Zende koyikaramo

Zende koyikaramo

Nombangi daJehova

Horowora eraka Rukwangali

 VARESI TAVA PURA . . .

Morwasinke Krismesa za karera epuko?

Morwasinke Krismesa za karera epuko?

Krismesa kuna kara sipito esi ava gazara vantu asi sipito soVakriste sehampuruko lyaJesus. Nye nompo edi da hamena mo mosipito oso kapi da likwatakana nehampuruko lyaJesus.

Posiruwo soKrismesa, moyitora yoyinzi to ka gwana mo mafano gomugara ana hafa gononzwedu dononzera noyikoverero yoyigeha. Age kumutumbura asi Santa Claus. Pamwe to ka gwana ava ava rugana moyitora vana dwara mambare gomageha va mu honene. Efano lyogo mugara kwa ya divikwire apa kampani zimwe zomoAmerika zoyikunwa za rugene etjingiso posiruwo soKrismesa mo-1931. Munekuto Carlos E. Fantinati kwa tanta asi: “Mugara ogo kwa ya divikwa unene kupitakana Jesus nokukarera po sipito somoSindimba 25.” Olyo yilyo epuko lyelike lya kara po poKrismesa ndi? Mokugwana elimbururo tu tareni omu wa tamekere Ukriste.

Buke zimwe kwa tanta asi: “Posiruwo soVakriste wokuhova kwa nyokerere po kudana mahampuruko gankenye ogu kukwatera mo lyaJesus.” Morwasinke? Awo kwa tere yipito yehampuruko asi mpo zovapagani ezi va hepere kunyokera po. Ntani moBibeli kwato oku va tumbura ezuva lyehampuruko lyaJesus.—Encyclopedia Britannica

Nampili ngomu Vakriste wokuhova va kondjere kunyokera po nompo dokudana yipito yehampuruko nomvhura 300 konyima zonomfa daJesus, ngereka zaKatolika kwa tulisire po sipito soKrismesa. Mokuninka asi ngereka zi divikwe yipo va here kugusa po maukareli govapagani goVaroma noyipito yawo eyi ngava dana pokufu. Penne L. Restad kwa tjenge asi nkenye mvhura kutundilira mwaSindimba 17 dogoro Murongagona 1, “sinzi soVaroma ngava dana yipito nomaudano mokuzambera vakarunga vawo.” (Christmas in America) Ano mwaSindimba 25, Varoma yipo ngava dana sipito sehampuruko lyEzuva. Pokutulisa po Krismesa mezuva olyo, ngereka kwa zedagwilire Varoma wovanzi va dane ehampuruko lyaJesus mevango lyokudana ehampuruko lyezuva. Gerry Bowler kwa tjenge mobuke zendi asi Varoma “simpe ngava twikire kudana yipito yawo.” Awo va twikilire “kudana yipito yawo yoyipe neyi yanare.”—Santa Claus, a Biography

Krismesa kwa kara epuko morwa kwa tundilira konompo donondona. Stephen Nissenbaum kwa tjenge mobuke zendi asi Krismesa “kumoneka ngwendi sipito sosiwa soVakriste nani nye sovapagani.” (The Battle for Christmas) Yipo nye, Krismesa kuswaukisa Karunga naMunwendi, Jesus Kristusa. Ayo mulyo kunyokera po sipito esi ndi? Bibeli kupura asi: “Pouhungami noudona ukwawo musinke wa kara po, ndi pouzera nomundema malizo musinke ga kara po?” (2 Vakolinte 6:14) Ngwendi sitji esi sa penga, Krismesa nazo kwa penga ‘kapi to vhuru kuzivyukisa.’—Muudisi 1:15.