Zasoneka Matai 11:1-30
11 Yesu vava kamene vana luludiku kwa alongoki andi 12, wele alonginge yo samuna e nsangu zambote muna mbanza zankaka.+
2 Kansi, o Yoane ona wakala muna pelezo+ vava kawidi mavangu ma Kristu, otumini alongoki andi,+
3 banyuvula vo: “Nga ongeye i Ndiona okwiza, yovo wankaka tuvingila?”+
4 Yesu ubavutwidi vo: “Nuenda samuna kwa Yoane mana nuwidi ye mana numwene:+
5 Owau e mpofo mu mona bena,+ e mbevo za malu mu diata zina, akwa wazi+ mu veleleswa bena, afwa-matu mu wá bena, o mafwa mu fuluka mena, asukami mu samunuinua bena e nsangu zambote.+
6 Kiese kwa ndiona olembi tá sakuba mu kuma kiame.”+
7 Vava bavutukidi, Yesu oyantikidi samuna mambu ma Yoane kwa ndonga vo: “Nki nuele tala kuna makanga?+ Tutu divuembeswa kwa tembw’e?+
8 Ozevo, nki nuele tala? Muntu ovuete mvuatu miantalu e? Kadi, awana bavuete mvuatu miantalu muna nzo za atinu bena.
9 Ozevo, ekuma nuendele ko? Ngunza nuele tala e? Elo, inuvovese vo, o muntu nuele tala osundidi o mfunu ke mu ngunza ko.+
10 Diasonama mu kuma kiandi vo: ‘Tala! Ntwikidi ntumw’ame kuna ntwal’aku,* ona okukubikila e nzila kuna ntwal’aku!’+
11 Kieleka inuvovese wo vo, vana vena awana bawutwa kw’akento, ke vena mosi ko osundidi Yoane wa Mvubi onene, kansi ndiona wandwelo muna Kintinu kia zulu osundidi Yoane wa Mvubi onene.+
12 Tuka muna lumbu ya Yoane wa Mvubi yamu wau, e Kintinu kia zulu kisilwang’e ngolo, ana besiang’e ngolo betambulanga kio.+
13 Kadi, e Ngunza zawonso ye Nsiku basakula yamuna Yoane;+
14 oyandi i ‘Eliya ona wasakulwa vo okwiza,’+ avo nuzolele dio kwikila, nukwikila.
15 Ndiona una ye matu, yambula kawá.
16 “Aki nani ndenda tezanesa ye mbandu yayi?+ Bena nze yingiana-ngiana bavuende vana zandu bebokanga kwa akw’au,
17 oku vo: ‘Tunusikidi e matutu, kansi ke nukinini ko; tunubongele mbembo, kansi ke nuyibundidi tulu ko mu kuma kia ntantu.’
18 Diau dimosi mpe, Yoane wizidi, yandi kadie ngatu nua, wantu bavovele vo: ‘Nkuya kena wau.’
19 O Mwan’a muntu wizidi, odidi, onuini,+ kansi wantu bavovele vo: ‘Tala o nkwa loko ye nduvu a vinyu, nkundi avakulwisi a mpaku ye asumuki.’+ Kansi, e ngangu zilungisilwanga muna mavangu mandi.”+
20 I bosi, oyantikidi tumba mbanza zina kavangila mavangu mayingi mankuma, wau balembi viluka o ntima:
21 “Tâtu kwa ngeye Korazi! Tâtu kwa ngeye Betesaida! kadi o mavangu mankuma mavangamene muna yeno, kele vo mavangamena muna Turo ye Sidone, nga kolo bavuata e ngoto yo kuyikusa o ntoto ampolo mu songa luviluku lwa ntima.+
22 Dianu inuvovesele vo, muna Lumbu kia Lufundisu, nuvewa e tumbu kisundidi kia esi Turo ye Sidone.+
23 Ongeye Kafanau,+ nga obenze vo otundidikwa yakuna zulu e? Muna Ziami* okulumunua;+ kadi mavangu mankuma mavangamene omo ngeye, kala vo mavangamena muna Sodoma, nga yakinu yamu unu kiaki.
24 Dianu inuvovesele vo, muna Lumbu kia Lufundisu, nuvewa e tumbu kisundidi kina kiavewa e nsi ya Sodoma.”+
25 Muna ntangwa yayina, Yesu ovovele vo: “Ikembelele vana meso ma ndonga, e Tata, Mfumu a zulu yo ntoto, wau wasweka mambu mama kwa akwa ngangu yo sengomona mo kwa yingiana-ngiana.+
26 Elo, e Tata, kadi i wau wayangalela o vanga.
27 Se diame umpene lekwa yawonso,+ ke vena muntu otomene zaya Mwana ko, kansi Se kaka;+ ke vena mpe muntu otomene zaya Se ko, kansi Mwana kaka, ye konso ona o Mwana kazolele sengomwenena Se.+
28 Nuiza kwa mono, yeno awonso nufuntukanga yo bimuka yo mazitu, ikunuvundisa.
29 Nuvuata vangu kiame yo longwa kwa mono, kadi i nlembami yo ntim’anleka,+ nusolola vundu kia mioyo mieno.
30 Kadi vangu kiame ke kiampasi ko mu nata, e natu diame diavevoka.”
Mvovo vana yand'a lukaya
^ Mvovo wa sina: “oku ndose aku.”
^ Yovo “Hades,” i sia vo, ziami kia wantu awonso. Tala Nsas’a Mvovo.
