Zende koyikaramo

Zende koyikaramo

Nombangi daJehova

Horowora eraka Rukwangali

 NZOGERA NOMUNTU OGU ONO KUZUVHISIRA

Siruwoke wa tamekere kupangera Uhompa waKarunga? (Ruha 1)

Siruwoke wa tamekere kupangera Uhompa waKarunga? (Ruha 1)

Ezi kuna kara nzogera pokatji koMbangi nomuntu ogu ana kuzuvhisira. Tu tante asi Timo gumwe goNombangi daJehova kuna zi membo lyomugara gedina Jona.

‘PAPARA’ UNONGO NDI NONDUNGE

Timo: Jona, na hafera sili kuzogera nove kuhamena Bibeli. * Ezuva lina ko pulire nge asi ngapi omu Nombangi daJehova da yi diva asi Uhompa waKarunga kwa tamekere kupangera mo-1914?

Jona: Ame kwa resere simbapira seni simwe, omu va faturura asi Uhompa waKarunga kwa tamekere kupangera mo-1914. Makura kayi tetukisire nge, morwa one kuuyunga asi marongo geni nagenye kwa tunda moBibeli.

Timo: Nhi, moBibeli aga tundu.

Jona: Ame kwa resa Bibeli nazinye, nye kapi va tumbura mo mvhura 1914. Yipo kani tere koBibeli zokoIntaneta ni papare mvhura 1914 nye kapi kazi monekere mo.

Timo: Nina hara kukupandura morwa yininke yivali eyi: Sokuhova, ove wa resa Bibeli nazinye. Kumoneka asi wa hara Nonkango daKarunga.

Jona: Ame kwa hara Bibeli, kwato buke zimwe no vhura kuzihetakanesa nazo.

Timo: Awe yimo. Sininke sauvali, ove ko paparere elimbururo moBibeli. Ove ko rugene eyi azi tu korangeda Bibeli asi: ‘O papare’ unongo ndi nondunge. * Mpandu sili kelituromo lyoge lyenene.

Jona: Ame na hara kutwikira kulironga. Kani rugene hena epaparo limwe yiyo kani gwene mauzera gamwe kuhamena 1914 mobuke ezi tuna kulironga. Amo kwa tumbura mo asi hompa kwa rotere nzodi zetji lyenene eli va tetere makura tali ya kuru hena.

Timo: Kuna kara uporofete wa kara mwaNdaniyera egaununo 4. Azo nzodi ga rotere Nebukadenesara hompa goVababironi.

Jona: Ya, zoozo nzodi. Kani resere nokuresurura mo nye kapi kani kwete egano omu ya likwatakana noUhompa waKarunga ndi mvhura 1914.

Timo: Ndaniyera nage kapi ga kwete nawa egano uporofete ou va mu pere a tjange.

Jona: Yosili?

Timo: Nhi, tara eyi ga uyungire mwaNdaniyera 12:8 asi: “Na yi zuvhire, nye nokuyikwata si egano.”

Jona: Nani kuna kara sirongwa soudigu.

Timo: Ndaniyera kapi ga yi kwete egano morwa siruwo saKarunga kapi sa sikire mo mokufatwilira  vantu mauporofete gomobuke zaNdaniyera. Nye ngesi ose kuvhura kukwata egano mauporofete ogo.

Jona: Omu ono yi diva ngapi?

Timo: Tara mwaNdaniyera 12:9 asi: ‘Nonkango edi demehoramo, ado kwa pungukwa dogoro ehagero ngali wize.’ Mauporofete kwa ya ga kwete tupu egano posiruwo ‘sehagero.’ Melirongo lyetu lyoBibeli ngatu zogera maumbangi aga gana kulikida asi ose kuna kuparuka posiruwo sehagero. *

Jona: Kuvhura o fatwilire nge uporofete waNdaniyera ndi?

Timo: Nani hetekera ko.

NZODI ZANEBUKADENESARA

Timo: Tanko ni faturure pausupi eyi ga rotere hompa Nebukadenesara. Makura ntani nani ku fatwilira eyi azi tanta.

Jona: Ewa.

Timo: Nebukadenesara kwa mwene monzodi etji lyenene eli lya kulire dogoro tali ka twa keguru. Makura ta zuvhu Karunga ta gava mpangera asi va komangere etji olyo. Nye sisindi va si sige mevhu. Ano konyima ‘zonomvhura ntano nambali’ tasi ya kuru hena. * Uporofete ou pomuhowo kwa tembe kwahompa Nebukadenesara. Nampili ngomu ga kere hompa gononkondo ngwendi etji lina lya ka twire keguru, age kwa mu gusire ko ure ‘wonomvhura ntano nambali.’ To diworoka eyi ya horokere?

Jona: Hawe.

