Wantete wa Tusansu 29:1-30
29 Davidi wa Ntinu ovovese nkutakani yawonso vo: “O mwan’ame Solomo ona kasolele Nzambi,+ wakinu nleke, kazeye mambu mayingi ko,+ e salu kianene, kadi e tempelo* ke ya wantu ko, ya Yave wa Nzambi kaka.+
2 Mpangidi mawonso muna kubika yawonso ya nzo a Nzambi ame, wolo muna lekwa ya wolo, palata muna lekwa ya palata, nsongo muna lekwa ya nsongo, sengwa muna lekwa ya sengwa,+ mabaya+ muna lekwa ya mabaya, matadi ma onise, matadi ma lamika, matadi mankezimi, matadi mantalu ma mpila zawonso ye ulolo wa matadi mampembe.
3 Wau vo ngiangalele kikilu nzo a Nzambi ame,+ vena mpe ye lusalu+ lwa mono kibeni lwa wolo ye palata, mpene lo muna salu kia nzo a Nzambi ame, vana ntandu a lekwa yawonso nkubikidi mu kuma kia nzo avauka.
4 Mpene 3.000 ma talanta* za wolo wa Ofire,+ 7.000 ma talanta za palata yakenzwa, muna lenga e yaka ya nzo,
5 wolo muna lekwa ya wolo, palata muna lekwa ya palata ye salu yawonso isalwa kwa akwa umbangu. Owau, nani ozolele vana lukau kwa Yave kuna mvevo?”+
6 Muna kuma kiaki, akuluntu a nzo za mase, akuluntu a makanda ma Isaele, akuluntu a mafunda+ ye mfumu za nkama ye akengi a salu kia ntinu+ bavanini kuna mvevo.
7 Bavene muna salu kia nzo a Nzambi aludi: 5.000 ma talanta za wolo, 10.000 ma dareki,* 10.000 ma talanta za palata, 18.000 ma talanta za nsongo ye 100.000 ma sengwa.
8 Ana bakala ye matadi mantalu bavene mo muna lundilu dia nzo a Yave, vana moko ma Yekiele+ wa Ngeresone.+
9 O nkangu umwene kiese wau bavanini tukau twatu kuna mvevo, kadi bavanini tukau twa mvevo kwa Yave yo ntim’asikila,+ Davidi wa ntinu mpe omwene kiese kiayingi.
10 Davidi okembelele Yave vana meso ma nkutakani yawonso. Davidi ovovele vo: “Yambula wakembelwa yamu mvu ya mvu, e Yave wa Nzambi a Isaele wa se dieto.
11 O nene waku, e Yave, ye ngolo+ yo nkembo+ yo vienga yo zitu,*+ kadi yawonso ina koko zulu y’ova nza, yaku.+ Kiaku e kimfumu, e Yave.+ Watundalala se ntu kuna kwawonso.
12 O umvuama yo nkembo kwa ngeye watuka,+ ngeye oyalanga yawonso,+ e ngolo+ ye nkuma una vana koko kwaku,+ o koko kwaku kutundidika+ yo vana ngolo kw’awonso.+
13 Owau, e Nzambi eto, tuvutwidi matondo yo kembela nkumbu aku ambote.
14 “Omono i nani, nkangu ame se nki, twavana tukau twa mpila yayi kuna mvevo? Kadi e lekwa yawonso kwa ngeye itukidi, tuvene eyi itukidi vana koko kwaku.
15 Kadi tu nzenza kweto ova ndose aku, ku nsi yankaka twatuka nze mase meto mawonso.+ E lumbu yeto ova nza ina nga kini+—ke vena vuvu ko.
16 E Yave wa Nzambi eto, e lekwa yayi yawonso tukubidi muna tunga nzo mu kuma kia nkumbu aku avauka, vana koko kwaku itukidi, yawonso i yaku.
17 E Nzambi ame, nzeye wo vo ofimpanga ntima+ yo yangalela unsongi.*+ Muna unsongi wa ntim’ame mpanini yawonso yayi kuna mvevo, ngiangalele wau mbwene nkangu aku una vava bavene kwa ngeye tukau kuna mvevo.
18 E Yave wa Nzambi a mase meto, Abarayama yo Isaki yo Isaele, sadisa nkangu wau bakala kaka ye tima diadi, basadila ye nsi a ntima wawonso.+
19 Vana ntim’asikila+ kwa mwan’ame Solomo, kalunda nkanikinu miaku+ yo tuludiku ye mîna, kavanga mambu mama mawonso yo tunga tempelo* ina nkubikidi lekwa yayi.”+
20 Davidi ovovese nkutakani yawonso vo: “Owau nukembelela Yave wa Nzambi eno.” E nkutakani yawonso ikembelele Yave wa Nzambi a mase mau, bavumbamene yo fukama vana ntadisi a Yave yo ntinu.
21 E lumbu kialanda bakelele yimenga kwa Yave,+ batambikidi tukau twangioka kwa Yave: 1.000 dia wan’a ngombe a makoko, 1.000 dia mameme ma makoko, 1.000 dia wan’a mameme ye tukau twa ndua;+ bakelele ulolo wa yimenga muna Isaele yawonso.+
22 E lumbu kiakina, badidi, banuini ye kiese kiayingi vana vena Yave.+ Batumbikidi Solomo wa mwan’a Davidi se ntinu mu nkumbu anzole, bankusidi mazi vana vena Yave kakala se ntu,+ bakusidi mpe Sadoke mazi kimana kakala nganga.+
23 Solomo ovuende vana kunda kia kimfumu kia Yave,+ se ntinu vana fulu kia Davidi wa se diandi. Osikidi muna mawonso, Aneyisaele awonso banlemvokele.
24 Akuluntu awonso+ yo makesa mankuma+ ye wana awonso a Davidi wa Ntinu+ basakalele Solomo wa ntinu.
25 Yave otundidikidi kikilu Solomo vana meso ma Isaele yawonso, umvene o zitu wa kimfumu, una ke ukedi ye konso ntinu ko wavita muna Isaele.+
26 I ngiala kayala Davidi wa mwan’a Yisai muna Isaele yawonso,
27 mvu 40 i kolo* kayala muna Isaele. Mvu 7 kayala muna Keberone+ ye mvu 33 kayala muna Yerusaleme.+
28 Ofwidi muna ununu wafwana,+ ye zingu kia kiese* yo umvuama yo zitu; Solomo wa mwan’andi oyantikidi yala vana fulu kiandi.+
29 O lusansu lwa Davidi wa Ntinu, tuka kuna lubantiku yakuna mbaninu, lwasonama muna sono ya Samuele wa moni, ya Natani+ wa ngunza ye sono ya Ngadi wa moni,+
30 e sono yayi ivovelanga luyalu lwandi lwawonso, kikesa kiandi, mawonso mabwa muna Isaele muna tandu kiandi ye muna yimfumu yawonso yanzieta.
Mvovo vana yand'a lukaya
^ Yovo “lûmbu.”
^ Yovo “umfumu.”
^ Yovo “kwikizi.”
^ Yovo “lûmbu.”
^ Mvovo wa sina: “lumbu.”
^ Mvovo wa sina: “ye lumbu yafwana.”
