Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SOKUHOVA

Wolye Nombangi daJehova?

Wolye Nombangi daJehova?

Becky gomoAmerika kwa tanta asi: “Ame kwa divire Mike, gumwe goNombangi daJehova, nomvhura dononzi. Nye kapi na kwete egano ukareli wawo. Ngani lipura asi: Yilye Jehova? Morwasinke Nombangi daJehova ava dilire kudana mapwizumuko? Yisinke va pura?”

Zenon gomoKanada kwa tanta asi: “Apa vamusinda vetu va tamekere kulironga Bibeli noNombangi daJehova na lipulire asi: ‘Yinke ali tanta edina Nombangi daJehova? Edina olyo kapi lya wapera ukarelikarunga.’”

Kent gomoAmerika kwa tanta asi: “Name namukadange kwa gazarere asi Nombangi daJehova kwa wizire pembo lyetu va ya tu ninkise tu lizuvhe unzoni morwa kapi twa zire kongereka. Yipo twa lipulire asi nsene asi nongereka edi da divikwa mouzuni kapi da tu vatera, aka kambunga koNombangi daJehova ka hana divilisa yiko nye naka tu vatera ndi?”

Cecilie gomoDenemarke kwa tanta asi: “Ame kapi na divire Nombangi daJehova ntani neyi va pura.”

Nampo wa mona Nombangi daJehova kuna kuzuvhisa momambo ndi mononzira ntani kuna kugavera yimbapiratjangwa nokuronga vantu Bibeli. Nampo ko gwene simbapiratjangwa esi kwawo. Nye nampo nove kulipura mapuro aga va lipura vantu tuna tumbura ketamekero.

Nsene wa kara nomapuro gangoso, kupi no gwana malimbururo? Ngapi no lironga eyi da pura Nombangi daJehova, ntani kupi ava gwana yimaliwa eyi ava ruganesa va sikise mo sirugana sawo sokuzuvhisa ntani neyi ava dingwire vantu pomambo gawo nokuzuvhisira vantu monzira?

Cecilie tuna tumbura muhowo kwa tanta asi: “Na resere kuhamena Nombangi daJehova koIntaneta. Ntani ngani zuvhu yoyidona kuvahamena. Eyi ya ninkisire nge ni va tare asi vantu wovadona.” Nye konyima ga ya zogerere noNombangi daJehova nokugwana malimbururo gomawa komapuro gendi.

Ono hara kugwana nombudi dousili kuhamena Nombangi daJehova ndi? Gwana Nombangi daJehova edi da rugana sifo esi. (Yisewe 14:15) Yirongwa yokukwama ko nayi ka kuvatera o tu dive neyi twa pura ntani nomu atu rugana yirugana yetu.