Zasoneka Maku 14:1-72
-
Anganga bavuandidi Yesu e mfulu kimana bamvonda (1, 2)
-
Yesu okusilu mazi mansunga (3-9)
-
Yuda oyekwele Yesu (10, 11)
-
Nduta yansuka (12-21)
-
Nlekelo a Mfumu usikidisu (22-26)
-
Osakwidi vo Petelo okumvakulwila o nkalu (27-31)
-
Yesu osambidi muna mpatu a Ngetesemane (32-42)
-
Yesu okangilu (43-52)
-
Ofundisu kuna Mbazi a Nkanu (53-65)
-
Petelo ovakulwidi Yesu o nkalu (66-72)
14 Vava kiavioka lumbu yole,+ vakedi Nkinzi a Nduta+ ye Mbolo Zakondwa Mfuna.+ Nganga zambuta ye asoneki kuna ndekwa zawonso bavavidi kunkanga kimana bamvonda,+
2 kadi edi bavovele vo: “Ke muna kolo kia nkinzi ko; kadi nkangu ulenda vanga mavuanga.”
3 Ekolo kadianga muna nzo a Simone wa nkwa wazi kuna Betania, vezidi nkento mosi ye mbwat’a* mazi mansunga, ma nardu yambote, yantalu. Oziudi e mbwata, oyantikidi mo yitila vana ntu andi.+
4 Akaka bakendalele kikilu yo vovaziana vo: “Ekuma kefwasilanga mazi mama mansunga?
5 Ekuma tulembi tekela mazi mama mu 300 za denali* yo vana zo kw’asukami?” Bamfungidi kikilu o makasi.*
6 Kansi Yesu ovovele vo: “Nunyambula. Ekuma lunkutokanesenanga? Diambote kavangidi kwa mono.+
7 Kadi asukami nukala yau ntangwa zawonso,+ nulenda kubavanga mawete konso ntangwa nuzolele, kansi omono ke nukala yame ntangwa zawonso ko.+
8 Ovangidi dina kalendele, otekele kunkusa mazi mansunga mu kuma kia luziku lwame.+
9 Kieleka, inuvovese vo, konso kuna kusamunuinua e nsangu zambote muna nza yawonso,+ edi kavangidi o nkento ndioyo disamunua mpe muna luyindulu lwandi.”+
10 Yuda wa musi Kereote, mosi vana vena yau Kumi ye Zole, wele kwa nganga zambuta kimana kanyekola kwa yau.+
11 Vava bawidi wo, bamwene kiese, basidi o nsilu wa kumvana nzimbu za palata.+ Dianu vo, wavavanga ntangw’ambote muna kunyekola.
12 Muna lumbu kiantete kia Mbolo Zakondwa Mfuna,+ kina bakelanga kimenga kia Nduta,+ alongoki andi banyuvuidi vo: “Akweyi ozolele twenda kukubikila e lambu dia Nduta kimana wadia?”+
13 Otumini alongoki andi wole, ubavovese vo: “Nuenda muna mbanza, nuwanana yo muntu onete mvungu a maza. Nunlanda,+
14 konso muna kekota, nuvova kwa mfumu a nzo vo, ‘O Nlongi ovovele vo: “Akweyi dina e seka dia nzenza muna ndenda dila e lambu dia Nduta ye alongoki ame?”’
15 Okunusonga seka diampwena dia ntandu, diakubikwa. I mûna nukutukubikila e lambu dia Nduta.”
16 Alongoki bele, bakotele muna mbanza, bawene mawonso kabavovese, bakubikidi e lambu dia Nduta.
17 Vava kuma kwafwa, wizidi ye yau Kumi ye Zole.+
18 Vava bavuende vana meza yo dia, Yesu ovovele vo: “Kieleka inuvovese vo, mosi vovo nuina, ona odianga yame, okungiekola.”+
