Zende koyikaramo

Nombangi daJehova

Horowora eraka Rukwangali

Bibeli New World Translation kwa vyuka ndi?

Bibeli New World Translation kwa vyuka ndi?

Ruha rokuhova roNew World Translation kwa ru pwagesere mo-1950. Kutunda opo, vantu kwa lipura nsene asi Bibeli zoNew World Translation * kwa vyuka morwa kwa lisiga nomatoroko goNobibeli dapeke pomavega gamwe. Malisigo ogo kwa karera po morwa nokonda dina kukwama ko.

  • Kuzihuguvara. Bibeli zoNew World Translation kwa ruganesa mauzera gomape ntani nomatjango ganare gokuvhura kuhuguvara. Mokulisiga, Bibeli zoKing James Version zomomvhura 1611 kwa ruganesere matjango aga ga dilire kuvyuka nawa-nawa ntani kapi va ruganesere matjango ganare ngwendi aga va ruganesa mokutoroka New World Translation.

  • Usili. Bibeli zoNew World Translation kwa hetekera ko kugava mbudi zousili ezi ga retesa po Karunga. (2 Timoteusa 3:16) Matoroko gomanzi goNobibeli kwa tokora mokukwama nompo dovantu mevango lyokugava mbudi zaKarunga zousili, pasihonena awo kwa pinganesera po edina lyaKarunga Jehova noyitumbwisiso ngwendi Hompa ndi Karunga.

  • Etoroko lyokuvyukilira. Mokulisiga nomatoroko gamwe aga aga kama yihorokwa yomoBibeli, New World Translation kwa toroka nonkango nadinye monkedi zokuvyukilira, zokuzera ntani zoureru kukwata egano ngwendi moomu va yi tjenge meraka lyokuhova va tjenge Bibeli. Momatoroko aga ga kama yihorokwa yomoBibeli kwa tura mo magano govantu ndi nampo kwa gusa mo magano gomulyo.

Malisigo pokatji koBibeli New World Translation nomatoroko gapeke

Nobuke va gweda mo. MoNobibeli dawo, Vakatolika nongereka zaOrthodox kwa gwederera ko nobuke dimwe edi ava tumbura vamwe asi Apocrypha. Nye nobuke odo kapi va di tambwire momatjango goVajuda, ntani Bibeli kwa uyunga asi Vajuda yiwo “va huguvarera nonkango daKarunga.” (Varoma 3: 1, 2) Bibeli New World Translation ntani nomatoroko gamwe goBibeli gomosiruwo setu kapi va gwederera mo nobuke edi.

Novelise va gweda mo. Matoroko gamwe kwa gwederera mo novelise nonontanto edi da dira kumoneka momatjango goBibeli ganare, nye moBibeli New World Translation kapi va di tura mo. Sinzi somatoroko gantaantani kapi aga gwederere mo novelise edi ndi va nongonona asi kapi va gwana novelise odo momatjango gapeke. *

Omu va ruganesa nonkango. Poyiruwo yimwe, kutoroka tunda nkango zende nkango kugava mbudi zepuko ndi va dire kuzikwata egano. Pasihonena, nonkango daJesus domwaMateusa 5:3 kuditoroka asi: “Vanerago vaava ava hepa pampepo.” (English Standard Version; King James Version; New International Version) Etoroko lyangoso kapi ali zerere vantu wovanzi, ano vamwe kugazara asi Jesus kwa nkondopekere mulyo gokulinunupika ndi goruhepo. Nye, Jesus kwa tembe asi ruhafo rousili kurugwana mokudimburura asi twa hepa mavyukiso gaKarunga. Yipo nye, Bibeli New World Translation kwa toroka ntanto ozo asi “vaava va dimburura asi vana hepa Karunga.”Mateusa 5:3. *

Makumbururo gomawa kuhamena Bibeli New World Translation gokutunda kovalirongi va hana asi Nombangi daJehova

  • Mombilive zo-8 Sindimba 1950, mutoroki goBibeli Edgar J. Goodspeed kwa tjenge kuhamena Bibeli New World Translation of the Christian Greek Scriptures asi: “Ame kwa hafera sirugana sosiwa sovantu veni, aso kwa lihanena mouzuni mudima, ntani na hafera umanguruki wawo wokuruganesa nonkango dokuvyuka ntani dononkondo metoroko lyawo. Awo kwa horowora nonkango donongwa dokuwapera mokulironga.”

    Edgar J. Goodspeed

  • Profesora Allen Wikgren gokounivesiti zaChicago kwa tumbura asi New World Translation kwa ruganesa eraka eli vana kuruganesa vantu naina mevango lyokutemwinina matoroko gamwe, ntani wovanzi “kuzihafera kuziresa nampili pwavelike.”The Interpreter’s Bible, Volume I, epenuno 99.

