Lusengomono kwa Yoane 13:1-18

  • Bulu kiansisi kia ntu nsambwadi kitombokele tuka muna kalunga (1-10)

  • Bulu kiansisi kia mpoka zole kitombokele tuka muna ntoto (11-13)

  • Teke kia bulu kiansisi kia ntu nsambwadi (14, 15)

  • Dimbu ye lutangu lwa bulu kiansisi (16-18)

13  Otelamene* vana senge dia kalunga. Mbwene bulu kiansisi+ kitombokele muna kalunga,+ kina ye mpoka kumi ye ntu nsambwadi, vana mpoka zandi vena ye banda* kumi ya kimfumu, kansi vana ntu miandi nkumbu za lutiangu.  E bulu kiansisi kina mbwene kikedi nze ngo, kansi o malu mandi nze ma urse, o nu’andi nze nu’a nkosi. O ngobodi+ ovene kwa bulu nkum’andi ye kunda kiandi ye wisa kiayingi.+  Mbwene vo umosi muna ntu miandi uluekelo mputa ya mpondi, kansi e mput’andi ya mpondi isasukidi,+ e nza yawonso ilende e bulu kiansisi yo sivika.  Basambidi o ngobodi wau vo ovene wisa kwa bulu kiansisi, basambidi e bulu kiansisi mu mvovo emi: “Nani wina nze bulu kiansisi, nani olenda kio nuanisa?”  Kiveno nua uvovanga mambu manene ye malutiangu, kiveno e wisa kia vanga mambu mu ngonde 42.+  Kiziwidi nu’andi mu tianguna+ Nzambi, kiatianguna nkumbu andi ye fulu* kiandi, ye awana nkutu bekalanga kuna zulu.+  Kiveno nswa wa nuanisa avauki yo kubasunda,+ kiveno e wisa kiayala makanda mawonso ye nkangu ye ndinga ye zula.  Awonso ana bekalanga ova nza basambidi kio. Tuka kuna semo dia nza, ke mosi ko muna yau wasonama e nkumbu muna nkand’a moyo+ a Mwan’a meme ona wavondwa.+  Ndiona una ye matu, yambula kawá.+ 10  Avo muntu kafwete kwenda muna kinkole, muna kinkole kekwenda. Avo muntu ovondela nkwandi muna nsosolo, muna nsosolo mpe kevondelwa.+ Ovava i vevavilwanga luzindalalu+ yo lukwikilu+ kuna kw’avauki.+ 11  I bosi, mbwene bulu kiankaka kiansisi kitombokele tuka muna ntoto, kina ye mpoka zole nze mwan’a meme, kansi kiyantikidi vova nze ngobodi.+ 12  Kisadidi e wisa kiawonso kia bulu kiantete kiansisi+ vana ndose andi. Kifilanga e nza ye awana bekalanga vo mu sambila e bulu kiantete kiansisi kina kiawukwa e mputa ya mpondi.+ 13  Sinsu yanene kivanganga, kikulumunanga nkutu e tiya ova nza tuka kuna zulu, vana ndose a wantu. 14  Kivukumunanga awana bekalanga ova nza mu kuma kia sinsu ina kavaninua o nswa kavanga vana ndose a bulu kiansisi, ekolo kevovesanga awana bekalanga ova nza bavanga e teke+ kia bulu kiansisi kina kialuekwa mu nsosolo, kansi ke kiafwa ko.+ 15  Kiveno nswa wa vana fulumwinu* kwa teke kia bulu kiansisi, kimana e teke kia bulu kiansisi kiavova yo vondesa awonso awana ke bazolele sambila teke kia bulu kiansisi ko. 16  Kifilanga wantu awonso—andwelo ye anene, mvuama ye asukami, avevoki ye abundu—kimana basiwa e dimbu muna koko kwalunene yovo vana mbunzu,+ 17  ke vena ona olenda sumba ko yovo teka nanga ndiona kaka una ye dimbu, nkumbu+ a bulu kiansisi yovo lutangu lwa nkumbu andi.+ 18  Ediadi ngangu divavanga: Ndiona una ye umbakuzi yambula kabadika lutangu lwa bulu kiansisi, kadi i lutangu lwa muntu, o lutangu lwandi 666.+

Mvovo vana yand'a lukaya

I sia vo, ngobodi.
Yovo “kolowa ya kimfumu.”
Yovo “saba.”
Yovo “mwanda.”