Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SOKUHOVA | KARUNGA KUVHURA A KARE KAUME KOGE

Karunga kaume koge ndi?

Karunga kaume koge ndi?

CHRISTOPHER mudinkantugara gomoGhana kwa tanta asi: “Nsene o kara kaume kaKarunga kapi ngo kara noutjirwe wankenye eyi ntani ngo hafa. Ntani ngo lizuvha asi Karunga kukupakera mbili.”

HANNAH gonomvhura 13 gomoAmerika kwa tanta asi: “Apa atu kara momaudigu, Karunga kutuvatera nokutulikida eharo.”

GINA gonomvhura konyara 45 gomoJamaika kwa tanta asi: “Kukara kaume kaKarunga aso sininke somulyo ntani kureta ruhafo.”

Christopher naHanna ntani Gina, kapisi yiwo velike ava lizuvhu ngoso. Vantu wovanzi mouzuni mudima va yi pura asi Karunga kuvatara ngovakaume vendi. Nove Karunga kaume koge ndi? Ndi ono hara kukara kaume kendi? Nampo wa lipura asi: ‘Kuvhura sili muntu a ture po ukaume naKarunga Munankondo nadinye ndi? Nsene yimo, monkedi musinke?

KARA KAUME KAKARUNGA

Bibeli za uyunga asi kuvhura tu kare vakaume vaKarunga. Age kwa tumbwire Abirahamu asi “mukwetu.” (Jesaya 41:8) MwaJakopo 4:8 kwa tanta asi: “Hedeni Karunga pepi, nage a mu hede pepi.” Nonkango odo kulikida asi ose kuvhura kukara vakaume vaKarunga. Ngapi omu natu vhura ‘kuheda pepi’ naKarunga age kapi atu mu mono?

Mokugwana elimbururo, koneka omu vantu ava tulisa po ukaume. Pomuhowo awo kulitantera madina gawo. Konyima tava tameke kuzogera nokulipa magano, makura ukaume wawo tau nkondopara. Moomu vana kulirugananena yininke yimo nau nkondopara ukaume wawo. Ukaume naKarunga nawo yimo au gendi ngoso. Tu tareni omu ya lifana.