Zende koyikaramo

Zende koyikaramo

Nombangi daJehova

Horowora eraka Rukwangali

 NSAPI ZOKUTWAREDERA KORUHAFO RWEMEPATA

Omu nayi kutompoka nsene ono ya kwara hena

Omu nayi kutompoka nsene ono ya kwara hena

HERMAN: * “Mukadange gokuhova ogu twa likwere nage ure wonomvhura 34 kwa fire kokankera. Apa na ya kwere ko Linda, age nga lizuvhu asi ame ngani mu hetakanesa namukadange gokuhova. Ntani hena, vakaume vange nkenye apa ngava tumbagura yikara yoyiwa yamukadange gokuhova ano ayo nga yi guvisa Linda.”

LINDA: “Apa ga kwere nge Herman, ame kwa lizuvhire asi age navamwe kapi va here nge unene ngwendi mukadendi gokuhova. Nakufa mukadendi ngava mu uyunga monaruwa. Eyi nga yi gazaresa nge asi name namugara gwange kapi ngatu likwatakana.”

Linda kwa lizumbire namugara gwendi gokuhova. Ngesi ga ya mu kwara Herman, ano vana hafa. Awo va yi tambura asi, nsene to ya kwara hena kuligwanekera nomaudigu aga wa pilire kuligwanekera nago mononkwara dokuhova. *

Nsene wa ya kwara hena, ngapi o lizuvhu kuhamena nonkwara doge? Tamara kwa mu zumbire ano konyima zonomvhura ntatu ta ya kwara hena, age kwa tente asi: “Nsene sikando soge sokuhova kukwara, to lizuvhu asi nonkwara doge ngadi karerera. Nye nsene sikando sauvali ono kukwara, to kara nosinka asi nonkwara doge ngadi haga po ngwendi dopomuhowo.”

Nye nampili ngoso sinzi sovantu ava ava ya kwara hena kuyagwana ruhafo mononkwara dawo. Nonkwara dawo da va tompoka, nove kuvhura yi ku tompoke! Monkedi musinke? Tu tare maudigu gatatu aga ava ligwanekere nago ava ava ya kwara  hena ntani omu nompango domoBibeli nadi vhura kukuvatera o ga lididimikire. *

UDIGU 1: KUKUDIGOPERA KUDIVARA NONKWARA DOGE DOKUHOVA.

Ellen, ga tunga moAfrika Mbindakano kwa tente asi: “Udigu kudivara nonkwara dange dokuhova, unene po apa atu zi kepwizumuko komavango aga ngani zi namugara gwange gokuhova. Poyiruwo yimwe ame kuhetakanesa mugara gwange gomupe kumwe nogu gwanare.” Nsene mulikwali goge ga kwere nare, kuvhura yi ku handukise nsene a tumbagura nonkwara dendi danare.

Ruganeni ko yuma mu pameke nonkwara deni donompe

EGANO: Wa hepa kuyitambura asi mulikwali goge kapi nga vhura kudivara nonkwara dendi dokuhova, unene po nsene kwa kwere nomvhura dononzi. Vamwe va uyunga asi awo pamwe kuzigida mulikwali gwawo kedina lyogu va kwere nare. Ngapi no lididimikira ukaro owo nagamwe hena? Bibeli kutanta asi: “Kareni namuvenye mutjima gumwe.”—1 Peturusa 3:8.

Kapisi nkenye apa o kare nomfudu nsene mulikwali goge a tumbura nonkwara dendi dokuhova. Nsene age kuna kulizuvha asi ana hara kusimwitira kuhamena nonkwara dendi dokuhova, wa hepa kupurakena nawa nokumukwata egano. Kapisi o genderere kuhanduka asi kuna kukuhetakanesa. Ian ogu ga ya kwere hena nomvhura 10 dina piti, kwa tente asi: “Kaitlyn, mukadange gomupe, kapi ngayi mu handukisa apa ngani simwitire kuhamena nakufa mukadange. Nye age kwa yi tere asi kuna kara nkedi zokudiva nge nawa.” Nsene mulikwali goge kusimwitira kuhamena nonkwara dendi danare, nonzogera odo ngadi ku vatera o likwatakane nomulikwali goge.

Wa hepa kudemenene koyikara yoyiwa yomulikwali goge gomupe. Age kuvhura a dire kukara noyikara noudivi ou ga kere nawo mulikwali goge gokuhova. Nye nage nampo ga kara noyikara noudivi wapeke. Yipo nye, nkondopeka elikwatakano lyoge nomulikwali goge gomupe ‘kapisi kumuhetakanesa namukwawo,’ nye wa hepa kugazadara ko eyi wa mu harera mulikwali goge. (Vagarata 6:4) Mugara gedina Edmond ogu ga ya kwara hena kwa tente asi: “Moomu tupu vantu vavali kapi ava lifana, nonkwara nado kapi adi lifana.”

Ngapi omu no rugana yipo eparu lyomononkwara doge danare li dire kudonganesa nonkwara doge donompe? Jared kwa tente asi: “Ame kwa tanterere mukadange asi nonkwara dange dokuhova kwa fene ngwendi buke zongwa ezi twa tjenge namukadange gokuhova. Poyiruwo noyiruwo, kuvhura ni kudumune mobuke ozo ni rese mo nokudiworoka yihorokwa yanare. Nye eparu olyo lya pita nare. Ngesi name namukadange kuna kutjanga ko buke zapeke, olyo yilyo eparu nina kuhafera.”