Timo: Bibeli kulikida asi nomvhura ntano-nambali Nebukadenesara kapi ga kere nonondunge dosintu. Monomvhura odo kapi ga vhulire kupangera. Nye apa da pwire nomvhura odo, nondunge dendi tadi mu tengwire makura ta tameke kupangera hena. *

Jona: Kuna kuyikwata egano eyi ono kuuyunga, nye ngapi omu yina likwatakana noUhompa waKarunga ntani 1914?

Timo: Uporofete ou kwa kara nomasikiliromo gavali. Lyokuhova kwa horokere apa hompa Nebukadenesara ga hagekere kupangera. Lyauvali kwa horokere apa upangeli waKarunga va u hagekesere. Esikiliromo olyo lyauvali yilyo lya likwatakana noUhompa waKarunga.

Jona: Ngapi omu wa yi diva asi uporofete kwa kara nesikiliromo lyauvali eli lya likwatakana noUhompa waKarunga?

Timo: Umbangi kuugwana mouporofete wene. Kuliza naNdaniyera 4:17, uporofete kwa u geve yipo “vantu navenye nakunye va dive asi Karunga gekeguru-guru ga kara nononkondo komauntungi govantu, age hena kuvhura kuvagava kwankenye ogu ana horowora.” Ono zuvhu nonkango edi asi “komauntungi govantu”?

Jona: Nhi, asi: “gekeguru-guru ga kara nononkondo komauntungi govantu.”

Timo: Yilye “gekeguru-guru”?

Jona: Karunga.

Timo: Yimo. Velise kuna kulikida asi uporofete kapi tupu wa tembe kwahompa Nebukadenesara nye hena “komauntungi govantu” ndi koupangeli waKarunga kovantu.

Jona: Yisinke ono tamba?

SITAMBO SOBUKE ZANDANIYERA

Timo: Buke zaNdaniyera kwa kara nositambo. Azo kwa tamba koUhompa waKarunga ou nga pangera Munwendi Jesus. Tu rese mwaNdaniyera 2:44.

Jona: Kuna kutanta asi: “Posiruwo sohompa owo Karunga gemeguru nga dika sirongo esi ngasi kererera narunye. Aso kapi ngava si  funda nampili kanunu, nye ngasi hanagura yirongo oyo nayinye, makura tasi kara dogoro narunye.”

Timo: Mpandu. Sirongo musinke va tamba movelise ezi?

Jona: Kapi tani diva.

Timo: Velise zina tumbura sirongo esi “ngasi kererera narunye.” Sirongo oso kwa tamba Uhompa waKarunga ou ngau karerera nye kapisi mapangero govantu.

Jona: Awe yimo.

Timo: Mobuke zaNdaniyera mwa kara hena uporofete umwe ou wa tamba koUhompa waKarunga. MwaNdaniyera 7:13, 14, kwa tumbura mo kuhamena hompa gokomeho asi: ‘Tava mu pe epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene. Epangero lyendi ngali karerera, ano untungi wendi kapi ngau haga po.’ Yisinke ono dimburura vana tumbura mo metjangwa eli?

Jona: Untungi ndi Uhompa.

Timo: Mouhunga. Kapisi nkenye uhompa. Koneka vana tumbura asi Uhompa ou ngau pangera “vantu wonomuhoko nadinye nomarudi nomaraka nagenye.” Kutanta asi Uhompa ou ngau pangera uzuni mudima.

Jona: Yimo.

Timo: Koneka hena eyi una uyunga uporofete owo asi: “Epangero lyendi ngali karerera, ano untungi wendi kapi ngau haga po.” Kuna lifana ngwendi uporofete ou tuna resa mwaNdaniyera 2:44.

Jona: Awe yimo.

Timo: Tu rugurure pausupi eyi tuna zogere. Uporofete waNdaniyera megaununo 4 kwa u geve yipo vantu va dive asi “Karunga gekeguru-guru ga kara nononkondo komauntungi govantu.” Nonkango odo kulikida asi uporofete ou kwa kara nesikiliromo lyenene kugusa ko eyi ya horokerere Nebukadenesara. Mobuke zaNdaniyera, mwa kara mauporofete kuhamena etulisopo lyoUhompa waKarunga omu nga pangera Munwendi. Kuvhura tu tante asi uporofete waNdaniyera megaununo 4 wa likwatakana noUhompa waKarunga ndi?

Jona: Kuvhura. Nye ngapi ya likwatakana nomvhura 1914?

“NOMVHURA NTANO-NAMBALI”

Timo: Tu tengure hena konzodi zahompa Nebukadenesara. Age kwa mu fanekesere kositji mesikiliromo lyokuhova lyouporofete. Upangeli wendi kwa hege po apa sitji va si tetere ure wonomvhura ntano-nambali kutanta asi kapi ga kere nonondunge dosintu nomvhura odo. Apa da ya hege nomvhura odo, Nebukadenesara yipo ga gwene nondunge dendi nokutameka kupangera hena. Mesikiliromo lyauvali lyouporofete ou, upangeli waKarunga kwa hege karuwogona, nye kapisi morwa kwa mu sumpilire.

