Ose kuhetekera ko kutekura vantu navenye neharo, nombili ntani nefumadeko. Nsene gumwe goNombangi daJehova a tengura monyima ntani a hageka kukarera Jehova, ose kumukorangeda, a kumutantera asi twa mu hara ntani kuhetekera ko kumuvatera yipo a hedere pepi naKarunga.—Rukasa 15:4-7.

 Momaukaro gamwe, muntu kurugana yininke eyi nayi mu ninkisa va mu guse mombungakriste. (1 Vakolinte 5:13) Nye morwa twa hara vapuli vakwetu, ose kuhetekera ko kuvatera muntu ogo komeho va ka mu guse mombungakriste. Nampili va mu guse mombungakriste, ose simpe kumulikida eharo ntani kumufumadeka, ngwendi moomu azi tu korangeda Bibeli tu rugane.—Marukusa 12:31; 1 Peturusa 2:17.

Yisinke ayi ninkisa muntu dogoro va mu guse mombungakriste?

 Bibeli za vyukilira kuuyunga asi nsene mukriste ana tura nzo zonene ntani kapi ana hara kulitezurura, va hepa kumugusa mo mombungakriste. b (1 Vakolinte 5:11-13) Bibeli kulikida nonzo edi nadi ninkisa muntu dogoro va mu guse mombungakriste. Pasihonena, azo kutumbura yinke ngwendi, ruhonda, unkorwe, kudipaga, nyanya ntani widi.—1 Vakolinte 6:9, 10; Vagarata 5:19-21; 1 Timoteusa 1:9, 10.

 Nampili ngoso, muntu ogu ana tura nzo zonene kapi ava mu gusa mombungakriste poopo. Pomuhowo vakuronambunga c kumuvatera a tjindje nkareso zendi. (Varoma 2:4) Awo kuhetekera ko kuguma mutjima gwendi pokumutekura nombili ntani nonkenda (Vagarata 6:1) Nkedi ezi kuvatera muntu ogu ana tura nzo zonene a dimburure epuko lyendi nokulitezurura. (2 Timoteusa 2:24-26) Nye nsene a twikira kurugana yininke eyi azi tanta Bibeli asi epuko ntani nokudira kulitezurura nampili ngomu vakuronambunga va hetekera ko kumuvatera, age va hepa kumugusa mo mombungakriste. Vakuronambunga kudivisa mombungakriste asi muntu ogo kapi ana kara gumwe goNombangi daJehova hena.

 Yitundwamo yoyiwa musinke ayi kara nsene va gusa mombungakriste muntu ogu a twikire kuzona? Yitundwamo yimwe kuna kara asi mbungakriste kukwatesa ko nompango daKarunga kuhamena kukuhuka pamukaro ntani kuzipopera konkareso zondona zomuntu ogo. (1 Vakolinte 5:6; 15:33; 1 Peturusa 1:16) Kugusa ko oyo, muntu ogu ana zono kuvhura yi mu vatere a hageke kuzona nokutura po malitjindjo.—Vahebeli 12:11.

Ngapi omu Nombangi daJehova adi tekura vantu ava va gusa mombungakriste?

 Bibeli kutantera Vakriste asi “hagekeni kulikwatakana nage” muntu ogu va gusa mombungakriste, “nampili kulya noku lya si nage.” (1 Vakolinte 5:11) Yipo nye, ose kapi atu kara nomuntu ogu va gusa mombungakriste. Nye ose kapi atu mu sigilire. Ose kumutekura nefumadeko. Age kuvhura kuwiza komapongo getu gosikriste, oku nava vhura kukamumorora Nombangi daJehova. d Age hena kuvhura kuhundira vakuronambunga va mu vatere yipo a tengure kwaJehova.

 Nye ngapi nsene ogu va gusa mombungakriste mulikwali gwendi ntani vana vendi simpe Nombangi daJehova? Nampili ngomu a dili kukarera Jehova kumwe nepata lyendi, age simpe kutwikira kukara nelikwatakano nava vemepata. Mokumona asi awo kwa tunga membo limwe, elikwatakano lyawo lyemepata kutwikira ntani simpe kurugana kumwe nokulilikida eharo.

 Muntu ogu va gusa mombunga kuvhura kuhundira vakuronambunga va ka mu dingure awo ngava mu pukurura pokuruganesa Bibeli nokumuhengagwida ntani nokumukorangeda yipo a litezurure nokutengura kwaKarunga. (Sakaliya 1:3) Nsene a hageka kuzona nokulikida asi a litezurura pokuparuka kuliza nonompango domoBibeli, age kuvhura a tengure hena mombungakriste. Mbungakriste ngazi mu ‘gusira po nomutjima nagunye nokumuhengagwida,’ ngwendi moomu va yi rugene Vakriste womoKolinte apa ga hagekere kuzona muntu ogu ga tulire nzo zonene.—2 Vakolinte 2:6-8.

Ngapi omu vana kulizuvha vantu ava va gusire mombungakriste?

 Koneka eyi da uyunga ko Nombangi daJehova dimwe edi va gusire mombungakriste, ano konyima awo kwa tokwere kutengura kwaKarunga.

 “Apa na tokwere kutengura mombungakriste, ame kwa gazarere asi vakuronambunga ngava pura nge yininke nayinye eyi na rugene nomvhura dononzi kutunda apa va gusire nge mombungakriste. Nye mevango lyoyo, awo kwa tente asi: ‘Ose tuna hara o demenene koyininke eyi no vhura kurugana ngesi’ Apa va uyungire yininke oyo, ame kwa lizuvhire epwizumuko.”—Maria, United States.

 “Mbungakriste kwa hefe apa na tengwire. Ame kwa lizuvhire asi name mulyo. Vanavazinyetu kwa vaterere nge ni lizuvhe asi Jehova ntani nawo va gusira nge po ntani ni twikire kuza komeho. Vakuronambunga nawo kwa vaterere nge yipo ni tengwidire po elikwatakano lyange naJehova. Awo kwa hengagwidire nge ntani kwa vaterere nge ni dimburure asi Jehova kutara nge asi ame simpe mulyo kwendi ntani ga hara nge.”—Malcom, Sierra Leone.

 “Ame nina hafa asi Jehova ga hara vantu vendi ntani kudivilisa asi mbunga zendi za zere. Nampili ngomu vantu ava ava dili kuyikwata egano ava gazara asi aso sininke sosidona kugusa muntu mombungakriste, nye kugusa mombungakriste kuna kara nkedi zeharo. Ame kupandura unene Karunga Guhyetu gemeguru ogu ga tu hara ntani ogu atu gusire po.”—Sandi, United States.