena o nkangu muna nkumbu andi.+
15 Muna diadi, e mvovo mia Angunza miayenda e betela, wauna wasonama vo:
16 ‘Vava mambu mama mevioka, ivutuka yo talemesa diaka e saba kia* Davidi kina kiabwa; itungulula mazumbu mandi, kimana kiavutuka una kiakala,
17 kimana awana basala, bavava Yave* kumosi ye wantu a zula yawonso, wantu ana beyikilwa muna nkumbu ame, u kavovele o Yave,* ona ovanganga mambu mama,+
18 mazayakene tuka kuna nz’ankulu.’+
19 Dianu vo, e nzengo zame* ke bangika esi zula ko, ana bavutukidi kwa Nzambi,+
20 kansi tubasonekena vo bayikenga muna lekwa yafunzulwa kwa teke,+ mavangu ma zumba,*+ ye bulu yafientwa vana laka* ye menga.+
21 Kadi, tuka kuna nz’ankulu, vekalanga ye awana besamunanga muna mbanza ye mbanza mana o Mose kasoneka, kadi e lumbu yawonso ya vundu betanganga mo mu nding’angolo muna masambilu.”+
22 I bosi, antumwa ye akuluntu kumosi ye nkutakani yawonso babakidi e nzengo za sola wantu vana bena, babatuma kuna Antiokia kumosi ye Paulu yo Banaba; basolele Yuda ona wayikilwanga vo Basaba yo Sila,+ yau bavitanga o ntu vana vena ampangi.
23 Babavene o nkanda una basonekene vo:
“Kuna kw’ampangi batukidi muna zula, ana bena muna Antiokia,+ Suria ye Kilikia, mavimpi matukidi kwa mpangi zeno, antumwa ye akuluntu.
24 Wau tuwidi vo ankaka muna yeto bekunutokanesanga muna mvovo miau+ yo vava kunuvukumuna, kana una vo ke twabavana luludiku ko,
25 yeto awonso tubakidi nzengo kumosi za sola wantu yo kunutumina yau kumosi ye azolwa eto Banaba yo Paulu,
26 ana bayekwele mioyo miau muna nkumbu a Mfumu eto Yesu Kristu.+
27 Dianu vo, tutumini Yuda yo Sila, kimana basamuna mpe muna nua miau mana masonamene mu nkanda.+
28 Kadi o mwand’avelela+ yo yeto kibeni tumwene vo diambote twalembi kunukudikila e zitu diankaka, nulunda kaka mambu mama mamfunu:
29 nukwamanana kuyikenga muna yimenga ya teke,+ menga,+ bulu yafientwa vana laka*+ ye mavangu ma zumba.*+ Avo nutomene kuyikenga muna mambu mama, nusikila. Mavimpi meno!”
30 Vava wantu awaya basindikwa, bakulumukini kuna Antiokia, bakutakese awonso yo kubavana o nkanda.
31 Vava batangidi wo, bayangalele lukasakeso baveno.
32 Wau vo Yuda yo Sila ngunza mpe bakala, bakasakese yo kumika ampangi muna malongi mayingi.+
33 Vava bakala kûna mu kolo kiayingi, babasindikidi muna luvuvamu kw’ampangi ana babatuma.
34 * ——
35 Kansi, Paulu yo Banaba banangini muna Antiokia, balongele yo samuna e nsangu zambote za diambu dia Yave* kumosi mpe ye wantu ayingi ankaka.
36 Vava baviokesa lumbu yakete, Paulu ovovese Banaba vo: “Yambula twavutuka owau, twenda kingula ampangi muna mavata mawonso twasamunuini e diambu dia Yave* kimana twazaya kana aweyi bena.”+
37 Banaba osiandamene vo kanata Yoane, ona wayikilwanga vo Maku.+
38 Kansi Paulu kayangalala ko vo benda yandi, kadi wateka kubasisa kuna Pamfulia yo lembi kwenda yau muna salu.+
39 Muna diadi, vakedi ntantani zangolo, yavana bavambanene; Banaba+ onete Maku, bakotele muna nzaza, bele kuna Kupero.
40 Paulu osolele Sila, wele, vava ampangi banyekeka muna nsambu za Yave.*+
41 Oviokele muna Suria ye muna Kilikia, wakumikanga e nkutakani.
Mvovo vana yand'a lukaya
^ Yovo “ntantani zazi.”
^ Yovo “sudi kia; nzo a.”
^ Yovo “kani diame.”
^ Yovo “bulu yalembi zengwa vana laka mu vaikisa o menga.”
^ Muna Kingerekia, por·nei′a. Tala Nsas’a Mvovo, “Mavangu ma Zumba.”
^ Muna Kingerekia, por·nei′a. Tala Nsas’a Mvovo, “Mavangu ma Zumba.”
^ Yovo “bulu yalembi zengwa vana laka mu vaikisa o menga.”