19 Bamwene ntantu, konso muntu muna yau unyuvuidi vo: “Nga i mono e?”
20 Ubavovese vo: “Mosi muna yeno Kumi ye Zole, ndiona osidi yame o koko muna longa.+
21 Kadi Mwan’a muntu se kekwenda kwandi, nze una wasonama mu kuma kiandi, kansi tâtu kwa ndiona oyekola Mwan’a muntu!+ Diambote diadi kala, kele vo muntu ndioyo kawutuka ko.”+
22 Ekolo bedianga, obongele e mbolo, osambidi, obukunuini yo, ubavene yo, ovovele vo: “Nudia yo; eyayi nitu ame isunzulanga.”+
23 Obongele e mbungwa, ovutwidi matondo, ubavene yo, yau awonso banuini yo.+
24 Ubavovese vo: “E mbungwa yayi isunzulanga ‘menga+ mame ma kangu,’+ mana mebunguka mu kuma kia wantu ayingi.+
25 Kieleka, inuvovese vo, kinua diaka vinyu ko yamuna lumbu kina inua vinyu yampa muna Kintinu kia Nzambi.”
26 I bosi, vava bamene yimbila e nkunga, bele kuna Mongo a Olive.+
27 Yesu ubavovese vo: “Yeno awonso sakuba nuta, kadi diasonama vo: ‘Iwanda mvungudi,+ e mameme memwangana.’+
28 Kansi vava ifulwa, ikunuvita kuna Ngalili.”+
29 Petelo umvovese vo: “Kana nkutu awonso batel’e sakuba, omono kita dio ko.”+
30 Yesu umvovese vo: “Kieleka ivovese vo, o unu, o fuku wau, vitila e nsusu yakokola nkokola zole, okumpanina nkalu nkumbu tatu.”+
31 Kansi, osiamanene vo: “Kana nkutu vo mfwete fwa yaku, kilendi kuvanina nkalu ko.” Yau awonso mpe bavovele diau dimosi.+
32 Balweke vana fulu kina ye nkumbu vo Ngetesemane, ovovese alongoki andi vo: “Nuvuanda vava ekolo ikwenda samba.”+
33 Onete Petelo, Yakobo yo Yoane,+ okendalele kwayingi yo yangama o ntima.
34 Ubavovese vo: “Moyo ame ukendalele kikilu,+ yamu tezo kia fwa. Nukala vava yo yingila.”+
35 Ovavukidi fiakete, ofukamene vana ntoto, osambidi vo, avo dilendakana, yambula ntangwa yayi yampioka.
36 Ovovele vo: “Aba,* e Tata,+ mambu mawonso malendakana kwa ngeye; unkatula e mbungwa yayi. Kansi, ke una nzolele ko, una kaka ongeye ozolele.”+
37 Ovutukidi, ubawene baleka kwau, ovovese Petelo vo: “E Simone, nga olele kwaku e? Nga kuna ye ngolo ko mu yingila ola mosi e?+
38 Nuyingila yo kwamanana samba kimana nualembi bwa muna ntonta.+ Kieleka, o mwanda uzolele, kansi e nitu yatovoka.”+
39 Okatukidi diaka, osambidi, ovovele mambu mau mosi.+
40 Wizidi diaka, ubawene baleka, kadi meso mau mazita ye tulu, dianu ke bazaya edi bekumvutula ko.
41 Ovutukidi muna nkumbu ina yatatu, ubavovese vo: “Nulele kweno yo vunda mu ntangwa nze yayi! Difwene! E ntangwa ifwene!+ Mwan’a muntu oyekolwa vana moko ma asumuki.
42 Nutelama, twenda. Ndiona okungiekola ofinamene.”+
43 Ekolo kavovelenge, vana vau, o Yuda, mosi vana vena yau Kumi ye Zole, wizidi ye ndonga bena ye nsosolo ye bota, batuminu kwa mbuta za nganga, asoneki ye akuluntu.+
44 Ndiona wanyekola, wabavana e sinsu, oku vo: “Ndiona ifiba, i yandi ndiona; nunkanga yo toma kunyingila ekolo nunkunata.”
