Zasoneka Maku 10:1-52

  • Longo yo vonda longo (1-12)

  • Yesu osambwidi yingiana-ngiana (13-16)

  • Kiuvu kia toko dia mvuama (17-25)

  • Bembola maka mambu mu kuma kia Kintinu (26-31)

  • Lufwa lwa Yesu lusakwilu diaka (32-34)

  • Ndomb’a Yakobo ye Yoane (35-45)

    • Yesu wavana moyo andi se lukûlu lwa wantu ayingi (45)

  • Batimai wa mpofo owukilu (46-52)

10  Okatukidi kwakuna, olweke muna mingilu mia Yuda, kuna simu dia Yodani, e ndonga yizidi vana kena. Wau vo i fu kiandi, oyantikidi diaka kubalonga.+  Afarisi bezidi kuntonta, banyuvuidi kana vo diansongi kwa yakala mu vonda longo yo nkaz’andi.+  Ubavutwidi vo: “O Mose adieyi kanukanikina?”  Bavovele vo: “O Mose wayambula vo yakala kavana nkanda wa vondela longo kwa nkento yo kunsindika.”+  Yesu ubavovese vo: “Mu kuma kia bâla kwa ntima mieno+ i kanusonekenena o nkanikinu wau.+  Kansi tuka kuna lubantiku lwa nsema, ‘Yakala yo nkento kabavanga.+  Muna kuma kiaki, o yakala osisa se diandi yo ngudi andi,+  yau wole bekala se nitu mosi,’+ ke nwole diaka ko, kansi nitu mosi.  Dianu vo, kina kiayikakeswa kwa Nzambi, o muntu kavambanisa ko.”+ 10  Vava bakotele diaka muna nzo, alongoki banyuvuidi diambu diadi. 11  Ubavovese vo: “Konso yakala ovonda o longo yo nkaz’andi, kasompa wankaka, zumba katele,+ kasongele kwikizi ko kwa nkaz’andi, 12  avo nkento ovondele longo yo nkaz’andi, kasompa wankaka, zumba katele.”+ 13  I bosi, wantu bantwasidi yingiana-ngiana kimana kabasimba, kansi alongoki babasimini.+ 14  Vava kamwene wo, Yesu okendalele yo kubavovesa vo: “Nuyambula yingiana-ngiana beza kwa mono; ke nubasimi ko, kadi e Kintinu kia Nzambi kia awana bena nze yingiana-ngiana yayi.+ 15  Kieleka inuvovese vo, konso ona olembi tambula Kintinu kia Nzambi nze kingiana-ngiana, ke kota mo nkutu ko.”+ 16  Owonzakene yingiana-ngiana, ubasambwidi yo kubatenseka o moko.+ 17  Ekolo kavaikidinge, muntu mosi wizidi e ntinu yo fukama vana ndos’andi, unyuvuidi vo: “E Nlongi Ambote, adieyi mfwete vanga muna vua moyo a mvu ya mvu?”+ 18  Yesu umvovese vo: “Ekuma ungikidi vo wambote? Ke vena muntu ambote ko, mosi kaka, i Nzambi.+ 19  E nkanikinu ozeye mio: ‘Kuvondi ko,+ kute zumba ko,+ kuyiyi ko,+ kusie kimbangi kia luvunu ko,+ kuvunginiki ko,+ zitisa se diaku yo ngudi aku.’”+ 20  Muntu ndioyo umvovese vo: “E Nlongi, mawonso mama ilundanga mo tuka muna kileke kiame.” 21  Yesu untadidi, unzolele, umvovese vo: “Diambu dimosi okondelo: Wenda teka yawonso una yau yo vana e nzimbu kw’asukami, okala yo lusalu kuna zulu; wiza ndandi.”+ 22  Kansi okendalele muna mvutu zazi, wele ye ntantu zawonso, kadi mavua mayingi kakala mau.+ 23  Vava katadidi oku y’oku, Yesu ovovese alongoki andi vo: “Diampasi dikala kw’awana bena ye nzimbu mu kota muna Kintinu kia Nzambi!”+ 24  Kansi alongoki basivikidi e mvovo miandi. I bosi, Yesu ovutwidi vo: “E wana, diampasi kikilu mu kota muna Kintinu kia Nzambi! 25  Diasazu kwa samo kaviokela vana vundu dia ntumbu, ke mu mvuama ko kakota muna Kintinu kia Nzambi.”+ 26  Basivikidi kikilu, banyuvuidi* vo: “Nani olenda vuluzwa?”+ 27  Yesu ubatadidi, ovovele vo: “Kuna kwa wantu ke dilendakana ko, kansi ke wau ko kuna kwa Nzambi, kadi kuna kwa Nzambi, mawonso malendakana.”