Zasoneka Maku 1:1-45
-
Yoane wa Mvubi osidi umbangi (1-8)
-
Luvubu lwa Yesu (9-11)
-
Yesu otontelo kwa Satana (12, 13)
-
Yesu oyantikidi sila umbangi muna Ngalili (14, 15)
-
Alongoki antete babokelo (16-20)
-
Mwand’a usafu uvaikisu (21-28)
-
Yesu owukidi ndonga muna Kafanau (29-34)
-
Osambidi vana fulu kia yandi kaka (35-39)
-
Nkwa wazi owukilu (40-45)
1 I wau wuwu wayantikila e nsangu zambote mu kuma kia Yesu Kristu, wa Mwan’a Nzambi:
2 Wauna wasonama muna Yesaya wa ngunza vo: “(Tala! Ntwikidi ntumw’ame kuna ntwal’aku,* ona okubika e nzil’aku.)+
3 Nding’a muntu obokanga muna makanga, oku vo: ‘Nukubika e nzil’a Yave!* Nusingika nzila zandi.’”+
4 Yoane wa Mvubi wakala muna makanga, wele alonginge luvubu luna vo i sinsu kia luviluku lwa ntima muna luloloko lwa masumu.+
5 E zunga yawonso ya Yuda y’esi Yerusaleme awonso bezidi kwa yandi, bafungwini masumu mau, ubavubidi* muna Nkoko a Yodani.+
6 Yoane wavuatanga mvuatu a mika mia samo ye mpond’a nkand’a bulu muna luketo lwandi,+ madia mandi, makonko yo wiki.+
7 Walonganga vo: “Muntu unsundidi o nkuma okwiza ndandi, omono kiafwana nkutu yenzama ko, yakutulula e nsinga mia nsampatu zandi.+
8 Omono inuvubidi muna maza, kansi oyandi okunuvubila muna mwand’avelela.”+
9 Muna lumbu yayina, Yesu otukidi kuna Nazarete a Ngalili, Yoane umvubidi muna Yodani.+
10 Vava katombokele muna maza, vana vau omwene e zulu diziukidi, o mwanda unkulumukini nze yembe.+
11 E ndinga itukidi kuna zulu, oku vo: “Ongeye u Mwan’ame anzolwa, ngeye iyangalelanga.”+
12 Vana vau o mwand’avelela umfididi muna makanga.
13 Okedi lumbu 40 muna makanga, otontelo kwa Satana.+ Wakala vana vena bulu ya mfuta, kansi e mbasi zinsadisi.+
14 Vava Yoane kasiwa muna pelezo, Yesu wele samuna e nsangu zambote za Nzambi+ kuna Ngalili,+
15 oku vo: “E ntangwa yasikidiswa ifwene, e Kintinu kia Nzambi kifinamene. Nuviluka o ntima+ yo kwikila muna nsangu zambote.”
16 Ekolo kekangalanga vana mbel’a Mbu a Ngalili, omwene Simone yo Andere+ wa mpangi andi, betubanga makonde muna mbu,+ kadi abaki a mbizi za maza.+
17 Yesu ubavovese vo: “Nuiz’a ndandi, ikunukitula se abaki a wantu.”+
18 Vana vau basisidi makonde mau, banlende.+
19 Vava kakangale fitini, omwene Yakobo wa mwan’a Zebedayo yo Yoane wa nleke andi, belondanga makonde mau muna nzaza,+
20 vana vau ubabokele. Basisidi Zebedayo wa se diau muna nzaza ye asadi, banlende.
21 Bele muna Kafanau.
Vava e Lumbu kia Vundu kiayantika, wele muna sambilu, oyantikidi longa.+
22 Basivikidi kikilu e mpil’andi ya longela, kadi wabalongelanga nze nkwa wisa,* ke nze asoneki au ko.+
23 Muna sambilu mukedi mpe muntu wakala ye mwanda usafu, okazidi oku vo:
24 “Nkia diambu tuna diau yo ngeye, e Yesu wa musi Nazarete?+ Nga wizidi kutufwasa e? Ntomene kuzaya, u Mvauki a Nzambi!”+
25 Kansi, Yesu otumbidi wo, oku vo: “Dingalala, vaika muna yandi!”
26 Mwanda usafu unzakamese, okazidi muna nding’angolo, uvaikidi muna yandi.
27 Awonso basivikidi kikilu, bayuvuziane oku vo: “Nkia diambu diadi? Longi diampa! Ovuidi nkuma wa vaikisa mianda miambi, e mianda mpe minkunlemvokelanga.”
28 Vana vau e nsangu zandi zimwangane muna mavata mawonso ma Ngalili.
29 I bosi bavaikidi muna sambilu, bele yo Yakobo yo Yoane+ kuna nzo a Simone yo Andere.
30 O kô wa Simone+ wankento waleka kakala, ngianduka kakala yau, vana vau bansamunuini wo.
31 Wele vana kena, unsimbidi muna koko, umvumbwidi. E ngianduka imene, oyantikidi kubakubikila madia.
32 Kuna masika, vava ntangwa yadimuka, wantu bantwasidi e mbevo zawonso ye awana bakala ye nkuya;+
33 Wantu awonso muna mbanza balungalakene vana mwelo.
34 Owukidi ayingi bakala ye yimbevo ya mpila mu mpila,+ ovaikisi e nkuya miayingi, kansi kayambwidi ko vo e nkuya miavova, kadi bazaya wo vo yandi i Kristu.*
35 Muna mene-mene, una kuma kwakinu e tombe, osikamene, ovaikidi, wele vana fulu kia yandi kaka, oyantikidi samba.+
36 I bosi, Simone ye awana bakedi yandi bele kumvava,
37 vava bansolwele, bamvovese vo: “Awonso ngeye bevavanga.”
38 Ubavovese vo: “Twenda muna fulu yankaka, muna mavata mafinamene, yalongela mpe mwamuna, kadi ekiaki i kuma yayizila.”+
39 Wele alonginge muna masambilu mau muna Ngalili yawonso yo vaikisa e nkuya.+
40 Nkwa wazi wizidi mpe kwa yandi, umfukamene yo kundodokela, oku vo: “Avo ozolele wo, umpelelesa.”+
41 Wau kamwene nkenda, olambwidi o koko kwandi, unsimbidi, umvovese vo: “Nzolele wo! Velela kwaku.”+
42 Vana vau o wazi unkatukidi, ovelele.
43 I bosi, otomene kunkanikina, unsindikidi,
44 umvovese vo: “Kuvovi wo kwa wantu ko, kansi wenda kuyisonga kwa nganga, watambika lukau lwa mpelela aku, luna Mose kakanikina+ muna umbangi kwa yau.”+
45 Kansi, vava kavavukidi, oyantikidi wo samuna yo mwanga e nsangu, o Yesu kakala diaka y’owu kakotela muna vata ko vana meso ma wantu, wakala kaka kuna mbazi a mbanza, muna makanga. Kansi o wantu batukanga mwawonso bezidi kwa yandi.+
Mvovo vana yand'a lukaya
^ Mvovo wa sina: “oku ndose aku.”
^ Yovo “ubadimwini.”
^ I sia vo, mana kabalonganga kwa Nzambi matuka.
^ Nanga, “bazaya kana vo nani kakala.”