Jona: Yisinke ono tamba?

Timo: Vahompa woVasiraeli ava ngava pangere moJerusarema kwa va “tulire po HOMPA.” * Awo kwa karerere po Karunga mokupangera vantu vendi. Mwa za siruwo, sinzi  sovahompa owo kapi va limburukwire kwaKarunga ano vantu nawo ngava kwama sihonena sawo sosidona. Morwa Vaisraeli kapi va limburukwire, Karunga kwa pulisilire Vababironi va va ture mounkwate mo-607 komeho zokuwiza Kristusa. Kutunda opo, moJerusarema kapi mwa kere vahompa ava va karerere po Jehova. Monkango zimwe, upangeli waKarunga tanko kwa hege po. Ono yi kwata egano ndi?

Jona: Nhi.

Timo: Momvhura 607 komeho Jesus a wize pevhu yipo da tamekere nomvhura ntano-nambali domouporofete apa upangeli waKarunga tanko wa hege po. Apa da ya hege nomvhura ntano-nambali yipo Karunga ga ya tulire po hompa gomupe meguru. Yipo wa sikire mo uporofete wauvali tuna resa mwaNdaniyera. Epuro kuna kara asi: Siruwoke da hege nomvhura ntano-nambali? Nsene natu gwana elimbururo olyo, yipo natu diva apa wa tamekere kupangera Uhompa waKarunga.

Jona: Ngoso nomvhura ntano-nambali domouporofete kwa ya hege mo-1914 ndi?

Timo: Mouhunga ono kara.

Jona: Nye ngapi nayi kara ngoso?

Timo: Apa Jesus ga ya kere pevhu ga ya uyungire asi nomvhura ntano-nambali kapi simpe da hege. * Nomvhura odo kwa tamekere nomvhura mafere komeho Jesus a wize pevhu, ntani ado da ya twikilire napa ga ya tengwire meguru. Diworoka asi mauporofete gaNdaniyera kwa ya ga kwete egano dogoro posiruwo ‘sehagero.’ * Nomvhura dongandi komeho zo-1914, valirongi woBibeli kwa tamekere kukonakona mauporofete ogo. Tava ya kwata egano asi nomvhura ntano-nambali douporofete kwa ya hege mo-1914. Yihorokwa yoyinene mouzuni kwa geve umbangi asi 1914 yipo wa tamekere kupangera Uhompa waKarunga meguru. Yipo ga tamekere mazuva gopouhura ndi siruwo sehagero. Na diva asi edi nombudi donompe koge . . .

Jona: Na hepa simpe kukaresa mo monombudi odo yipo ni ka yi kwate nawa egano.

Timo: Wa ha kara nosinka. Name kwa gusire nge siruwo mokukwata egano mauporofete ogo. Na si huguvara asi eyi tuna zogere yina ku vatere o dive asi eyi da pura Nombangi daJehova kuhamena Uhompa kwa tunda moBibeli.

Jona: Ame kuhafesa nge pokumona asi one kwa huguvara sili moBibeli.

Timo: Nove kukumona asi wa huguvara moBibeli. Yinzi sili tuna zogere naina, nye na si huguvara asi simpe ono kara nomapuro. Tuna lirongo asi nomvhura ntano-nambali douporofete kwa likwatakana noUhompa waKarunga ntani asi ado kwa tamekere momvhura 607 komeho Jesus a wize pevhu. Nye ngapi omu tuna yi diva asi nomvhura ntano-nambali kwa hege mo-1914? *

Jona: Yimo, ngapi omu mwa yi diva?

Timo: Bibeli kutuvatera tu dive nawa siruwo esi da gusire nomvhura ntano-nambali douporofete. Kuvhura ngatu ya yi zogere apa ngani ka wiza ko hena ndi? *

Jona: Nawa tupu.

Wa kara nepuro lyokuhamena Bibeli eli o lipura ndi? Ono hara kudiva kuhamena eyi da pura Nombangi daJehova ndi? Nsene yimo, pura gumwe goNombangi daJehova. Age nga yi hafera kuzogera nove.

^ para. 5 Nombangi daJehova kurugana elirongo lyoBibeli lyomawoko-woko novantu.

^ para. 63 Mouporofete wendi kuhamena mazuva gopouhura, Jesus kwa tente asi: “Jerusarema [ezi za fanekesere upangeli waKarunga] ngava zi lyatagura vapagani dogoro noku ngasi sika mo siruwo sawo.” (Rukasa 21:24) Yipo nye, apa Jesus ga ya kere pevhu awo upangeli waKarunga wa hege dogoro pomazuva gopouhura.

^ para. 67 Tara magwedereroko “1914—Mvhura zontanto mouporofete woBibeli” mobuke Yinke azi rongo Bibeli sili?

^ para. 69 Sirongwa sokukwama ko ngasi ya faturura novelise domoBibeli edi da likida siruwo esi da gusire nomvhura ntano-nambali.