Zasoneka Matai 15:1-39
15 I bosi, Afarisi ye asoneki batukidi kuna Yerusaleme bezidi kwa Yesu,+ banyuvuidi vo:
2 “Ekuma alongoki aku ke bezitisilanga malongi ma akulu eto ko? Kasikil’owu, ke besukulanga moko* ko avo se bedia.”+
3 Ubavutwidi vo: “Oyeno mpe, ekuma ke nuzitisilanga nkanikinu mia Nzambi ko mu kuma kia lusansu lweno?+
4 Kasikil’owu, Nzambi wavova vo: ‘Zitisa se diaku yo ngudi aku,’+ ye, ‘Ndiona otianguna se diandi yovo ngudi andi, kafwete vondwa.’+
5 Kansi, oyeno nuvovele vo: ‘Konso ona ovovesa se diandi yovo ngudi andi vo: “Eki ngina kiau kiadi kusadisa, i nkayilu ivana kwa Nzambi,”+
6 ke dina diaka mfunu ko mu zitisa se diandi.’ Dianu vo, nuvezele diambu dia Nzambi mu kuma kia kisi nsi kieno.+
7 Akwa kivunina, Yesaya watoma sakula mu kuma kieno, wau kavova vo:+
8 ‘O nkangu wau mu befo kaka bekunzitisilanga, kansi e ntima miau miavavuka yo mono.
9 Mu nkatu bekunsambilanga, kadi malongi mau mu nkanikinu mia wantu metukanga.’”+
10 Muna diadi, obokele ndonga yamfinama, ubavovese vo: “Nuwá, nuazaya e nsas’a mvovo miami:+
11 Ina ikotele muna nua ke yau ko ifunzulanga o muntu, kansi mana mavaikidi muna nu’andi i mau mekumfunzulanga.”+
12 I bosi, alongoki bezidi kumvovesa vo: “Nga ozeye wo vo Afarisi batele sakuba wau bawidi dina ovovele?”+
13 Ubavutwidi vo: “Konso nkuna ilembi kunua kwa Se diame una kuna zulu, vuzwa ivuzwa.
14 Nubayambula. Afidi ampofo kwau. Avo mpofo ofididi nkwandi mpofo, yau awole muna wulu bebwa.”+
15 Petelo ovutwidi vo: “Utusasila e kingana.”
16 Ovovele vo: “Oyeno mpe yamu wau ke nubakwidi ko e?+
17 Nga ke nuzeye wo ko vo konso kina kikotele muna nua kikwendanga muna vumu, yo vaikiswa kuna mfuta e?
18 Kansi, mana mevaikanga muna nua mu ntima metukanga, i mau mefunzulanga o muntu.+
19 Kadi muna ntima i mutukanga o makani mambi,+ vonda, zumba, mavangu ma zumba,* wivi, umbangi waluvunu yo lutiangu.
20 Omama i mefunzulanga o muntu; kansi o dia lembi sukula o moko* ke kufunzulanga muntu ko.”
21 Yesu okatukidi ko, wele muna zunga kia Turo ye Sidone.+
22 Nkento mosi wa Mfenisia,* musi zunga kiakina wizidi, okazidi mu nding’angolo vo: “E Mfumu, e Mwan’a Davidi, umfwil’e nkenda. O mwan’ame ankento wabakama kwa nkuya, mpasi zayingi kekumwesanga.”+
23 Kansi kamvutwidi diambu ko. Dianu vo alongoki andi bezidi, bandodokele vo: “Unsindika kenda kwandi, kadi otatamene kutukazila oku nima.”
24 Ovutwidi vo: “Kiatumwa kwa wantu ankaka ko kwa mameme mavila ma nzo a Isaele kaka.”+
25 Kansi, o nkento vava kalweke, umvumbamene, oku vo: “E Mfumu, unsadisa!”
26 Umvutwidi vo: “Ke diansongi ko mu bonga e mbolo a* wana yo tuba yo kwa wan’a mbwa.”
27 Ovovele vo: “Ingeta, e Mfumu, kansi kana nkutu i wan’a mbwa bedianga e nkesona zisotokanga vana meza ma mfumu zau.”+
28 I bosi, Yesu umvutwidi vo: “E nkento, o lukwikilu lwaku lwanene; yambula diavangama kwa ngeye dina ozolele.” Tuka muna ola yayina o mwan’andi ankento osasukidi.
29 Yesu okatukidi mo, wizidi vana ndambu a Mbu a Ngalili,+ una katombokele vana mongo, ovuende.
30 I bosi, ndong’ayingi inluakidi, bezidi ye mbevo za malu, avanguki, mpofo, mababa ye mbevo zayingi zankaka, babasidi vana malu mandi, ubawukidi.+
31 E ndonga isivikidi wau bamwene mababa mevovanga, avanguki bewukwanga, e mbevo za malu zidiatanga, mpofo zimonanga, bakembelele Nzambi a Isaele.+
32 Kansi, Yesu obokele alongoki andi, ubavovese vo: “Nkenda ngina zau mu kuma kia ndonga yayi,+ kadi lumbu tatu se bena yame, ke bena ye lekwa kia dia ko. Kizolele kubasindika ye nzala ko, kadi balenda bwa e mfune muna nzila.”+
33 Kansi, alongoki bamvovese vo: “Ovava va makanga, akweyi tubakila e mbolo zafwana muna yukutisa e ndonga yayi?”+
34 Muna kuma kiaki, Yesu ubayuvuidi vo: “Mbolo kwa nuna zau?” Bavutwidi vo: “Nsambwadi ye nzonzi zakete.”
35 Ovovese e ndonga bafonga vana ntoto,
36 obongele mbolo zau nsambwadi ye nzonzi, vava katondele Nzambi, obukunuini zo yo vana zo kwa alongoki, i bosi, alongoki bavene zo kwa ndonga.+
37 Yau awonso badidi yo yukuta, bakutikidi e nkesona zina zasuva, yitunga nsambwadi yanene yazala.+
38 Ozevo, o lutangu lwa awana badidi, 4.000 m’akala, lembi tanga akento ye yingiana-ngiana.
39 I bosi, vava kasindikidi e ndonga, okotele muna nzaza, olweke muna zunga kia Mangadane.+
Mvovo vana yand'a lukaya
^ I sia vo, luveleleso mun’owu wa kinkulu kia Ayuda.
^ Muna Kingerekia, por·nei′a. Tala Nsas’a Mvovo, “Mavangu ma Zumba.”
^ I sia vo, lembi kuyivelelesa mun’owu wa kinkulu kia Ayuda.
^ Yovo “Nkenani.”
^ Yovo “madia ma.”
