Nombangi daJehova kwa ruganesa Nobibeli dokulisiga-siga melirongo lyawo lyoBibeli. Momaraka omu za kara Bibeli zoNew World Translation of the Holy Scriptures, ose kuhafera kuziruganesa morwa azo kuruganesa edina lyaKarunga, azo hena kwa vyuka, ntani ureru mokuzikwata egano.

•   Eruganeso lyedina lyaKarunga. Vamwe ava va pwagesa Nobibeli kapi va ruganesa edina lyaKarunga apa lyawapera. Pasihonena, Bibeli zimwe kwa tumbura madina govantu wokusika po-70 ava va lihamekere mepwageso lyazo. Nye moBibeli ozo va tura mo edina lyoMutjangi gwazo, Jehova Karunga!

   Mokulisiga, moBibeli zoNew World Translation kwa tura edina lyaKarunga pomavango nagenye apa lya monekere momatjango va hovere kuzitjanga, nye madina govantu ava va zi pwagesa kapi va ga tumbura mo.

•   Kwa vyuka. Kapisi matoroko nagenye aga gava efatururo lyokulifana neli lya kara meraka lyokuhova omu va tjenge Bibeli. Pasihonena, Bibeli zimwe kwa faturura Mateusa 7:13 asi: ‘Omu hwilire mevero lyenunu, yeeyi evero lyokutwara komundiro gwanarunye kwa ngwanyunuka ntani nzira ezi ureru kuzigenda.’ Nye meraka lyokuhova omu va tjenge Bibeli kwa ruganesa nkango ‘ezonauko’ kapisi ‘mundiro gwanarunye.’ Nampo vatoroki owo kwa ruganesere ‘mundiro gwanarunye’ morwa awo kwa pura asi vantu wovadona ngava ka va hepekera momundiro gwanarunye. Nye Bibeli kapi azi kwatesa ko egano olyo. Nye moBibeli zoNew World Translation kwa vyukilira kutanta asi: “Omu hwilire mevero lyenunu, yeeyi evero kwa nenepa, ano nzira kwa ngwanyunuka,ezi azi twara kezonauko.”

•   Ureru kuzikwata egano. Etoroko lyewa kapi tupu a li kara lyokuvyuka nye lya hepa hena kukara lyoureru kukwata egano. Tarurura sihonena esi. MoVaroma 12:11, mupositoli Paurusa kwa ruganesa ntanto ezi azi tamba ‘kompepo zokuvira.’ Mokumona asi ntanto ozo kapi azi tanta yuma moRuingilisa rwanaina, Bibeli zoNew World Translation kwa faturura etjangwa eli monkendi zoureru kukwata egano. Azo kutanta asi Vakriste va “hwame nompepo.”

 Bibeli zoNew World Translation kapi tupu za likarera morwa kuruganesa edina lyaKarunga, ntani morwa kwa vyuka ndi morwa ureru kuzikwata egano, nye azo kuzigavera mawoko-woko. Ngoyitundwamo, vantu wovanzi kuvhura kuziresa momaraka gawo​—nampili ava ava dili kuvhura kuranda Bibeli.