Wanzole wa Ntinu 5:1-27

  • Elesa owukidi wazi wa Namani (1-19)

  • Ngekazi wa nkwa loko obakamene wazi (20-27)

5  Namani wa mfidi a makesa ma ntinu a Suria nkwa tunda kakala, watoma zitiswanga kwa mfumu andi, kadi muna yandi, o Yave i kavanina nsundidi* kwa Suria. Kesa dia nkuma kakala, kana una vo kimbevo kia wazi kayelanga.*  Lumbu kimosi vava bayenda nuanisa Isaele, Asuria babaka dumbelele kimosi, ona wakituka se ntaudi a nkaz’a Namani.  E dumbelele ovovese mfumu andi ankento vo: “Avo mfumu ame wele kingula ngunza+ kuna Samaria, owuka wazi wandi.”+  Oyandi* wele wo zayisa kwa mfumu andi, unsamunuini mawonso kavovele dumbelele wa musi Isaele.  O ntinu a Suria ovovele vo: “Nda wenda! Se yatwika nkanda kwa ntinu a Isaele.” Muna diadi, wele, onete talanta kumi* za palata, 6.000 ma sekele za wolo ye mvuatu kumi miaswaswana.  Otwese nkanda kwa ntinu a Isaele owu wavova vo: “Itwikidi nkanda wau kumosi yo Namani wa selo kiame kimana wawuka wazi wandi.”  Vava ntinu a Isaele katanga nkanda, otiazwini mvuatu andi, ovovele vo: “Nga mono i Nzambi yavonda yo vuluza muntu e?+ Kadi untwikidi muntu ndioyo, umpovese vo yawuka wazi wandi! Nze una numwene yeno kibeni, ntantani kaka kevava kwa mono.”  Kansi, Elesa wa muntu a Nzambi aludi vava kawidi vo ntinu a Isaele otiazwini mvuatu miandi, vana vau otumini nsamu kwa ntinu, oku vo: “Ekuma otiazwinini mvuatu aku? Dodokolo, yambula keza kwa mono kimana kazaya wo vo ngunza una mu Isaele.”+  Muna diadi, Namani wizidi ye mvalu miandi ye makalu mandi ma vita, otelamene vana mwelo a nzo a Elesa. 10  Kansi, Elesa untwikidi nati a nsangu kamvovesa vo: “Wenda kuyivuba nkumbu nsambwadi + muna Yodani,+ e nitu aku ivutukila o vimpi, ovelela.” 11  Namani ofungidi makasi, otelamene kavutuka kwandi, ovovele vo: “Edi mbenze vo, ‘Vaika kevaika oku ngina, katelama, kavovela e nkumbu a Yave wa Nzambi andi, kavinza o koko kwandi vana wazi mu wuka wo.’ 12  E nkoko mia Damaseke,+ Abana yo Farapare, nga ke misundidi maza mawonso ma Isaele ko e? Nga kilendi mo kuyivuba ko yavelela kwame?” Muna kuma kiaki, ovilukidi, wele kwandi kuna makasi. 13  E ntaudi zandi zimfinamene, bamvovese vo: “E tata, kele vo ngunza diambu dianene kalombele, nga kwadi dio vanga ko e? Nga ke diasazu ko wau kavovese vo: ‘Wenda kuyivuba, wavelela’?” 14  Muna diadi, okulumukini, odimukini* nkumbu nsambwadi muna Yodani, mun’owu wa mvovo a muntu a Nzambi aludi.+ E nitu andi ivutukidi nze nitu a kimwana-mwana,+ ovelele.+ 15  I bosi, ovutukidi kwa muntu a Nzambi aludi+ ye wantu awonso* kakala yau, otelamene vana vena ngunza, umvovese vo: “Owau nzeye wo vo ova nza yawonso Nzambi kena kwankaka ko, mwamu Isaele kaka.+ Owau, dodokolo, tambula lukau* lwa ntaudi aku.” 16  Kansi, Elesa ovovele vo: “Ndidi e ndofi muna Yave wa Nzambi amoyo ona isadilanga* vo kitambula lo ko.”+ Osiandamene kaka vo katambula lo, kansi Elesa katondele ko. 17  I bosi, Namani ovovele vo: “Wau vo kuzolele ko, dodokolo, yambula ntaudi aku kavewa ntoto wa nsi yayi, ulenda natwa kwa mula zole, kadi ntaudi aku ke tambika diaka yimenga yangioka ko yovo lukau kwa nzambi zankaka, kansi kwa Yave kaka. 18  Kansi, yambula Yave kaloloka ntaudi aku muna diambu edi: O mfumu ame vava kekotanga muna nzo* a Rimone kavumbama, mu koko kwame keyekamenanga, muna kuma kiaki, mono mpe ivumbamanga muna nzo a Rimone. Vava ivumbama muna nzo a Rimone, yambula Yave kaloloka ntaudi aku.” 19  Elesa umvovese vo: “Wendela kuna luvuvamu.” Vava Namani kakatukidi vana kena yo kangala fikolo, 20  Ngekazi+ wa selo kia Elesa wa muntu a Nzambi aludi,+ ovovele muna ntima vo: ‘E mfumu ame oyambwidi vo Namani wa Nsuria+ kenda kwandi lembi tambula e lekwa katwese. I nkal’a Yave kaka, yambula yanlanda ntinu kimana yatambula konso lekwa kwa yandi.’ 21  Dianu vo, Ngekazi olende Namani. Namani vava kamwene vo muntu okwiza nlandinge, okulumukini muna kalu diandi, kankika, ovovele vo: “Kiambote, aweyi kaka?” 22  Ovutwidi vo: “Kiambote. O mfumu ame untumini, oku vo, ‘Matoko mole ma wan’a ngunza bandwakidi tuka kuna zunga kia miongo mia Eferaime. Dodokolo, ubavana talanta mosi ya palata ye nlele miole.’”+ 23  Namani ovovele vo: “Bonga talanta zole.” Unsiandamene kabonga kaka zole,+ okangidi talanta zole za palata muna madila mole ye nlele miole miaswaswana, ovene mio kwa selo yandi yole, banete zo kuna ntwal’a Ngekazi. 24  Vava kalweke kuna Ofele,* obongele zo vana moko mau, osidi zo muna nzo, ubasindikidi. Bele kwau, 25  okotele, otelamene vana vena mfumu andi. Elesa unyuvuidi vo: “E Ngekazi, akweyi otukidi?” Ovutwidi vo: “Ntaudi aku kele kuma ko.”+ 26  Elesa umvovese vo: “Nga ntim’ame kawele yaku ko vava muntu kakulumukini muna kalu kakika e? Nga yayi i ntangwa ya tambula palata yovo mvuatu yovo mpatu za olive yovo mpatu za vinyu yovo mameme yovo ngombe yovo ntaudi zamakala ye zamakento?+ 27  Owau, o wazi wa Namani+ ukulaminina ye mbongo aku yakwele mvu.” Vana vau, okatukidi vana kena yo wazi wampembe nze mvul’ampembe.+

Mvovo vana yand'a lukaya

Yovo “luvuluzu.”
Yovo “kimbevo kia nkand’a nitu kayelanga.”
Nanga i Namani.
E talanta mosi, yilo 34,2. Tala Nku. B14.
Yovo “uyivubidi.”
Mvovo wa sina: “nsambu za.”
Mvovo wa sina: “ndo yawonso.”
Mvovo wa sina: “ntelamene vana kena.”
Yovo “tempelo.”
Fulu kimosi kuna Samaria, kilenda kala mongo yovo yaka kiangolo.