Zende koyikaramo

Zende koyikaramo

Nombangi daJehova

Horowora eraka Rukwangali

 BIBELI KURUNDURURA EPARU LYOVANTU

Ga tetukisire nge malimbururo gomoBibeli

Ga tetukisire nge malimbururo gomoBibeli
  • MVHURA ZEHAMPURUKO: 1948

  • SIRONGO SOMVHARERWA: HONGAREYI

  • EHISTOLI LYENDI: KWA HERE KUGWANA MALIMBURURO KOMAPURO GOMULYO MEPARU

EPARU LYANGE LYANARE:

Ame kwa hampurukilire nge moHongareyi sitata sa kere noungawo nomvhura 1 000 da ka pita. Simpe tani diworoka omu sa zonaukire poyita yauvali youzuni.

Ame kwa rerere nge omama wovagara nava wovakadi. Awo kwa kere vantu wovawa, unene po omama wovakadi Elisabeth. Awo kwa rongere nge ni kare nepuro lyenene mwaKarunga. Apa na kere nonomvhura ntatu, ngatu kanderere kumwe nkenye masiku ekanderero, Guhyetu gemeguru. Ame kwa ya kwete ntanto zekanderero olyo moukondi.

Omama wovagara nava wovakadi kwa rerere nge morwa vakurona vange ngava rugana unene yipo va pongaike yimaliwa va rande embo lyewa. Ruvali mokwedi moMapeu, ngatu pongo epata nalinye tu lye kumwe. Ngani hafere yiruwo yangoso.

Mo-1958 vakurona vange yipo va rende embo makura tani ka tunga nawo. Ame kwa hefe unene mokutunga kumwe novakurona vange. Nye konyima zomakwedi ntanzimwe tapa horoka ehudi, otate kwa fire kokankera.

Ame kwa guvire sili makura tani kanderere asi: “Karunga, na kulikwamberere o verure otate. Na va hepa. Morwasinke wa dilire kulimburura makanderero gange?” Ame kwa here kudiva oku va zire otate. Tani lipura asi: ‘Moveli meguru ndi? Ngani va mona hena ndi?’ Ngani lizuvhu yoyidona apa ngani mono vakwetetu kuna kara novaguhyawo.

Nomvhura dononzi, ngani zi nkenye apa keyendo lyotate nokukanderera asi: “Karunga, nina hara kudiva oku vana kara otate.” Ngani kanderere hena yipo ni kwate egano sitambo separu.

Apa na kere nonomvhura 13, yipo na tokwere kulironga Rundovesi. Morwa eraka olyo kwa kere noyimbapiratjangwa  yoyinzi, yipo na gazarere asi ngani gwana mo malimbururo komapuro gange. Mo-1967 yipo na ka lirongerere mositata saJena, moNdovesiranda. Ngani resa unene nobuke edi da zogerere kuhamena vantu. Nye nobuke odo kapi da limbwilire mapuro gange. Yipo na twikilire kukanderera ni gwane malimbururo.

OMU BIBELI ZA RUNDURWIRE EPARU LYANGE:

Mo-1970 yipo na tengwire koHongareyi, tani ka gwana Rose mukadi ogu naya kwere. Posiruwo sina ukaro womosirongo kapi wa wepe. Konyima zapa twa likwere, yipo twa tjwayukilire koAustria. Sitambo setu kwa here tu ze koAustralia oku ga tungire hekurwange.

Na ka gwene yirugana moAustria. Ezuva limwe, mukwetu ogu ngani rugana nendi kwa tanterere nge asi kuvhura ni gwane malimbururo moBibeli komapuro gange nagenye. Ta pe nge nobuke dokuhamena koBibeli. Tani di resa usimbu-simbu morwa na here kulironga yoyinzi. Yipo na tjangerere Nombangi daJehova va tjangi wonobuke odo va tumine nge ko yimbapiratjangwa yoyinzi.

Pezuva lyediworoko nonkwara detu, tatu wizire mudinkantu goMbangi. Kwa retere yimbapiratjangwa eyi na hundilire makura ta pura nge tu lironge Bibeli, tani yi tambura. Morwa kwa here kulironga, ngatu lirongo ruvali mosivike konyara novili ne.

Ame kwa tetukire eyi da rongere nge Nombangi moBibeli. Kwa tetukisire nge apa va likidire nge edina lyaKarunga, Jehova, moBibeli zange zomoRuhongareyi. Nomvhura 27 edi ngani zi kongereka, kapi na zuvhire rumwe va tumbure edina lyaKarunga. Kwa tetukisire nge malimbururo gomoBibeli komapuro gange. Ame na lirongere asi vafe kutupu eyi va diva, awo ngwendi kuna rara nompofu dononene. (Muudisi 9:5, 10; Johanesa 11:11-15) Na lirongere hena etumbwidiro lyomoBibeli kuhamena uzuni woupe omu ngamu ‘ka pira nomfa.’ (Ehororo 21:3, 4) Nina hara kukamona otate, morwa mouzuni owo woupe vafe ngava ka va “pindura koufe.”—Yirugana 24:15.

Rose nage taya tameke kulironga Bibeli. Twa tulire po usimbu ezokomeho, elirongo lyetu kwa gusire makwedi gavali tupu. Ngatu zi komapongo nagenye koSinyanga soUhompa. Kwa tu tetukisire nkareso zoNombangi daJehova zeharo zokuvatera vakwaawo ntani zouumwe.—Johanesa 13:34, 35.

Mo-1976, name naRose yipo va tu pulisilire kuza moAustralia. Yipo twa ka paparere Nombangi daJehova. Awo kwa tu tambwire sili nawa. Mo-1978, yipo twa gwene ekuho.

MAUWA AGA NA GWANENA MO:

Ngesi na gwana malimbururo komapuro gange nagenye. Pokuhedera pepi naJehova Karunga, na gwana Guhya gomuwa po. (Jakopo 4:8) Nye hena kuna kundindira nononkondo mokukamona otate mouzuni woupe.—Johanesa 5:28, 29.

Mo-1989, name naRose yipo twa tengwire koHongareyi tu ka tantere ko vakaume novanekero navamwe hena kuhamena epuliro lyetu lyepe. Ose kwa lironga Bibeli novantu wovanzi, ano wokupitakana po-70 kwa tambura usili, kukwatera mo onane.

Nomvhura 17 ame kwa kandererere ni gwane malimbururo komapuro gange. Ngesi pana piti nomvhura 39, simpe kuna kukanderera asi: “Mpandu Guhyetu gemeguru mokulimburura mapuro gange.”