Wantete wa Samuele 20:1-42
-
Yonatane osongele kwikizi kwa Davidi (1-42)
20 Davidi otinini tuka kuna Nayote muna Rama. Olweke kwa Yonatane, oyuvuidi vo: “Nkia diambu mpangidi?+ Nkia mbi mpangidi, nkia sumu nsumukini o se diaku kevavilanga moyo ame?”
2 Yonatane umvutwidi vo: “Ke dilendi vangama ko!+ Kufwa ko. Tala, o se diame ke vanga diambu dianene ko yovo diandwelo lembi dio kunzayisa. Ekuma o se diame kekunswekela diambu diadi? Ediadi ke dilendi vangama ko.”
3 Davidi odidi e ndofi, oku vo: “O se diaku otomene wo zaya vo mbweno e dienga va meso maku,+ olenda vova vo: ‘Diambote Yonatane kazayi wo ko, kalembi kendalala.’ Kieleka, ndidi e ndofi muna Yave wa Nzambi amoyo ye muna ngeye, lutambi lumosi kaka luna vana kati kwame yo lufwa.”+
4 Yonatane ovovese Davidi vo: “Ivanga konso diambu ovova.”*
5 Davidi ovovese Yonatane vo: “O mbazi e ngonde izangama,+ ngina ye ziku vo ntinu ovava vo yadia yandi vana meza; kansi, ungiambula ngienda kwame, yaswekama kuna kiana yamu lumbu kiatatu muna fuku.
6 Avo se diaku umpavidi, vova vo: ‘Davidi undombele o nswa kenda mu nzaki kuna mbanz’andi kuna Beteleme,+ kadi esi nzo andi yawonso kimenga kia mvu bekela.’+
7 Avo se diaku ovovele vo, ‘Ke diambu ko,’ selo kiaku okala yo luvuvamu. Kansi, avo ofwemene, disongele vo mbi kazolele kumpanga.
8 Songa walakazi kwa selo kiaku,+ kadi okangidi kangu ye selo kiaku vana ndose a Yave.+ Kansi, avo ngielele ngina yau,+ umponda ngeye kibeni. Ekuma okungiekolwela kwa se diaku?”
9 Yonatane ovovele vo: “Kuvovi diambu dia mpila yayi ko! Avo ngwidi vo se diame mbi kakanini kuvanga, ikulukisa.”+
10 Davidi ovovese Yonatane vo: “Avo se diaku uvutulwidi kuna makasi, nani okunzayisa wo?”
11 Yonatane ovovese Davidi vo: “Twendi kuna kiana.” Yau nzole bele kuna kiana.
12 Yonatane ovovese Davidi vo: “Yambula Yave wa Nzambi a Isaele kakala mbangi, mbazi muna ola yayi yovo muna lumbu kiatatu, ifimpa se diame. Avo diambote kevova mu kuma kiaku,* ikutwikila nsangu wazaya dio.
13 Kansi, avo se diame mbi kakanini kuvanga, yambula Yave kavanga wo kwa Yonatane yo sakisa wo vanga, avo kikuzayisa wo ko yo kusindika kuna luvuvamu. Yambula Yave kakala yaku+ wauna kakadila yo se diame.+
14 Kunsongi kaka walakazi wa Yave ko wau ngina moyo, kansi unsonga o walakazi kana nkutu vo mfwidi.+
15 Kukatula walakazi waku muna nzo ame ko,+ kana nkutu Yave ofukisi mbeni zawonso za Davidi va ntoto.”
16 Yonatane okangidi kangu ye nzo a Davidi, ovovele vo: “Yave otumba mbeni za Davidi.”
17 Yonatane odisisi diaka Davidi e ndofi mu kuma kia mpila kanzolelanga, kadi wanzolanga nze yandi kibeni.+
18 Yonatane ovovele vo: “O mbazi e ngonde izangama,+ wantu bezaya wo vo kuna ko, kadi e kunda kiaku nkatu kikala.
19 Vava kivioka lumbu tatu, ditoma zayakana vo kuna ko, wenda kuna fulu kina waswekamena muna lumbu kiankaka,* kala vana ndambu a tadi diadi.
20 Se yatuba nzanza tatu vana ndambu a tadi diadina nze mono nzolele nonga lekwa.
21 Se yatuma selo kiame, ikumvovesa vo: ‘Wenda vavi e nzanza.’ Avo mpovese ntaudi vo: ‘E nzanza zina oku ndambu yayi, bonga zo,’ ozevo, olenda vutuka kwaku, kadi ndidi e ndofi muna Yave wa Nzambi amoyo vo luvuvamu luna kwa ngeye, ke vonza ko.
