Zasoneka Maku 15:1-47
15 Oku mene-mene, nganga zambuta, ye akuluntu ye asoneki, i sia vo, Mbazi a Nkanu* yawonso ivuende mfulu, bakangidi Yesu yo kunyekola kwa Pilato.+
2 Pilato unyuvuidi vo: “Ongeye i Ntinu a Yuda e?”+ Ovutwidi vo: “Ngeye kibeni ovovele wo.”+
3 Kansi, nganga zambuta bamfundidi mambu mayingi.
4 Pilato unyuvuidi diaka, oku vo: “Kuvutula diambu ko e?+ Tala e mambu mayingi bekufundilanga.”+
5 Kansi Yesu kavutwidi diaka diambu ko, Pilato osivikidi kikilu.+
6 Muna konso nkinzi a nduta, Pilato wabayambulwilanga mbakami mosi, ona balombele.+
7 Muna ntangwa yayina, muna pelezo mwakala muntu mosi, nkumbu andi Baraba, wakangwa kumosi ye awana banikunanga e nkindu yo vonda wantu.
8 E ndonga yizidi, iyantikidi lomba dina Pilato kayukwa kubavanga.
9 Ubavutwidi vo: “Nga nuzolele yanuyambwila o Ntinu a Ayuda e?”+
10 Kadi Pilato wazaya wo vo nganga zambuta mu kuma kia kimpala banyekolwele.+
11 Kansi, e nganga zambuta zikomekene ndonga kimana balomba vo kabayambulwila Baraba.+
12 Pilato ubayuvuidi diaka vo: “Ozevo, adieyi mfwete vanga kwa ndiona nuyikilanga vo Ntinu a Ayuda?”+
13 Bakazidi diaka vo: “Kamanikwa vana nti!”*+
14 Pilato ubavovese vo: “Ekuma? Nkia diambu diambi kavangidi?” Basakisi okaza, oku vo: “Kamanikwa vana nti!”*+
15 Pilato wau kazolele yangidika ndonga, ubayambulwidi Baraba, vava bamene zwabula Yesu,+ unyekwele kavondelwa vana nti.+
16 Makesa bele yandi vana yanzala, i sia vo, muna lûmbu lwa nguvulu, babokele buka kiawonso kia makesa.+
17 Bamvuikidi nlele a nduwa, bavangidi kolowa ya nsende, bamvuikidi yo;
18 bayantikidi kumvovesa vo: “Kiambote kiaku, e Ntinu a Ayuda!”+
19 Banwend’e tutu vana ntu yo kuntaulwila o mete, bafukamene, bankundidi.
20 Vava bamene kunsakanena, bamvudidi e mvuatu a se kia nduwa, bamvuikidi e mvuatu miandi, bele kunkoma vana nti.+
21 Bakomekene muntu waviokanga, Simone wa musi Kurene, otukidi kuna mpatu, se dia Alesandero yo Rufu, muna nata o nti ampasi*+ a Yesu.
