Zende koyikaramo

Zende koyikaramo

Nombangi daJehova

Horowora eraka Rukwangali

 HEDERA KARUNGA PEPI

Age kutupa yininke yipo ‘nomutjima detu di hafe’

Age kutupa yininke yipo ‘nomutjima detu di hafe’

Jehova kutupakera mbili ndi kwato sinka komaudigu aga ava ligwanekere nago vantu? Bibeli kutupa elimbururo lyokuhengagwida. Karunga kupakera mbili vantu ntani ana hara tu hafe. Nkenye ezuva age kuruganena vantu mauwa nampili ava ava dili kumupandura. Tu konakoneni nonkango domupositoli Paurusa.—Resa Yirugana 14:16, 17.

Apa Paurusa ga uyungisire vantu womositata saLisitira ava ngava dili kukarera Karunga, age kwa tente asi: “Yiruwo yanare [Karunga] kwa sigililire marudi asi ga gende moomu gana hara. Mpili ngomu ngoso, nye ga lihorwere pokurugana yoyiwa, pokumurokesera mvhura, ta mu pe ewogo nonondya, nomutjima deni di hafe.” Yisinke da tente nonkango odo koValisitira?

Valisitira ngano va kwete egano usili wononkango daPaurusa. Morwa awo kwa kere vanandima, ano sirongo sawo kwa kere nevhu lyewa ntani mvhura ngazi roko unene. Paurusa kwa va diworokesere asi Karunga yige nga va rokesere mvhura nokumenesa yimeno. Yipo nye, nkenye apa ngava zangura mbuto nokuhafera nondya awo ngava gwanene mo uwa moyirugana yaKarunga.

Nonkango daPaurusa koValisitira kuturonga yitwa yomulyo kuhamena Jehova Karunga.

Jehova kwa tu pa umanguruki wokutura po matokoro. Velise kuna tanta asi Jehova kwa pulisilire marudi “asi ga gende moomu gana hara.” Buke zimwe zokuvatera vatoroki woBibeli kwa faturura ntanto ozo asi “kurugana yeeyi vana hara vene.” Jehova kapi a tu sininike tu mu karere. Age ga tu pa umanguruki wokutokora eyi tuna hara kurugana.—Deuteronomium 30:19.

Jehova ana hara tu mu dive. Paurusa kwa tente asi Jehova “ga lihorwere” mwene. Buke zina tuna tumbura kwa faturura asi ntanto ozo kuvhura kutanta hena asi “age kwa likida vantu asi Karunga musinke.” Yisitwa yaKarunga kugava umbangi ‘wonkareso zendi ezi azi dili kumoneka,’ kukwatera mo uwa nounongo nononkondo neharo. (Varoma 1:20) Jehova ga lihorora nyamwendi moBibeli. (2 Timoteusa 3:16, 17) Eyi kuna kulikida asi ana hara tu mu dive.

Nkenye ezuva Karunga kuruganena vantu mauwa nampili ava ava dili kumupandura

Jehova ana hara tu hafe. Paurusa kwa tente asi Jehova ‘kutupa ewogo nonondya, nomutjima detu di hafe.’ Nampili ava va dira kudiva Jehova, awo kulya nondya ntani kuhafa. Nye Jehova kuna hara tu gwane ruhafo rousili rwanarunye. Nsene tu lironga usili kumuhamena nokutura pasirugana eyi tuna kulironga, ngatu vhura kugwana ruhafo oro.—Episarome 144:15; Mateusa 5:3, hetakanesa NW.

Nkenye ezuva natuvenye kugwanena mo mauwa mweyi a rugana Jehova. Lironga yoyinzi kuhamena omu no likida rupandu kwaKarunga ogu a ku pe ‘ewogo nonondya, yipo mutjima goge gu hafe.’

RESA MOBIBELI ZOGE

Yirugana 11-28