+ 28  Petelo umvovese vo: “Oyeto tusisidi yawonso yo kulanda.”+ 29  Yesu ovovele vo: “Kieleka inuvovese vo, ke vena muntu ko wasisa nzo yovo mpangi yovo nsanga yovo ngudi yovo se yovo wana yovo mpatu muna kuma kiame ye mu kuma kia nsangu zambote+ 30  kalembi tambula nkama-nkama mu kolo kiaki—nzo, mpangi, nsanga, ngudi, wana, ye mpatu, kumosi ye lubangamu+—muna tandu* kikwiza, moyo a mvu ya mvu. 31  Kansi, ayingi bavitidi besukinina, awana basukinini bevita.”+ 32  Ekolo bekwendanga muna nzila mu tomboka kuna Yerusaleme, Yesu ubavitidi kuna ntwala, alongoki andi basivikidi kikilu, kansi awana banlendenge bamwene o wonga. Obongele diaka yau Kumi ye Zole ubanete va fulu kia yau kaka, oyantikidi kubasamunuina mawonso mekumbwila, oku vo:+ 33  “Nuwá, se tutomboka kuna Yerusaleme, o Mwan’a muntu oyekolwa vana moko ma nganga zambuta ye asoneki. Bekunzengela tumbu kia lufwa yo kunyekola kwa esi zula, 34  oyau bekunsakanena yo kuntaulwila mete, bekunzwabula yo kumvonda, kansi muna lumbu kiatatu ofuluka.”+ 35  I bosi, Yakobo ye Yoane, wan’a Zebedayo,+ bamfinamene, bamvovese vo: “E Nlongi, tuzolele vo watuvangila konso dina tukulomba.”+ 36  Ubavovese vo: “Adieyi nuzolele yanuvangila?” 37  Bavutwidi vo: “Utuyambula twavuanda muna nkembo aku,+ mosi kuna koko kwaku kwalunene, wankaka kuna koko kwalumonso.” 38  Kansi, Yesu ubavutwidi vo: “Oyeno ke nuzeye dina nulombanga ko. Nga nulenda nua e mbungwa ina inua yovo vubwa e mvubwa ina ivubw’e?”+ 39  Bamvutwidi vo: “Tulenda kweto.” Yesu ubavovese vo: “E mbungwa ina inua, nulenda yo kweno nua, e mvubwa mpe ina ivubwa, nulenda yo vubwa.+ 40  Kansi, ke mono ko ibaka e nzengo kana nani ovuanda kuna koko kwame kwalunene yovo kwalumonso, kansi Nzambi osola awana bevuanda va fulu yoyo.” 41  Yau kumi vava bawidi wo, bafungidi makasi mu kuma kia Yakobo yo Yoane.+ 42  Kansi, o Yesu ubabokele, ubavovese vo: “Nuzeye wo vo awana bemonekanga vo yau beyalanga e zula, bediatidilanga nkangu, akwa tunda mpe bena ye wisa muna yau.+ 43  Ke wau ko difwete kala vovo nuina; kansi konso ona ozolele kala nene vovo nuina, kafwete kala selo kieno,+ 44  konso ona ozolele kala se ntu vovo nuina, kafwete kala se ntaudi kwa yeno awonso. 45  Kadi o Mwan’a muntu kayiza sadilwa ko,+ kansi wiza muna sadila akaka yo vana moyo andi se lukûlu lwa wantu ayingi.”+ 46  I bosi, balweke muna Yeriko. Kansi, una se kevaika muna Yeriko ye alongoki andi ye ndong’ayingi, Batimai (mwan’a Timai), mpofo walombanga tukau, ofongele vana mbel’a nzila.+ 47  Vava kawa vo i Yesu wa Nazarete, oyantikidi o kaza, oku vo: “E Yesu, e Mwan’a Davidi,+ umfwila e nkenda!”+ 48  Muna kuma kiaki, ayingi bayantikidi kunsima, bamvovese vo kabutama, kansi osakisi diaka o kaza, oku vo: “E Mwan’a Davidi, umfwila e nkenda!” 49  Yesu oningamene yo vova vo: “Numbokela keza oku ngina.” Babokele mpofo, bamvovese vo: “Kabuka! Telama; yandi ubokele.” 50  Otubidi yunga kiandi, otelamene, wele kwa Yesu. 51  I bosi, Yesu unyuvuidi vo: “Adieyi ozolele yavanga kwa ngeye?” O mpofo umvutwidi vo: “E Raboni,* yambula yamona diaka.” 52  Yesu umvovese vo: “Wenda kwaku. O lukwikilu lwaku lusaswidi.”+ Vana vau omwene,+ oyantikidi kunlanda muna nzila.

Mvovo vana yand'a lukaya

Nanga, “bayuvuzianini.”
I sia vo “Nlongi.”