Tala mambu

Tala ntu mia mambu

Nga Olenda Bunda e Vuvu Muna Dibundu mu Diambu Ditadidi Vita?

Nga Olenda Bunda e Vuvu Muna Dibundu mu Diambu Ditadidi Vita?

Alberto, wasala e salu kia kisoladi tezo kia mvu kumi, wasungamena vo: “O mfumu eto a makesa watusambula yo kutuvovesa vo: ‘Nzambi una yeno.’ Yakiyuvula: ‘Wantu ikwenda vonda kansi, Nkand’a Nzambi uvovanga vo ‘kuvondi ko.’”

Ray, salu kia kisoladi kasalanga vava vabwa Vit’Anzole ya Nz’Amvimba. Lumbu kimosi wayuvula mfumu andi a makesa: “Okotele mu nzaza yo samba kimana makesa meto basunda. Nga ke diau adimosi ko bavangidi e mbeni zeto?” O mfumu a makesa wavutula vo, o Mfumu mu mpil’esivi kesadilanga.

Avo mvutu zazi ke ziyangidikidi ko, zaya wo vo kuna ngeye mosi ko.

O NKAND’A NZAMBI ADIEYI ULONGANGA?

Yesu wavova vo umosi muna nkanikinu mia Nzambi i ‘zola nkw’aku nze una kuyizolelanga.’ (Maku 12:31) Nga Yesu wasia mwingilu vo twasonga zola kwa mfinangani zeto mun’owu wa fulu bezingilanga ngatu nsi au? Ve. Yesu wavovesa alongoki andi vo: “Muna wau i bezayil’o wantu awonso vo nu alongoki ame, ovo nzolani nuna yau.” (Yoane 13:34, 35) O zola kwaku i sinsu kiadi kubaswaswanesa y’akaka. Vana fulu kia vonda akaka, badi yekola mioyo miau mu kuma kia muntu yo nkw’andi.

Akristu a tandu kiantete, ngwizani bazingilanga ye mvovo mia Yesu. O nkanda Enciclopédia da Religião wavova vo: “Tertuliano yo Orígenes a mfumu zantete za dibundu bavova vo, Akristu a tandu kiantete ke bavondanga wantu ko, muna kuma kiaki ke bayisianga mu buka kia makesa ma Roma ko.”

MBANGI ZA YAVE ADIEYI BEVANGANGA?

Wau vo Mbangi za Yave bezingilanga mu nsi zawonso, akaka muna yau bezingilanga vana vena buka yole inwananga e vita. Kana una vo i wau, besianga ngolo mu kwamanana songa zola kwa muntu yo nkw’andi.

Nga afidi a mabundu belonganga zola kwa kieleka kwa Kikristu?

Muna bonga e nona, vava kanda dia Hutu ye Tutsi banwananga vita kuna Rwanda muna mvu wa 1994, Mbangi za Yave ke bakota mu vita yayina ko. Nkumbu miayingi, Mbangi za Yave basianga mioyo miau mu vonza muna sweka Mbangi za Yave za kanda diakaka. Vava Mbangi zole za Yave za kanda dia Hutu bakangwa mu kuma kia sweka mpangi zau za kanda dia Tutsi, makesa ma Interahamwe babavovesa vo: “Wau vo nutinisi esi kanda dia Tutsi, vondwa nuvondwa.” Diankenda kikilu vo Mbangi zole zazina za Yave za kanda dia Hutu bavondwa vana vau.—Yoane 15:13.

Adieyi obenze: O mavangu ma Mbangi za Yave nga ngwizani mena ye mvovo mia Yesu mu diambu diasonga nzol’amvevo kwa muntu yo nkw’andi?