Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SOKUHOVA | KARUNGA KUVHURA A KARE KAUME KOGE

Ove kurugana eyi a ku tantere Karunga ndi?

Ove kurugana eyi a ku tantere Karunga ndi?

Kuvhura o tantere mugeni asi: “Nkenye eyi ono hara, tani yi ku ruganene” ndi? Hawe. Nye kuvhura o tantere nonkango odo kaume koge gomunene, morwa vakaume kuliruganena yininke.

Bibeli kutanta asi Jehova kuruganena nkenye apa yininke yoyiwa vakareli vendi. Pasihonena, hompa Ndafita ogu ga kere kaume kaKarunga, kwa tente asi: “Yinzi eyi wa tu ruganena, HOMPA Karunga gwetu.  . . nokuvhura si kuyinongauka.” (Episarome 40:5) Jehova kuruganena hena uwa owo va dira kumudiva ‘pokuvapa nondya yipo nomutjima dawo di hafe.’—Yirugana 14:17.

Ose kuruganena yininke ava twa hara ntani twa fumadeka

Jehova kwa hara kuruganena vantu uwa, yipo nye owo vana hara kukara vakaume vendi nawo va hepa kurugana eyi ayi mu ‘hafesa.’ (Yisewe 27:11) Yisinke no rugana o hafese Karunga? Bibeli kulimburura asi: “Walye omu divara kurugana uwa oku tomu likwafa-kwafa, yeeyi nonzambo dangoso yido da za Karunga komutjima.” (Vahebeli 13:16) Kuruganena vakwetetu uwa yiyo yelike ya hamena mo mokuhafesa Jehova ndi?

Bibeli kutanta asi: “Nsene o pira epuro, nokuza si Karunga komutjima.” (Vahebeli 11:6) “Abirahamu kwa pulire Karunga” makura tava ‘mu tumbura asi mukwawo zaKarunga.’ (Jakopo 2:23) Nsene tuna hara Karunga a tu ruganene uwa, Jesus ga tente asi twa hepa kupura ndi ‘kuhuguvara Karunga.’ (Johanesa 14:1) Ngapi no tunga po epuro olyo ga hepa Karunga? Pomuhowo wa hepa kulironga Nonkango daKarunga, Bibeli. Makura ngo gwane “ediwo lyompango zendi,” nokurugana nkenye apa “yokumuhafesa.” Apa ngo kara nediwo lyenzi lyokuhamena Jehova nokusikisa mo yipango yendi, epuro lyoge ngali nkondopara makura age nga kara kaume koge.—Vakorosi 1:9, 10.