22 Kansi, avo mpovese kwa nleke vo, ‘E nzanza zilutakene,’ ozevo, nda kwaku, kadi Yave usindikidi.
23 Muna kuma kia nsilu tusilane,+ yambula Yave kakala ova twina, ngeye yo mono yakwele mvu.”+
24 Davidi oswekamene kuna kiana. Vava kiazangama e ngonde, ntinu ovuende vana kunda muna dia.+
25 O ntinu ovuende vana kunda kiandi vana ndambu a yaka nze muna ntangwa zankaka. Yonatane ovuende mantalani yo ntinu, Abene+ ovuende vana ndambu a Saulu, kansi e kunda kia Davidi kiankatu kiakala.
26 Saulu kavovele diambu ko e lumbu kiakina, kadi obenze vo: ‘Davidi diambu dimbwididi, kavelele ko.+ Elo, mvindu kena.’
27 Muna lumbu kiazole kia nzangam’a ngonde, e kunda kia Davidi kiankatu kaka kiakala. Ozevo, Saulu oyuvuidi mwan’andi Yonatane vo: “Ekuma mwan’a Yisai+ kezidi dila ko o zono yo unu?”
28 Yonatane ovovese Saulu vo: “Davidi wandombele nswa kenda kuna Beteleme.+
29 Wampovesa vo, ‘Ungiambula ngienda, do, kadi esi nzo eto kimenga betambika muna mbanza, mpangi ame mpe unkanikini vo yakala kuna. Ozevo, avo mbweno e dienga vana meso maku, ungiambula dodokolo, ngienda tala mpangi zame.’ I dianu kalembele kwizila ku meza ma ntinu.”
30 Saulu ofungidi Yonatane makasi, umvovese vo: “E mwan’a nkento a nkolami, nga obenze vo kizeye wo ko vo wasolele kala kuna sambu dia mwan’a Yisai muna nsoni zaku ye nsoni za ngudi aku e?*
31 Ekolo mwan’a Yisai kena moyo ova ntoto, ongeye ye kintinu kiaku ke kisikila ko.+ Ozevo, untumisa, untwasila yandi, kadi kafwete fwa.”*+
32 Yonatane ovovese se diandi Saulu vo: “Ekuma kafwete vondelwa?+ Nkia diambu kavangidi?”
33 Saulu untubidi e dionga kantobola,+ Yonatane omwene vo se diandi una kikilu ye kani dia vonda Davidi.+
34 Yonatane okatukidi vana meza yo makasi mayingi, kadia madia ko muna lumbu kiazole kia nzangam’a ngonde, kadi wakendalala kikilu muna diambu dia Davidi+ ye nsoni kamweswa kwa se diandi.
35 Muna lumbu kialanda muna mene-mene, Yonatane onete selo kiandi kuna kiana, wele wanana yo Davidi.+
36 Ovovese selo kiandi vo: “Dodokolo, tikuna wavava nzanza zina ituba.” E selo wele ntinu, Yonatane otubidi nzanza, inlutakene.
37 Vava selo kalweke vana fulu kibwididi e nzanza, Yonatane obokele selo kiandi, oku vo: “E nzanza ke ilutakene ko e?”
38 Yonatane obokele selo kiandi vo: “Zabuka, nda nswalu! Kuzingidi ko!” Ozevo, selo kia Yonatane ononene nzanza, ovutukidi kwa mfumu andi.
39 Selo kazaya diambu ko; Yonatane kaka yo Davidi bazaya nsas’a diambu diadi.
40 I bosi, Yonatane ovene nuaninua yandi kwa selo, umvovese vo: “Wenda, nata yo kuna mbanza.”
41 Vava selo kayenda, Davidi otelamene vana fulu kakala kuna ndambu a sude, ovumbamene nkumbu tatu, bafibane yo dila, kansi Davidi osakisi dila.
42 Yonatane ovovese Davidi vo: “Wendela kuna luvuvamu, kadi yeto awole twadia ndofi+ muna nkumbu a Yave, oku vo: ‘Yambula Yave kakala vava twina, mono yo ngeye, vana vena mbongo aku ye mbongo ame yakwele mvu.’”+
I bosi, Davidi otelamene, wele kwandi, Yonatane ovutukidi muna mbanza.
Mvovo vana yand'a lukaya
^ Yovo “konso edi divova moyo aku.”
^ Mvovo wa sina: “Davidi.”
^ Mvovo wa sina: “lumbu kia salu.”
^ Mvovo wa sina: “muna nsoni za kimpene kia ngudi aku.”
^ Mvovo wa sina: “kadi mwan’a lufwa.”
