Zende koyikaramo

Zende koyikaramo

Nombangi daJehova

Horowora eraka Rukwangali

Wa yi diva ndi?

Wa yi diva ndi?

Ngapi mupositoli Paurusa ga gwanenene mo uwa mokukara gomvharerwa zaRoma?

Paurusa kwa tente asi: “Ame kwaHompa gwaRoma nina tara!”

Epangero lyoVaroma kwa pere muntu nonkondo noyitumbukira yongandi nkenye oku nga zi nsene age gomvharerwa zawo. Gomvharerwa zaRoma ga hepere kulimburukwa unene koveta zepangero kupitakana noveta domonomukunda. Nsene kwa mu rundira, age kuvhura kuyitambura va mu pangure kuliza noveta zomomukunda, nye simpe ga kere nononkondo dokukamoneka kompanguro zonene. Ano nsene asi kuna mu pangwire konomfa, ga kere nononkondo dokuyitwara kwahompa gwaRoma.

Kombinga zounankondo wangoso, Cicero, munekuto goMuroma, kwa tente asi: “Kapi va yi pulisilire kutura monomango gomvharerwa zaRoma; nokumutoona nonyanya ndi kumudipaga.”

Mupositoli Paurusa kwa zuvhisilire mombumbura nazinye zaRoma. Age kwa ruganesere nonkondo dendi dounamvharerwa moyihorokwa eyi yitatu: (1) Age kwa pukwilire vaporosi womoFilipi asi awo va lipukire pokumutoona. (2) MoJerusarema, age kwa lidivisire mwene asi Muroma yipo va dire kumutoona. (3) Age kwa twere nonkango dendi kwahompa gwaRoma, yipo a ka mu pangure.—Yirug. 16:37-39; 22:25-28; 25:10-12.

Ngapi ngava va futu vasita womosiruwo sanare?

Siperende sanare somalizuvhasano gokuranda nonzwi noyikombo, koyiha yomvhura 2050 komeho zokuwiza Kristusa

Esimbi Jakopo kwa lisire yimuna yahekurwendi Rabani nomvhura 20. Jakopo pomuhowo kwa ruganene nomvhura 14 yipo a kware vana vavali vahekurwendi, ano nomvhura 6 edi da kweme ko kwa di ruganenene va mu fute yimuna. (Genesis 30:25-33) Sifo simwe kwa tanta asi: “Malizuvhasano gangoso ngwendi gopokatji kaRabani naJakopo, kwa divikwire kovatjangi vanare ntani nokovaresi woBibeli.”—Biblical Archaeology Review.

Siperende sanare va gwene mosirongo saIraq kevango lyaNuzi neli lyaLarsa ntani nokomavango gapeke kwa tjanga po malizuvhasano gangoso. Elizuvhasano limwe kwa kere lyokukurura nonzwi nkenye mvhura. Vasita kwa tambwire situmbukira sokupakera mbili sivaro soyimuna kuliza nonomvhura dayo ntani rudivharo. Nkenye mvhura, mwenyayo nga gwana ko nohuki dononzwi, nomasini nomagadi nononzwigona nayimwe ngoso. Yokuhupa ko ngayi pe musita.

Mokulivhukisa siunda sononzwi kwa korerere kosivaro sononzwi dononkadi edi ngava gava komusita. Nonzwi efere dononkadi ngava di ndindire di rete nonzwigona 80. Musita ga hepere kurugana ko yuma nsene pa pira zimwe. Eyi ngayi tumangeda unene musita a pakere mbili yimuna eyi va mu pere.