Zasoneka Maku 7:1-37

  • Tusansu twa wantu tusenzekelo (1-13)

  • Mambu mefunzulanga muntu mu ntima metukanga (14-23)

  • Lukwikilu lwa nkento wa Nsuro-finiki (24-30)

  • Fwa-matu owukilu (31-37)

7  Afarisi ye asoneki akaka ana batukidi kuna Yerusaleme, balungalakene vana kena.+  Bamwene ankaka muna alongoki andi bedilanga muna moko mafunzuka, i sia vo, malembi sukulwa.*  (Kadi Afarisi ye Ayuda awonso, avo ke basukwidi moko mau ko yamuna kongonia, ke bedia ko, lusansu lwa akulu belundanga.  Vava betukanga kuna zandu, ke bedianga ko, avo ke bayisukwidi ko. Vena ye tusansu twayingi batambula yo lunda, nze mvub’a makopo, mvungu ye yinzu yansongo muna maza.)+  Dianu vo, Afarisi awaya ye asoneki banyuvuidi vo: “Ekuma alongoki aku ke bezitisilanga malongi ma akulu eto ko, kansi bedilanga muna moko mafunzuka?”+  Ubavovese vo: “Yesaya watoma sakula mu kuma kieno, oyeno akwa kivunina, wauna wasonama vo: ‘O nkangu wau mu befo kaka bekunzitisilanga, kansi e ntima miau miavavuka yo mono.+  Mu nkatu bekunsambilanga, kadi malongi mau mu nkanikinu mia wantu metukanga.’+  Nubembwele nkanikinu mia Nzambi yo lunda nkanikinu mia wantu.”+  Ubavovese diaka vo: “Kuna ndekwa zawonso nubembwele nkanikinu mia Nzambi kimana nuatatidila lusansu lweno.+ 10  Kasikil’owu, Mose wavova vo: ‘Zitisa se diaku yo ngudi aku,’+ ye, ‘Ndiona otianguna se diandi yovo ngudi andi, kafwete vondwa.’+ 11  Kansi, oyeno nuvovele vo: ‘Avo muntu vovese se diandi yovo ngudi andi vo: “Eki ngina kiau kiadi kusadisa i kobana (i sia vo, nkayilu ivana kwa Nzambi),”’ 12  ke nukunyambula diaka ko kasadisa se yovo ngudi andi.+ 13  Dianu vo, nuvezele diambu dia Nzambi mu kuma kia kisi nsi kieno nuasikidisa yeno kibeni.+ Mambu mayingi nuvanganga mena nze i mama.”+ 14  Muna diadi, obokele ndonga yafinama, ubavovese vo: “Nungwá yeno awonso, nuabakula e nsas’a mambu mame.+ 15  Ke vena lekwa ko kituka kuna mbazi, avo kikotele muna muntu, kilenda kumfunzula; kansi mana metukanga muna muntu, i mau mekumfunzulanga.”+ 16  * —— 17  Vava kasisidi e ndonga yo kota muna nzo, alongoki andi bayantikidi kunyuvula mu kuma kia kingana.+ 18  Ubavovese vo: “Oyeno mpe ke nubakwidi ko e? Nga ke nuzeye wo ko vo e lekwa kitukidi kuna mbazi yo kota muna muntu ke kilendi kumfunzula ko, 19  kadi ke kikotele mu ntima ko, mu vumu kaka, yo vaika kuna mfuta e?” Wau kavovele ediadi, osongele vo madia mawonso mavelela. 20  Ovovele diaka vo: “Mana mevaikanga muna muntu, i mau mekumfunzulanga.+ 21  Kadi muna kati, i sia vo, muna ntim’a muntu,+ i mutukanga makani mambi: mavangu ma zumba,* wivi, vonda, 22  zumba, loko, mavangu ma umpumbulu, luvunu, mavangu mansoni,* kimpala, lutiangu, lulendo ye uzowa. 23  O mambu mama mawonso mambi muna kati metukanga yo funzula muntu.” 24  Okatukidi kwakuna, wele muna zunga kia Turo ye Sidone.+ Okotele muna nzo, kazolele ko wantu bazaya wo, kansi kalendele swekama ko. 25  Vana vau, nkento mosi wakala ye dumbelele kiakala yo mwand’a usafu owidi e nsangu zandi, wizidi fukama vana malu mandi.+ 26  O nkento Mungerekia kakala, musi Suro-finiki;* undodokele kavaikisa o nkuya muna mwan’andi a nkento. 27  Kansi, Yesu umvutwidi vo: “Yambula wana bayukuta ntete, kadi ke diansongi ko mu bonga madia ma wana yo tuba mo kwa wan’a mbwa.”+ 28  Kansi, o nkento umvutwidi vo: “Ingeta, e mfumu, kansi kana nkutu i wan’a mbwa kuna nsi a meza, bedianga nkesona zisotolanga yingiana-ngiana.” 29  Umvovese vo: “Mu kuma kia dina ovovele, wenda kwaku; o nkuya uvaikidi muna mwan’aku ankento.”+ 30  Wele kuna nzo andi, owene dumbelele waleka vana mfulu, o nkuya umvaikidi.+ 31  Vava o Yesu kakatukidi muna zunga kia Turo, oviokele muna Sidone, muna Mbu a Ngalili yakuna zunga kia Dekapole.*+ 32  Bantwasidi muntu wafwa matu ye nkukumi,+ bandodokele kanwuka.* 33  Unkatwidi vana vena ndonga, wele yandi vana fulu kia yau kaka. I bosi, osidi e nlembo muna matu mandi, otawidi mete, oviakane lubini lwandi.+ 34  Osengwele meso kuna zulu yo vumuka, umvovese vo: “Efata,” i sia vo, “Kakuka.” 35  O matu mandi makakukidi,+ eki kiankanganga o lubini lwandi kikutulukidi, oyantikidi vova kiambote. 36  Ubakanikini vo ke bazayisi dio kwa muntu ko,+ kansi wau kakwamanene kubakanikina, basakisi nkutu samuna dio kwa wantu.+ 37  Basivikidi kikilu+ yo vova vo: “Mawonso kavangidi mambote kikilu. Owisisanga nkutu afwa matu yo vovesa mababa.”+

Mvovo vana yand'a lukaya

I sia vo, ke basukwidi moko ko mun’owu wa kinkulu kia Ayuda.
Muna Kingerekia, por·nei′a. Tala Nsas’a Mvovo, “Mavangu ma Zumba.”
Muna Kingerekia, a·sel′gei·a. Tala Nsas’a Mvovo.
Yovo “musi Suro-finiki wa kingutukila.”
Yovo “Zunga kia Mbanza Kumi.”
Mvovo wa sina: “kanteseka moko.”