Zasoneka Maku 9:1-50
-
Nkituk’a Yesu (1-13)
-
Kindende kiakala ye nkuya kiwukilu (14-29)
-
Mawonso malendakana kwa ndiona okwikilanga (23)
-
-
Lufwa lwa Yesu lusakwilu diaka (30-32)
-
Alongoki bafilanene mpaka kana nani i wanene (33-37)
-
Ona olembi kutusia kitantu ku sambu dieto kena (38-41)
-
Masakuba (42-48)
-
“Nukala yo mungwa omu yeno kibeni” (49, 50)
9 Ubavovese mpe vo: “Kieleka, inuvovese wo vo, ankaka batelamene vava ke beyeleka nkutu lufwa ko yavana bemona Kintinu kia Nzambi kikwiza muna nkuma.”+
2 Vava kiavioka lumbu sambanu, Yesu obongele Petelo, Yakobo yo Yoane, ubanete kuna mongo wandá, vana fulu kia yau kaka. Okitukidi vana bena;+
3 e mvuatu miandi miyantikidi kezima, mipembele kikilu, ke vena muntu ko ova nza olenda mio pembesa e mpembesa yayina.
4 Eliya yo Mose bamonekene vana bena, bemokenanga yo Yesu.
5 Petelo ovovese Yesu vo: “E Rabi,* diambote kwa yeto twakala vava. Yambula twatunga saba tatu, kimosi kiaku, kimosi kia Mose, kimosi kia Eliya.”
6 Kieleka, Petelo kazeye ko dina kafwete vanga, kadi wonga wayingi bamwene.
7 E tuti dizidi, dibayitalele, e ndinga itukidi muna tuti,+ oku vo: “Ndioyo i Mwan’ame anzolwa.+ Nunwila.”+
8 Vana vau batadidi oku y’oku, ke bamwene diaka muntu ko, Yesu kaka.
9 Ekolo bekulumukanga kuna mongo, ubakanikini vo ke bazayisi kwa muntu ko mana bamwene+ yavana Mwan’a muntu kefuluka muna mafwa.+
10 Balundidi e diambu diadi muna ntima, kansi bayuvuziani e nsas’a lufuluku lwandi muna mafwa.
11 Banyuvuidi vo: “Ekuma asoneki bevovelanga vo Eliya+ kafwete teka kwiza?”+
12 Ubavovese vo: “Eliya okwiza, ovutula e lekwa yawonso una yakala;+ kansi ekuma diasonamena vo Mwan’a muntu mpasi zayingi+ kemona yo vezwa?+
13 Kansi inuvovese vo, Eliya+ wayiza kala, bamvanga mawonso bazola, nze una wasonama mu kuma kiandi.”+
14 Vava balweke vana vena alongoki ankaka, bamwene ndong’ayingi ibazungidi befilananga e mpaka ye asoneki.+
15 Vana vau e ndonga yawonso wau bamwene, basivikidi, bele ntinu muna kunkayisa.
16 Ubayuvuidi vo: “Nkia diambu nukubafidisilanga e mpaka?”
17 Mosi vana vena ndonga umvutwidi vo: “E Nlongi, itwasìdi mwan’ame kadi mwanda kena wau wankitula se baba.+
18 Konso kuna umbakidi, ukumbwisanga vana ntoto, ovaikisanga e fulu-fulu muna nua yo kwetesa o meno yo kunyoyesa. Ndombele kwa alongoki aku bavaikisa wo, kansi ke balendele wo ko.”
19 Ubavutwidi vo: “E mbandu yakondwa lukwikilu,+ yamu nkia kolo ikwamanana kala yeno? Yamu nkia kolo izizidila mavangu meno? Nuntwasa kwa mono.”+
20 Bantwasidi e kindende, vana vau o mwanda unzakamese kikilu, obwidi vana ntoto yo vindumuka, ovaikidi fulu-fulu muna nua.
21 I bosi, Yesu oyuvuidi se diandi vo: “Tuka nkia kolo dikumbwilanga e diambu diadi?” Ovutwidi vo: “Tuka muna kinsedia,
22 nkumbu miayingi ukumbwisanga vana tiya ye muna maza kimana wamvonda. Avo olenda vanga diambu, utufwila e nkenda, utusadisa.”