22 Bantwese vana fulu kiyikilwanga vo Ngolongota, kina kiasekolwa vo, “Ku-valanganza kia ntu.”+
23 Bamvene vinyu yasangwa dikaya ye mô,*+ kansi katambwidi yo ko.
24 Bankomene vana nti, bakayane mvuatu miandi, batelele mio e nkas’a mienze mu zaya kana nki ketambula konso muntu.+
25 Muna ola yatatu* bankomene vana nti.
26 Basonekene mfundu andi vo: “Ntinu a Ayuda.”+
27 Bamanikini mivi miole vana nti vana ndambu andi, mosi kuna lunene, wankaka kuna lumonso.+
28 * ——
29 Awana baviokelenge bantiangwini yo nikuna ntu miau,+ oku vo: “Ongeye wadi bangula e tempelo yo tungulula yo mu lumbu tatu,+
30 ukivuluza yo kulumuka va nti ampasi.”*
31 Diau dimosi mpe, nganga zambuta ye asoneki bayantikidi kunsakanena, oku vo: “Wavuluza akaka; yandi kibeni kelenda kuyivuluza ko!+
32 Yambula Kristu, o Ntinu a Isaele, kakulumuka vana nti ampasi,* tukwikila muna yandi.”+ Kana nkutu awana bakedi muna nti vana ndambu andi, bayantikidi kuntumba.+
33 Vava kialwaka ola ya sambanu,* e tombe kibukamene muna nsi yawonso yamuna ola yavua.*+
34 Muna tezo kia ola ina yavua,* Yesu obokele muna nding’angolo, oku vo: “Eli, Eli, lama sabaktani?” i sia vo, “E Nzambi ame, e Nzambi ame, ekuma ungiambulwidi?”+
35 Ankaka muna awana batelamene vavana, vava bawidi wo, bavovele vo: “Wá! Eliya kabokele.”
36 I bosi, mosi muna yau wele ntinu, obongele e vusu, ovungidi dio muna vinyu ya ngani, osomekene dio vana ntu a tutu, umvene dio kanua,+ ovovele vo: “Nunyambula! Twatala kana vo Eliya okwiza kunkatula.”
37 Yesu okazidi muna nding’angolo, ofwidi.*+
38 E rido a nzo avauka+ utiazukini vana kati, tuka kuna ntandu yamuna yanda.+
39 O mfidi a makesa ona wanlangidilanga vava kamwene una kafwididi, ovovele vo: “Kieleka, muntu ndioyu i Mwan’a Nzambi.”+
40 Vakedi mpe akento, batadidingi kuna kwandá, ankaka vana bena i Maria Mandala, yo Maria, ngudi a Yakobo wa Nleke,* yo Yose, yo Salome,+
41 ana banlandanga yo kunsadila+ vava kakala kuna Ngalili. Akento ayingi akaka mpe bayenda yandi kuna Yerusaleme.
42 Kuna masika,* wau vo lumbu kia Nkubama kiakala, i sia vo, vitila Lumbu kia Vundu,
43 vezidi Yosefe wa musi Arimataya ona watoma zitiswanga muna Mbazi a Nkanu* ya Ayuda, Kintinu kia Nzambi mpe kavingidinge. Okabukidi yo kwenda kwa Pilato, olombele vimbu dia Yesu.+
44 Kansi, Pilato wazola zaya kana vo ofwidi kala, dianu vo obokele mfidi a makesa, unyuvuidi kana vo Yesu ofwidi kala.
45 Vava kazayiswa kwa mfidi a makesa vo ofwidi, ovene vimbu kwa Yosefe.
46 Osumbidi o nlele a lino, okulumwini e vimbu, ozingidi dio vana nlele a lino, osidi dio muna ziami+ kina kiazokwa vana nsenzele; i bosi, onengomwene tadi vana mwelo a ziami.+
47 Kansi, Maria Mandala yo Maria wa ngudi a Yose bakedi kaka vana yo tala vana kasiwa.+
Mvovo vana yand'a lukaya
^ Mvovo wa sina: “Sanedina.” Tala Nsas’a Mvovo.
^ Yovo “Kavondelwa vana nti.”
^ Yovo “Kavondelwa vana nti.”
^ Tala Nsas’a Mvovo.
^ E mô, i lekwa kiansunga.
^ I sia vo, muna tezo kia ola ya 9, muna mene.
^ Tala Nsas’a Mvovo.
^ Tala Nsas’a Mvovo.
^ I sia vo, muna tezo kia ola ya 12, muna mwini.
^ I sia vo, muna tezo kia ola ya 15.
^ Muna tezo kia ola ya 15.
^ Yovo “ofulumwini mu nkumbu ansuka.”
^ Yovo “wa Nkufi.”
^ Yovo “Muna nkokela.”
^ Mvovo wa sina: “Sanedina.” Tala Nsas’a Mvovo.