HETEKERA KO KURUGANA EYI: Pura mulikwali goge omu a lizuvhu apa o simwitire nonkwara doge dokuhova. Ntani horowora siruwo sokuwapera apa no vhura kusimwitira kuhamena nonkwara doge dokuhova.

UDIGU 2: KUKUDIGOPERA KUKARA NOVAKAUME AVA VA DIRA KUDIVA NAWA MULIKWALI GOGE GOMUPE.

Javier kwa lizumbire namukadendi ano konyima zonomvhura 6 ta ya kwara hena. Age kwa tente asi: “Konyima zapa naya kwere hena, mukadange gomupe nga lizuvhu asi vakaume vange vamwe ngava mu konakona. Mugara gedina Leo kwa ligwanekerere noukaro wokulisiga. Age kwa tente asi: “Vantu vamwe ngava tantere mukadange ame ponili asi awo kwa here mugara gwendi gokuhova.”

EGANO: Hetekera ko kukwata egano malizuvho govakaume woge. Ian, ogu tuna tumbura nare, kwa tente asi: “Poyiruwo yimwe, vakaume kuvadigopera kusimwitira ndi kukara nomuntu ogu va dira kudiva nawa.” Yipo nye, ‘kara nombili nonkenda novantu navenye.’ (Titusa 3:2) Wa hepa kupa siruwo vakaume novanekoro va tambure nonkwara doge donompe. Moomu ono ya kwara ko muntu gomupe, kuvhura o gwane ko hena vakaume wovape. Javier, ogu tuna tumbura  nare, kwa tente asi mwa za siruwo nage namukadendi va ya tulire po elikwatakano novakaume vawo vanare. Ta gwederere ko asi: “Ngovalikwali ose kuhetekera ko kutulisa po vakaume wovape, ano oyo kutuvatera.”

Wa hepa kugazadara ko malizuvho gomulikwali goge nsene kuna kara novakaume woge vanare. Pasihonena, nsene vantu kuna kusimwitira kuhamena nonkwara doge dokuhova, wa hepa kuruganesa nondunge yipo mulikwali goge gomupe a dire kulizuvha udona. Bibeli kutanta asi: “Nonkango da hana mutwe nondungu kuwurura ngwendi rufuro, nye nonkango dounandunge kuverura.”—Yisewe 12:18.

HETEKERA KO KURUGANA EYI: Wa hepa kudiva maukaro aga naga ninkisa mulikwali goge gomupe a lizuvhe udona. Komeho zosiruwo, zogereni omu nomu rugana nsene vakaume woge va pura ndi va uyunga kuhamena nonkwara doge dokuhova.

UDIGU 3: KUKUDIGOPERA KUHUGUVARA MULIKWALI GOGE GOMUPE.

Andrew kwa mu zumbire mukadendi gokuhova, age kwa tente asi: “Na kere nowoma wokuzumba nge.” Konyima ta ya kwara ko Riley. Adrew kwa tente asi: “Ngani lipura nkenye apa nsene ame ni mugara gomuwa. Na kere nosinka asi Riley nga zumba nge a ka kware ko gwapeke morwa kapi na mu wapera.”

EGANO: Pwagesera mulikwali goge malizuvho goge. Bibeli kutanta asi: “Tambura mapukururo nagenye, moomu o vhulire, makura to ragopa.” (Yisewe 15:22) Kupwagesa malizuvho gawo, kwa vaterere Andrew naRiley va lihuguvare. Andrew kwa tente asi: “Ame kwa tanterere Riley asi kapi ngani mu zumba yipo ni henduke maudigu gomononkwara ntani Riley nage ta tumbwidire nge yokulifana. Ngesi nina mu huguvara unene.”

Nsene mulikwali goge gomupe kwa mu zumbire, rugana ko yuma yipo a ku huguvare. Pasihonena, Michel naSabine kwa va zumbire, awo kwa litumbwidira mokulitantera nsene vana ligwanekere ndi vana uyunga kumwe novalikwali vawo wokuhova. Sabine kwa tente asi: “Etumbwidiro olyo kwa tu vatera tu lihuguvare.”—Vaefeso 4:25.

HETEKERA KO KURUGANA EYI: Kapisi o uyunge mokahore-hore nomuntu ga hana asi mulikwali goge yi kare asi koselefoni ndi kotelefona ndi kokompiuta.

Sinzi sava va ya kwara hena nonkwara dawo da va tompoka, nove kuvhura yi ku tompoke. Ngesi ono lidiva nawa kupitakana sikando sokuhova esi wa kwere. Andrew ogu tuna tumbura nare kwa tente asi: “Na gwana mo rufuwo mononkwara dange naRiley. Monomvhura 13 edi twa likwara ose ngesi vakaume wovanene, kapi tuna hara kulisiga.”

^ para. 3 Madina kwa ga rundumuna.

^ para. 5 Malizuvho gokufisa mulikwali goge ga lisiga nsene muna lizumbu nomulikwali goge. Sirongwa esi kwa si tjangera mokuvatera muntu ana fisa mulikwali ntani ogu vana zumbu yipo yi mu tompoke nsene a ya kwara hena.

^ para. 7 Komauzera gamwe kuhamena maudigu gokurera vana woyitumbwena, tara yirongwa, “Omu mapata goyitumbwena naga yi tompoka,” mosifo Awake! Kudumogona 2012, va rugana Nombangi daJehova.

LIPURA . . .

  • Yikara musinke yoyiwa wa hara momulikwali goge?

  • Nsene vantu tava uyunga kuhamena ogu na kwere nare, yisinke nani rugana yipo mulikwali gwange gomupe a dire kulizuvha yoyidona?