Ngapi omu no kara kaume kaKarunga?

PLAY

Eyi za uyunga ko Bibeli

Ove kuvhura o kare kaume kaKarunga pokulironga kumuhamena ntani nokurugana eyi ayi mu hafesa. Makura Karunga nga ‘ku hedera pepi.’ (Jakopo 4:8) Bibeli kuuyunga asi ‘age kapi ga kara ure nose natuvenye.’—Yirugana 17:27.

Eyi natu rugana yipo tu dive Karunga

Resa Bibeli

Bibeli kutanta asi: “Nayinye eyi va tjanga moMatjangwa gokupongoka kwa tunda kwaKarunga.”—2 Timoteusa 3:16.
Kutanta asi: Karunga yige ga retesa po Bibeli. Age kwa geve magano kwava va tjenge Bibeli. Kupitira moBibeli, Karunga ga tu tantera omu ana tu harere tu paruke. Ntani age ga tu horwera yikara yendi, kukwatera mo eharo nouhungami ntani nonkenda.—Exodus 34:6; Deuteronomium 32:4.
Eyi no rugana: Resa Bibeli nkenye ezuva. (Josuwa 1:8) Gazadara ko kweyi ono resa, nokulipura asi: ‘Yisinke yina kuronga nge eyi kuhamena Karunga?’—Mapisarome 77:12.

Pasihonena, resa Jeremiya 29:11, makura lipura asi: ‘Yisinke ana harere nge Karunga, erago ndi simpagwa? Age Karunga ogu a tengwida kuwoko ndi kwa harera nge meho zongwa?’

Teda ko kounsitwe

Bibeli kutanta asi: “Yeeyi yikara yendi eyi ayi dili kumoneka, ngwendi nonkondo dendi ntani asi age yige Karunga, kuyimonenena moyininke eyi ga sita kutunda ketameko lyouzuni, ngayi va limbe kulipopera.”—Varoma 1:20.
Kutanta asi: Eyi ga sita Karunga kuhorora yikara yendi, ngwendi moomu sirugana sokufanaika a si horora mufaneki gwaso ndi ehina ali horora ogu ga lipangera. Pasihonena, monkedi omu au rugana uruvi womuntu kulikida unongo waKarunga, ano monkedi omu Karunga ga sita ezuva nonombungururu kulikida nonkondo dendi.—Mapisarome 104:24; Jesaya 40:26.
Eyi no rugana: Litulira po siruwo yipo o tede ko kwanayinye eyi ga sita Karunga. Makura lipura asi: ‘Yisinke au horora unsitwe kuhamena Karunga? a Yosili, unsitwe kapi tau vhuru kututantera nayinye kuhamena Musiti gwetu. Eyi yiyo Karunga ga tu pera Bibeli.

Ruganesa edina lyaKarunga

Bibeli kutanta asi: “Ame kwa hara kupopera ava va diva nge (ndi ava va diva edina lyange). Nsene va kuga nge, tani va zuvhu.”—Mapisarome 91:14, 15.
Kutanta asi: Karunga gedina Jehova kupurakena kovantu ava va diva edina lyendi ntani nokuliruganesa. b (Mapisarome 83:18; Marakiya 3:16) Karunga ga lidivisa mwene kwetu, pokututantera edina lyendi. Age kwa tanta asi: “Ame nyame Jehova, olyo yilyo edina lyange.”—Jesaya 42:8, NW.
Eyi no rugana: Ruganesa edina Jehova nsene kuna kukanderera kwendi.

Uyunga naJehova kupitira mekanderero

Bibeli kutanta asi: “Age kwa kara pepi nava navenye ava mu zigida.”—Mapisarome 145:18.
Kutanta asi: Jehova kuhedera pepi nava ava kanderere kwendi nepuro. Ekanderero kuna kara ruha roukareli wetu, alyo kulikida omu twa fumadeka Karunga.
Eyi no rugana: Kanderera nkenye apa. (1 Vatesaronika 5:17) Mu tantera yinka yoge nomu ono kulizuvha.—Mapisarome 62:8. c