23 Yesu umvovese vo: “Ekuma ovovele vo: ‘Avo olenda’! Kadi kwa ndiona una ye lukwikilu, mawonso malendakana.”+
24 Vana vau, o se dia kindende okazidi, oku vo: “Ngina ye lukwikilu! Unsadisa muna dina nkondelo lukwikilu!”+
25 O Yesu una kamwene vo ndonga ilundumukini vana bena, otumbidi mwand’a usafu, ovovese wo vo: “E mwanda wankitula se baba ye fwa matu, ivovese, vaika muna yandi, kunkoti diaka ko!”+
26 Vava kakazidi yo zakama kikilu, o mwand’a usafu uvaikidi, kindende okedi nze yandi ofwidi, ndonga muna awana bakedi vo bavovele vo: “Ofwidi!”
27 Kansi, o Yesu unsimbidi muna koko, umvumbwidi, otelamene.
28 Vava kakotele muna nzo, alongoki andi banyuvuidi vana fulu kia yau kaka: “Ekuma oyeto ke tulendele wo vaikisila ko?”+
29 Ubavutwidi vo: “E mwand’a mpila yayi mu sambu kaka ulenda vaikila.”
30 Bakatukidi ko, baviokèle muna Ngalili, kansi kazolele ko vo wantu bazaya wo.
31 Kadi olongele alongoki andi, ubavovese vo: “O Mwan’a muntu oyekolwa vana moko ma wantu, bekumvonda,+ avo ovondelo, e lumbu kina kiatatu ofulwa.”+
32 Kansi, ke babakwidi ko dina kavovele, bamwene o wonga wa kunyuvula.
33 Balweke muna Kafanau. Vava kakedi muna nzo, ubayuvuidi vo: “Nkia diambu nufilaneneng’e mpaka muna nzila?”+
34 Badingalele kwau, kadi muna nzila bafilaneneng’e mpaka kana nani osundi o nene.
35 Ovuende, obokele yau Kumi ye Zole, ubavovese vo: “Konso muntu ozolele kala ntu, kafwete kala wandwelo yo sadila awonso.”+
36 Obongele kingiana-ngiana, untelamese vana kati kwau; untensekele moko vana mavembo, ubavovese vo:
37 “Konso ona otambwidi mosi vana vena yingiana-ngiana yayi+ muna nkumbu ame, mono mpe katambwidi; konso ona untambwidi, ke mono kaka ko katambwidi, kansi otambwidi mpe Ndiona wantuma.”+
38 Yoane umvovese vo: “E Nlongi, tumwene muntu mosi ovaikisanga nkuya muna nkumbu aku, tunsimini, kadi ke kutulandanga ko.”+
39 Yesu ovovele vo: “Ke nunsimi ko, kadi ke vena muntu ko ovanganga mavangu mankuma muna nkumbu ame olenda kungikila e mbi.
40 Kadi konso ona olembi kutusia kitantu, ku sambu dieto kena.+
41 Konso ona okunuvana kopo dia maza wau vo kwa Kristu nuvuilu,+ kieleka inuvovese vo, ke vidisa nkutu nsendo andi ko.”+
42 Kansi, konso ona otesesa sakuba kwa mosi mun’awaya andwelo bekwikilanga omu mono, diambote kakangwa e tadi dianene muna nsingu nze dina dizietomonuangwa kwa buluku yo dimunua muna kalunga.+
43 “Avo koko kwaku kutesese sakuba, zenga ko. Diambote kwa ngeye wavua o moyo ye koko kumosi ke mu kala ye moko mole ko yo tubwa kuna Ngeena,* kuna e tiya ke tuzimanga ko.+
44 * ——
45 Avo kulu kwaku kutesese sakuba, zenga ko. Diambote kwa ngeye wavua o moyo ye kulu kumosi, ke mu kala yo malu mole ko yo tubwa kuna Ngeena.*+
46 * ——
47 Avo disu diaku ditesese sakuba, dunguna dio.+ Diambote kwa ngeye wakota muna Kintinu kia Nzambi ye disu dimosi, vana fulu kiatubwa kuna Ngeena*+ yo meso maku mau mole,
48 kwakuna mimvidi ke mifwanga ko ngatu zimwa tiya.+
49 “Kadi wantu awonso bafwete siwa o mungwa muna tiya.+
50 O mungwa wambote, kansi avo mungwa ukatukidi o nzenzo andi, mu nki nuzenzesela wo?+ Nukala yo mungwa omu yeno kibeni,+ nukala yo luvuvamu yeno yo yeno.”+
Mvovo vana yand'a lukaya
^ Yovo “Nlongi.”
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
