Zende koyikaramo

Zende koyikaramo

Nombangi daJehova

Horowora eraka Rukwangali

 BIBELI KURUNDURURA EPARU LYOVANTU

“Tani tameke kugazadara ko unene kuhamena eparu lyange”

“Tani tameke kugazadara ko unene kuhamena eparu lyange”
  • MVHURA ZEHAMPURUKO: 1941

  • SIRONGO SOMVHARERWA: AUSTRALIA

  • EHISTOLI LYENDI: KUKOKA MAKANYA NOKUNWA MAROVHU

EPARU LYANGE LYANARE:

Ame kwa kulilire moWarialda, kadoropa komoNew South Wales. Doropa ozo zounandima wononzwi nonongombe nonombuto. Azo kwa zera ntani kapi mwa kara ukorokotji wounzi.

Ose murongo va tu reta, apa na kere nonomvhura 13 tani tameke kurugana ni vatere epata lyetu. Morwa kapi na mene sure, ngani rugana ponofarama. Apa na kere nonomvhura 15 tani tameke kudeura nonkambe domowiza.

Ponofarama pwa kere mauwa nomaudona. Nye na haferere sirugana sange, nonkarapamwe. Masiku ngani hingire ni zote mundiro nokutara kokwedi nonombungururu nokuhafera mpepo zongwa zomowiza. Tani gazadara asi pwa kara ogu ga sita yininke nayinye eyi yoyiwa. Nye ponofarama pwa kere hena maudona gamwe. Vantu ngava tuku nokukoka makanya. Name tani ya tameke kukoka nokutuka.

Tani ya dirukire koSydney, ame opo nomvhura dange 18. Na here kukara mukwayita nye kapi va tambwire nge morwa kapi na mene sure. Tani gwana yirugana yapeke makura tani kara moSydney ure womvhura. Siruwo oso yipo na ligwene noNombangi daJehova. Apa va zigidire nge kepongo lyawo tani zi, ano poopo tani ka yi dimburura asi marongo gawo usili.

Nye konyima zosiruwo, tani tokora kutengura konofarama. Tani ka tunga modoropa zaGoondiwindi, moQueensland. Tani ka gwana yirugana, tani ka kwara, nye ehudi tani tameke hena kunwa marovhu.

Tatu reta vana vavali. Apa vana vetu va tamekere kukura, tani tameke kugazadara ko unene kuhamena eparu lyange. Tani diworoka eyi na ka zuvhire kepongo lina lyoNombangi moSydney, makura yipo na tokwere kurugana ko yuma.

 Tani gwana Ruhungu rwanare, omu mwa kere aderesi zoBeteli zoNombangi daJehova moAustralia. Tani va tjangere mbilive va vatere nge. Tava ka limburura, pokutuma gumwe goNombangi a ya dingure nge. Makura tatu ya tameke kulironga Bibeli.

OMU BIBELI ZA RUNDURWIRE EPARU LYANGE:

Apa na lirongere Bibeli, tani yi nongonona asi na hepere kutura po marunduruko gomanene. Velise ezi za twire nge komutjima kuna kara zomo-2 Vakolinte 7:1. Velise ozo kutukorangeda asi “atu lizereseni nyamwetu kwanayinye eyi ayi nyateke korutu.”

Yipo na tokwere kuhageka kukoka makanya nokunwa unene marovhu. Kapi ya kere ureru kutura po marunduruko ogo, morwa ame nare na gusire kukoka nokunwa. Nye na tokomenene kuparuka monkedi ezi azi hafesa Karunga. Eyi ya vaterere nge kuna kara kutura pasirugana mpango ezi va tjanga moVaroma 12:2 asi: “Mwa ha lifana nouzuni ou. Nye sigeni Karunga a rundurure magazaro geni.” Tani ya yi nongonona asi mokutura po marunduruko na hepere kurundurura magazaro gange ni tare yininke eyi ngani rugana asi yidona ngwendi moomu a yi tara Karunga. Nevatero lyendi, ya tompokere nge ni hageke kukoka makanya nokunwa unene marovhu.

“Tani ya yi nongonona asi mokutura po marunduruko na hepere kurundurura magazaro gange”

Nye ya digoperere nge kuhageka kutuka. Na divire epukururo lyomoBibeli lyomoVaefeso 4:29 asi: “Walye omu uyunga nonkango dononkukutu.” Nampili ngoso, kapi ya tompokere nge ni hageke poopo kutuka. Kuteda ko kononkango domoJesaya 40:26 ya vaterere nge. Velise ozo kwa uyunga kuhamena eguru asi: “Ko tara si keguru! Yilye ga sita dina nombungururu ono kumona? Gumwe ogu a di pitisire ngwendi gogu a pitisire mbunga zovakwayita, age ga diva asi dingapi da kara age kuditumbura nadinye komadina gado! Nonkondo dendi nonene unene, patupu eyi ya lisempuka po!” Yipo na tedere ko asi nsene Karunga ga kere nononkondo dokusita yininke yekeguru eyi na hara kutara, name nga pa nge nonkondo ni ture po marunduruko yipo ni mu hafese. Pokukanderera nokulitura mo unene, ya tompokere nge mokupangera mbuuyungiso zange.

MAUWA AGA NA GWANENA MO:

Ponofarama edi ngani rugana kapi pwa kere vantu wovanzi, yipo nye kapi na divire kusimwitira ndi kuzogera novantu. Nye morwa edeuro eli na gwana komapongo goNombangi daJehova, na lironga kusimwitira nokuzogera novantu. Edeuro olyo lya vatera nge hena ni tantere ko vantu kuhamena mbudi zongwa zoUhompa waKarunga.—Mateusa 6:9, 10; 24:14.

Monomvhura edi ame kwa hafera sirugana sange ngomukuronambunga. Ame kulizuvha mfumwa mokuvatera vapuli vakwetetu. Uwa wounene ou na hafera kuna kara kukarera Jehova kumwe namukadange gomulimburukwi novana vetu wovawa.

Nampili ngomu na dilire kumana sure, ame kuna kupandura Jehova kweyi ga ronga nge. (Jesaya 54:13) Ame kuna kukwatesa ko nonkango domoYisewe 10:22 (NW) asi: “Etungiko lyaJehova alyo kungawopeka. Age kapi a li gava li ku retere kukora.” Name nepata lyange kuna kundindira nononkondo mokulironga yoyinzi kuhamena Jehova nokumukarera narunye.