Wantete wa Samuele 30:1-31
30 Davidi yo wantu andi vava balweke kuna Sikelange+ muna lumbu kiantatu, Aneyamaleke+ bakotele kuna sude* ye Sikelange, batufakese Sikelange, bayokele yo.
2 Babakidi akento+ ye awonso ana bakala mo, tuka mbuta ye aleke. Ke bavondele mosi ko, kansi babanete, bele kwau.
3 Davidi yo wantu andi vava balweke muna mbanza, bamwene vo e mbanza iyokelo, akento au yo wan’au amakala ye amankento babakamene.
4 Davidi yo wantu bakala yandi babokomokene ye dilu yavana ke bakala diaka ye ngolo za dila ko.
5 Akento a Davidi yau awole babakamene mpe, Akinoame wa mwisi Yizerele ye Abingaile ona wakala nkaz’a Nabale wa mwisi Kamele.+
6 Davidi omwene kikilu ntantu, kadi wantu awonso* bakendalele mu kuma kia wan’au amakala ye amankento babakamene, dianu vo, bavovele vo bantuba matadi. Kansi, Davidi uyikumikini muna Yave wa Nzambi andi.+
7 I bosi, Davidi ovovese Abiata+ wa nganga, wa mwan’a Akimeleke, oku vo: “Dodokolo, twasa kidukula.”+ Abiata otwese kidukula kwa Davidi.
8 Davidi oyuvuidi Yave vo:+ “Nga mfwete lakama asanzi awaya? Nga ikubabak’e?” Umvutwidi vo: “Ubalakama, kadi baka okubabaka, ovuluza yau awonso banete.”+
9 Vana vau Davidi ye 600 za wantu+ ana bakala yandi, basimbidi e nzila. Vava balwaka vana Ndimb’a Beso, akaka basidi kuna nima.
10 Davidi ubalakamene ye 400 za wantu, kansi 200 za wantu basidi kuna nima, kadi bayoyele ke balendele sauka Ndimb’a Beso ko.+
11 Basolwele mwisi Engipito muna kiana, bantwese kwa Davidi. Bamvene madia ye maza kanua,
12 bamvene tini kia mbolo yasangwa bundu ya nsanda ye mbolo zole zasangwa uva. Vava kadidi, okumamene,* kadi kadia lekwa ko ngatu nua maza mu lumbu tatu, fuku yo mwini.
13 Davidi unyuvuidi vo: “Nani uvuidi? E nsi aku akweyi ina?” Ovutwidi vo: “I musi Engipito, i ntaudi a Nyamaleke, kansi mfumu ame unsisidi, kadi o zuzi yela yayelele.
14 Yeto twakotele kuna sude* a Akerete+ ye mvivu a Yuda kuna sude* a Kalebe+ yo yoka Sikelange.”
15 Davidi unyuvuidi vo: “Nga lenda kundwakisa kwa asanzi awaya?” Ovutwidi vo: “Avo odidi e ndofi muna Nzambi vo kukumponda ko ngatu kungiekola kwa mfumu ame, ikulwakisa kwa asanzi awaya.”
16 Ozevo, onete Davidi kuna kwakala Aneyamaleke ana bamwangane muna zunga kiawonso, badianga, nua yo kemba mu kuma kia sanzu diayingi basanzidi muna nsi ya Afelesetia ye muna nsi ya Yuda.
17 Davidi ubatufakese tuka muna mene-mene yamuna nkokela; ke vatayidi muntu ko,+ nanga 400 za wantu kaka ana batinini muna samo.
18 Davidi obakidi yawonso ina Aneyamaleke bakutumuna,+ Davidi ovulwizi akazi andi yau awole.
19 Ke vakondwa lekwa ko, ngatu muntu, tuka muna mbuta ye aleke. Bakutumwini wan’au amakala ye amankento ye sanzu diawonso;+ Davidi okutumwini yawonso yanatwa.
20 Davidi obongele mameme mawonso ye ngombe zawonso, o wantu andi babasidi kuna ntwal’a twelezi yau. Bavovele vo: “Ediadi i sanzu dia Davidi.”
21 I bosi, Davidi olweke kuna kwa 200 za wantu ana bayoya muna kunlanda yo sala kunima vana Ndimb’a Beso.+ Bavaikidi yo kwenda kika Davidi yo wantu ana bakala yandi. Davidi vava kabafinamene, ubayuvuidi o vimpi.
22 Kansi, wantu awonso ambi ye akondwa mfunu ana bayenda yo Davidi bavovele vo: “Wau vo ke bele yeto ko, ke tukubavana lekwa ko muna sanzu dina tukutumwini, konso muntu kabonga kaka nkaz’andi yo wan’andi, kenda kwandi.”
23 Davidi ovovele vo: “E mpangi zame, ke nuvangi wo ko muna lekwa katuvene o Yave. Kadi ututanini yo yekola asanzi ana batutelamene vana moko meto.+
24 Nani otambulwila dina nuvovele? E kunku kia muntu wele kuna vita betela kikala ye kunku kia ndiona osidi lunga-lunga salanganu.+ Yeno awonso nukayana e sanzu.”+
25 Tuka lumbu kiakina, Davidi okitwidi diambu diadi se nsiku ye nzengo muna Isaele yamu unu kiaki.
26 Davidi ovutukidi kuna Sikelange, otwikidi ndambu a sanzu kwa akuluntu a Yuda ana bakala akundi andi, ovovele vo: “Olwalu i lukau lweno muna sanzu dia mbeni za Yave.”
27 Otwikidi lo kw’awana bakala kuna Betele,+ kuna Ramote a Nengebe, kuna Yati,+
28 kuna Arowa, kuna Sifemote, kuna Esetemoa,+
29 kuna Rakale, muna mavata ma Aneyerakemele,+ muna mavata ma Anekene,+
30 kuna Korema,+ kuna Korasini, kuna Ataki,
31 kuna Keberone+ ye fulu yawonso ina Davidi kayendanga yo wantu andi.
Mvovo vana yand'a lukaya
^ Yovo “Nengebe.”
^ Yovo “mioyo mia nkangu wawonso.”
^ Mvovo wa sina: “moyo andi uvutulukidi.”
^ Yovo “Nengebe.”
^ Yovo “Nengebe.”