  • Mokukumburura ko kuhamena Bibeli New World Translation of the Christian Greek Scriptures, mupatanesi goBibeli goMubritania Alexander Thomson kwa tente asi: “Etoroko lyeni kuna kara sirugana sovalirongi woudivi nonondunge, ava va kondjere mokutoroka etanto lyouhunga lyemeraka lyoRugereka ngamoomu tupu ya wapera kuyitoroka moRuingilisa.”The Differentiator, Kudumogona 1952, epenuno 52.

  • Kugusa ko omu ga lizuvhire kuhamena etoroko lyononkango dimwe, mutjangi Charles Francis Potter kwa tente asi: “Nampili ngomu na dira kuvadiva ava vatoroki, awo kwa toroka matjango gomawa po goRugereka naga goRuhebeli, pokuruganesa udivi ntani nondunge dawo monaruwa.”The Faiths Men Live By, epenuno 300.

  • Nampili ngomu ga lizuvhire asi Bibeli New World Translation kwa likarera ntani alyo kuna kara etoroko lyewa po, Robert M. McCoy kwa tjenge asi: “Etoroko lyEtestamende lyepe kuna kara umbangi wokulikida asi valirongi wokuwapera [Nombangi daJehova] kwa ruganesere nondunge mokukohonona po maudigu gomanzi gemetoroko lyoBibeli.”Andover Newton Quarterly, Murongagona 1963, epenuno 31.

  • Profesora S. MacLean Gilmour, nampili ngomu ga dira kukwatesa ko yimwe ya kara moBibeli New World Translation, simpe ga dimburura asi ava va zi toroka “kwa hetekerere ko kuhonena Rugereka.”Andover Newton Quarterly, Sitarara 1966, epenuno 26.

  • Pokuresa Bibeli New World Translation ezi va toroka morupe roBibeli Kingdom Interlinear Translation of the Greek Scriptures, profesora Thomas N. Winter kwa tjenge asi: “Etoroko lyokomitiye ezi zokudira kudivikwa kwa liza nomatjango gomape ntani kwa vyuka.”The Classical Journal, Kudumogona-Kudumonkuru 1974, epenuno 376.

  • Mo-1989 profesora Benjamin Kedar, ogu ga kere mulirongi goMuhebeli moIsraeli, kwa tjenge asi: “Mokuhetakanesa Bibeli zoRuhebeli nomatoroko goNobibeli doRuingilisa, ame nkenye apa kuruganesa etjangururo eli ava tumbura asi New World Translation. Pokurugana ngoso, ame na yi dimburura asi vatoroki kwa litulire mo unene yipo va kwate egano matjangwa nokugatoroka kuvyukilira.”

  • Konyima zokukonakona matoroko ntane goRuingilisa, profesora Jason David BeDuhn ogu ga lironga kuhamena ukarelikarunga kwa tjenge asi: “Bibeli NW [New World Translation] kumoneka asi alyo etoroko lyokuvyuka pokulihetakanesa nomatoroko gapeke.” Nampili ngomu sinzi sovantu ntani novalirongi wovanzi woBibeli va uyunga asi Bibeli zoNew World Translation kwa lisiga kononkawo morwa awo kuna kara ukarelikarunga wa lisiga komakwawo, profesora BeDuhn kwa tanta asi: “Elisigo eli kwa karera po morwa vatoroki ava kwa toroka kuvyukilira nonkango domomatjango gokuhova gEtestamende Lyepe.”Truth in Translation, epenuno 163, 165.

^ para. 2 Makumbururo ogo kwa tamba kenduruko lyoNew World Translation lyanare komeho zeli lyomo-2013.

^ para. 8 Pasihonena, tara Bibeli New International Version ntani New Jerusalem Bible zoVakatolika. Novelise edi va gwederera mo kuna kara Mateusa 17:21; 18:11; 23:14; Marukusa 7: 16; 9: 44, 46; 11:26; 15:28; Rukasa 17:36; 23:17; Johanesa 5:4; Yirugana 8: 37; 15:34; 24:7; 28:29; ntani Varoma 16:24. Bibeli King James Version ntani Douay-Rheims Version kwa gwederera mo ntanto zokuhamena Mutatu-gumwe mwa-1 Johanesa 5: 7, 8, azo kwa zi gwederere ko konyima zonomvhura mafere kutunda apa va mene kutjanga Bibeli.

^ para. 9 Mokulifana, etoroko lya-J. B. Phillips kwa toroka nonkango daJesus asi “vaava va diva asi va hepa Karunga,” ntani Bibeli The Translator’s New Testament kwa ruganesa ntanto ezi asi “vaava va diva yihepwa yawo yopampepo.”