Tala mambu

Tala ntu mia mambu

Nga Olenda Bunda e Vuvu Muna Dibundu mu Diambu Ditadidi Fu Yambote?

Nga Olenda Bunda e Vuvu Muna Dibundu mu Diambu Ditadidi Fu Yambote?

Ndumba mosi oyikilwanga vo Sylvia ona osalanga salu kia wuka wavova vo: “Vava yakala muna faculdade yatanganga kumosi yo wantu bavovanga vo yau mpe minkwikizi, kansi bayiyanga muna kizame yo nua fomo zangolo. Ke bazingilanga ngwizani ko ye nkanikinu mia mabundu mau.”

Yakala dimosi oyikilwanga vo Lionel wavova vo: “Akw’ame a salu vuna bevunanga, bebokelanga mfumu a salu muna telefone yo vuna vo yela beyela. Kana una vo minkwikizi, ke bezingilanga ngwizani ko ye nkanikinu mia mabundu mau.”

Mabundu ke melendanga sadisa wantu ayingi ko mu soba e fu yau. Ndonga ‘bena ye nsunsu a vumina Nzambi’ kansi ‘o vumi wau wakondwa nkuma.’ (2 Timoteo 3:5) Mfunu zau za mabundu ke besonganga mbandu ambote ko ngatu vana luludiku lwa Nkand’a Nzambi mu kuma kia fu yambote kwa mameme mau. Ke diasivi ko vo ndonga bekwikilanga vo Nzambi ke tokanenanga mpila zingu kiau ko.

ADIEYI NKAND’A NZAMBI ULONGANGA?

Nkand’a Nzambi uvovanga vo Nzambi omonanga ntantu ye kiese ye ovwanga mfunu mu mana tuvanganga. Vava Aneyisaele bakolamenanga Nzambi, ‘bamwesesanga e ntantu.’ (Nkunga 78:40) Kansi, ‘kiese kikalanga kun’ezulu’ vava muntu kevilukanga o ntima muna mavangu mandi mambi. (Luka 15:7) Vava muntu kezayanga fu yambote ya S’eto ezulu, o zola kwandi muna Nzambi kuwokelanga, e diadi dikumfilanga mu zola dina Nzambi kezolanga yo menga dina kemenganga.—Amose 5:15.

MBANGI ZA YAVE ADIEYI BEVANGANGA?

E zulunalu ya Deseret News of Salt Lake City, Utah, E.U.A, yavova vo: “Mbangi za Yave besadisanga wantu mu kala ye zingu kia nzo zasikila yo kala se nkangu usakalelanga luyalu. Nsiku mia Nzambi belemvokelanga. Bekwikilanga vo o nua fomo, kolwa malavu, nua diamba, tá mpanza, zumba ye vangu dia yakala olekanga yo yakala, mawonso mama mavangu mambi.”

Nga afidi a mabundu besadisanga mameme mau mu lemvokela nsiku mia nkal’ambote mia Nzambi?

Ozaya fu ya Nzambi, aweyi disadisilanga Mbangi za Yave? Sylvia ndiona oyikilu kala wavova vo: “Luvunu lutoma sadilwanga muna salu kia wuka. Ke diampasi ko muna vukumunwa mu fu kiaki. Kansi, ozaya una Yave * kebadikilanga luvunu, dikunsadisanga mu vanga edi dia unsongi. Ngina ye kiese yo luvuvamu lwa ntima.” Sylvia una ye ziku vo ozingila ngwizani ye malongi ma dibundu diandi, ditomesanga zingu kiandi.

^ tini. 9 Yave, i nkumbu a Nzambi nze una yasengomonwa muna Nkand’a Nzambi.