45 Vava kalweke, wele vana kena, umvovese vo: “E Rabi!”* i bosi, umfibidi.
46 Bankangidi, bele yandi.
47 Mosi mun’awana batelamene vana ndambu, ovolele nsosolo andi, ozengele kutu kwa ntaudi a ngang’ambuta.+
48 O Yesu ubavovese vo: “Nuizidi ye nsosolo ye bota mu kunkanga nze mwivi?+
49 E lumbu yawonso yakelenge yeno muna tempelo yo longa,+ yeno kenunkangi. Kansi, ediadi divangamene muna lunganesa e Sono.”+
50 Alongoki awonso bansisidi, batinini kwau.+
51 Kansi vakedi toko dimosi walembi vuata, uyizingidi kaka nlele a lino, oyantikidi kunlanda lukufi, bavavidi kumbaka,
52 kansi osisidi e nlele a lino, otinini e nkonga.*
53 Banete Yesu kwa ngang’ambuta,+ kuna kukutakene mbuta za nganga zawonso, ye akuluntu ye asoneki.+
54 Kansi, Petelo unlende kuna vala yakuna yanzala kia ngang’ambuta; ovuende kumosi ye selo, vana vena tiya yo yotela.+
55 E mbuta za nganga ye Mbazi a Nkanu* yawonso bavavidi kimbangi mu kuma kia Yesu kimana bamvonda, kansi ke basolwele kio ko.+
56 Ayingi bansididi o umbangi waluvunu,+ kansi umbangi wau ke wele betela ko.
57 Ankaka batelamene, bansididi umbangi waluvunu, oku vo:
58 “Oyeto twanwidi wau kavovelenge vo: ‘Bangula ibangula e tempelo yayi yavangilwa muna moko ma wantu, muna lumbu tatu itunga yankaka yalembi vangilwa mu moko ma wantu.’”+
59 Kana nkutu muna diambu diadi, o umbangi wau, ke wele betela ko.
60 I bosi, o ngang’ambuta otelamene vana kati, oyuvuidi Yesu vo: “Nga kuvutula diambu ko e? Adieyi ovovele mu kuma kia diambu bekumfundilanga o wantu awaya?”+
61 Odingalele kwandi, kavutwidi diambu ko.+ O ngang’ambuta unyuvuidi diaka, oku vo: “Nga ngeye u Kristu, wa Mwan’a Mveledi e?”
62 Yesu ovovele vo: “I mono; numona Mwan’a muntu+ ovuende kuna koko kwalunene+ kwa nkuma yo kwiza yo matuti ma zulu.”+
63 Muna diadi ngang’ambuta otiazwini e mvuatu miandi yo vova vo: “Nkia kimbangi diaka tuvuidi o mfunu?+
64 Nuwidi o lutiangu lwandi. Nkia nzengo nubakidi?”* Awonso bavovele vo, lufwa lumfwanukini.+
65 Akaka bayantikidi kuntaulwila o mete,+ yo fuka lose lwandi, yo kunwanda nkome. Bamvovese vo: “Sakula!” Banwende mbata vana lose, o makesa banète.+
66 Petelo wau kakedi vana yanda, vana yanzala, vezidi mosi muna ntaudi za makento za ngang’ambuta,+
67 vava kamwene Petelo oyotelanga tiya, untadidi, oku vo: “Ongeye mpe wakala yo Yesu wa musi Nazarete.”
68 Kansi, ovakwidi wo nkalu, oku vo: “Kinzeye kwame ko ngatu bakula dina ovovele,” ovaikidi, wele vana mbel’a vitu.*
69 O ntaudi ankento umwene, ovovele diaka kw’awana batelamene vana ndambu, oku vo: “Ondioyu mosi muna yau.”
70 Ovakwidi wo diaka nkalu. Ke vavioka kolo ko, awana batelamene vo, bavovese diaka Petelo vo: “Kieleka, ongeye mpe u mosi muna yau, kadi u Mungalili.”
71 Kansi, oyantikidi kuyisiba yo dia e ndofi, oku vo: “Kizeye kwame muntu ndioyo ko oyikidi!”
72 Vana vau, e nsusu ikokwele nkumbu wanzole,+ Petelo osungamene dina Yesu kamvovesa: “Vitila e nsusu yakokola nkokola zole, okumpanina nkalu nkumbu tatu.”+ Okendalele, oyantikidi dila.
Mvovo vana yand'a lukaya
^ Mvovo wa sina: “mbwat’a alabasta.” Tala Nsas’a Mvovo, “Alabasta.”
^ Yovo “bamvovesele kuna makasi; bantumbidi.”
^ I mvovo wa Kiyibere yovo wa Ki-aramiti una ye nsasa vo: “E Tata!”
^ Yovo “Nlongi.”
^ Yovo “otinini ye kupe kiansi kaka.”
^ Mvovo wa sina: “Sanedina.” Tala Nsas’a Mvovo.
^ Yovo “Adieyi nubenze?”
^ Yovo “vana yanzala.”