Tunga po epuro lyokupama mwaKarunga

Bibeli kutanta asi: “Nsene o dira kukara nepuro nokuvhura si kuhafesa Karunga.”—Vahebeli 11:6.
Kutanta asi: Mokuhedera Karunga pepi, twa hepa kupura mwendi. Bibeli kufaturura asi yinzi ya hamena mo mokukara nepuro kupitakana tupu kupura asi Karunga yipo ga kara. Ntani ayo kwa kwatera mo kuhuguvara mwendi nkenye apa, neyi ga tumbwidira ntani nomonompango dendi. Mokukara nelikwatakano nomuntu wa hepa kumuhuguvara.
Eyi no rugana: Epuro lyousili kutundilira kediwo. (Varoma 10:17) Yipo nye wa hepera kulironga Bibeli nokuyilikida asi ove wa huguvara mwaKarunga nomomavyukiso gendi. Nombangi daJehova nava ka yi hafera kulironga nove Bibeli. d

Rugana eyi nayi hafesa Karunga

Bibeli kutanta asi: “Nsene asi twa hara Karunga ngatu limburukwa koyipango yendi.”—1 Johanesa 5:3.
Kutanta asi: Jehova kuhedera pepi nava va mu hara ava ava rugana paapa va hulira mokusikisa mo yipango yendi.
Eyi no rugana: Moomu ono kulironga Bibeli, koneka eyi ga hara Karunga neyi ga nyenga. Lipura asi: ‘Marunduruko musinke na hepa kutura po yipo ni hafese Musiti gwange?’—1 Vatesaronika 4:1.

Nsene o sikisa mo mavyukiso gaKarunga nga ku pakera mbili

Bibeli kutanta asi: “Hetekeni mu tare asi HOMPA ngapi omu ga wapa.”—Mapisarome 34:8.
Kutanta asi: Karunga kuna kukuzigida o ya limonene omu ga wapa. Apa no limonena eharo nevatero lyendi, ngo hara kumuhedera pepi.
Eyi no rugana: Ngomu no resa Bibeli nokurugana eyi ga hara ove ngo gwanena mo mauwa. (Jesaya 48:17, 18) Ntani ngo limonena yihonena yovantu ava va funda po maudigu nokuwapukurura eparu lyawo neli lyepata lyawo ntani nokugwana ruhafo kupitira mevatero lyaKarunga. e

Magano gepuko aga va kara nago vantu kuhamena kudiva Karunga

Yipempa: Karunga nonkondo unene kapi tatu vhura kumuhedera pepi.

Usili: Karunga munankondo nadinye nye simpe kutuzigida tu mu hedere pepi. MoBibeli kwakara mo yihonena yovagara novakadi ava va kere vakaume vendi.—Yirugana 13:22; Jakopo 2:23.

Yipempa: Kapi tatu vhuru kudiva Karunga.

Usili: Morwa Karunga mpepo yininke yimwe kumuhamena udigu kuyikwata egano, nye simpe ose kuvhura kumudiva. Bibeli kuuyunga asi twa hepa kumudiva yipo tu ka gwane mwenyo gwanarunye. (Johanesa 17:3) Bibeli kututantera kuhamena musiti gwetu noku tu vatera tu dive yikara yendi nositambo sendi kevhu ntani nonompango dendi. (Jesaya 45:18, 19; 1 Timoteusa 2:4) Bibeli hena za horora edina lyaKarunga. (Mapisarome 83:18) Ose kuvhura kudiva Karunga nokumuhedera pepi.—Jakopo 4:8.

a Pasihonena, tara yirongwa “Kwa si sita ndi?” yipo o mone omu unsitwe wa horora unongo waKarunga.

b Sinzi sovantu kwapura asi edina Jehova kutanta asi “Kuninka yikare po.” Karunga nga sikisa mo sitambo sendi nomatumbwidiro gendi, age kwayilikida eyi pokutuhorwera edina lyendi.

c Tara sirongwa “Morwasinke nani kanderera? Karunga nga limburura nge ndi?”

d Komauzera gomanzi tarera vidiyo Ngapi ava rugana elirongo lyoBibeli?

e Tara ruha “Bibeli kurundurura eparu lyovantu.”