Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SOKUHOVA: EVHUMBUKO LYAJESUS—EYI ALI TANTA KOGE

Evhumbuko lyaJesus—Lya horokere sili ndi?

Evhumbuko lyaJesus—Lya horokere sili ndi?

MUNAHISTOLI goMugereka Herodotus, ogu ga parukire nomvhura 2 500 da ka pita, kwa simwitire kuhamena mpo zoVaegipite womosiruwo sina asi: “Posipito sonongawo, konyima zokumana kulya mugara gumwe ta gendagwisa efano lyosimpu sokuhonga sina kara mosikesa, esi va payinda sokusika koyiha yometa zimwe. Age ta si likida kwanavenye ava vana kara po nokuuyunga asi: ‘Nweni nokulihafesa morwa apa ngomu fa ngomu fana ngwendi efano eli.’”

Kapisi Vaegipite velike va kara nonkareso zangoso kuhamena eparu nonomfa. Naina, mbuuyungiso ezi asi: “Tu lyeni nokunwa nokulihafesa,” yizo vana kara nazo vantu. Nsene asi eparu kuhaga ponomfa, hansa kulihafesa siruwo esi ono kara nomwenyo. Morwasinke nye no kondjera kurugana youhunga? Nsene nomfa yido ehagero lyanayinye, ya wapa kulihafesa siruwo esi ono kara nomwenyo. Mupositoli Paurusa nage kwa uyunga ko kuhamena nkareso ezi. Age kwa singwenene nkareso zovantu ava va dilire kupura mevhumbuko pokutanta asi: “Ano vafe nsene kapi ngava va pindura, sa vyuka sa sisewe esi asi, ‘Tu lyeni nye oku tatu nu, yeeyi mungura tatu fu.’”—1 Vakolinte 15:32.

Yimo, Paurusa kapi ga pulire asi vafe kapi ngava va vhumbura. Age kwa pulire asi vafe ngava va vhumbura, nokuparuka narunye. Usili owo kwa korera mosihorokwa somulyo unene, aso kuna kara evhumbuko * lyaJesus Kristusa. Evhumbuko olyo kuna kara sihorokwa esi sa nkondopekere epuro lyovarongwa wokuhova.

Yisinke ali tanta evhumbuko lyaJesus kwetu? Ntani ngapi omu twa yi diva asi alyo sili lya horokere? Tu zeni tu tare omu Paurusa ga fatwilire sihorokwa esi apa ga tjangerere Vakriste womoKolinte.

 YISINKE NGANO YA HOROKERE NGANO KRISTUSA KAPI VA MU VHUMBWIRE?

Vakriste vamwe womoKolinte kwa piyaganene kuhamena evhumbuko lyaJesus, ano vamwe kapi va yi pulire asi alyo sili lya horokere. Mombilive zendi zokuhova ezi ga va tjangerere, mupositoli Paurusa kwa tumbagwire eyi ngano ya horokere ngano Jesus kapi va mu vhumbwire. Age kwa tjenge asi: ‘Nsene asi evhumbuko lyovafe kutupu, ntudi Kristusa nage kapi va mu pindura koufe. Ano nsene Kristusa kapi va mu pindura koufe, nani eudiso lyetu nayimwe si, nepuro lyeni si nalyo ngosikwawo. Nsene yimo ngoso asi vafe kapi ngava va pindura, makura ose nondipo nye doyimpempa daKarunga. Ano epuro lyeni kutupu sikwafo, nani ha mwa kerera mononzo deni. Nava si va fira mokupura Kristusa, ntudi nawo kwa za mezonauko lyanarunye.’—1 Vakolinte 15:13-18.

‘Makura ntani ana kuyamonekera pwarumwe tupu vakwetetu wokupitakana mafere gatano. Ana kuyininka ta ya monekere Jakopo, ntani kovapositoli navenye. Moruhura kwanavenye ntani nye ana kuyamonekera name.’—1 Vakolinte 15:6-8

Paurusa kwa uyungire nonkango edi nava dira kupatana pokutanta asi: Nsene asi vafe kapi ngava va pindura, naKristusa nage si ngano kapi va mu pindura koufe. Ngano Kristusa kapi va mu pindwire koufe, yisinke ngano ya horokere? Ngano sirugana sokuzuvhisa mbudi zongwa tasi kara somawoko-woko. Ano evhumbuko lyaKristusa kuna kara etateko lyepuro lyoVakriste, eli lya likwatakana kumwe nomarongo goBibeli kuhamena upangeli waKarunga nedina lyendi noUhompa wendi ntani neparuro lyetu. Nsene asi ngano evhumbuko eli kapi lya horokere, mbudi ezi ga zuvhisire Paurusa novapositoli wopeke ngano kwa kere zomawoko-woko.

Ngano ya reta maudigu gamwe hena. Nsene Kristusa ngano kapi va mu pindwire koufe, epuro lyoSikriste ngano kwa kara lyomawoko-woko. Mokugwederera ko, Paurusa novakwawo ngano kwa zuvhisa yimpempa kuhamena evhumbuko lyaJesus ntani nogu ga mu vhumbwire, Jehova Karunga. Ntani hena, nonkango edi asi “Kristusa kwa fira nonzo detu” ngano kwa ya kara nonkango doyimpempa, morwa nsene Muzowoli mwene kapi va mu pindura koufe, nage ngano kapi ta vhuru kuzowora wopeke. (1 Vakolinte 15:3) Ayo ngano ya tente asi Vakriste ava va fa morwa epuro lyawo mwaKristusa, kwa fa nehuguvaro lyoyimpempa asi awo ngava va vhumbura.

Yipo nye Paurusa ga tente asi: “Ose nsene asi kwa huguvarera Kristusa googu mwenyo gwepevhu gwelike, ose vanamahudi unene, twa pitakana navenye.” (1 Vakolinte 15:19) Ngwendi Vakriste wopeke, Paurusa kwa mu hepekere unene pokumutoona nokulididimikira maudigu ntani nokumupangwira konomfa morwa ga pulire mevhumbuko lyaKristusa neyi ngali ka sikisa mo. Ee, udona musi asi ngano evhumbuko kwa kere tupu esanseko lyoyimpempa!

EYI NO PULIRA MEVHUMBUKO

Paurusa kapi ga pulire momasanseko goyimpempa asi evhumbuko lyaJesus kapi lya horokere. Age ga divire asi Jesus va mu pindwire koufe, makura ta tantere Vakriste womoKolinte kuhamena eyi ya horokere asi: “Kristusa kwa fira nonzo detu, moomu ga tanta matjangwa, hena asi kwa mu vhumbika, yiyo va mu pindura koufe mezuva lyautatu, moomu ga tanta matjangwa. Makura ta monekere Peturusa, ntani ana kuyamonekera vena murongo navavali.” * Age makura ta gwederere ko asi: “Makura ntani ana kuyamonekera pwarumwe tupu vakwetetu wokupitakana mafere gatano, sinzi sawo simpe poveli, nye vamwe va fa. Ana kuyininka ta ya monekere Jakopo, ntani kovapositoli navenye. Moruhura kwanavenye ntani nye ana kuyamonekera name.”—1 Vakolinte 15:3-8.

 Paurusa ga tamekere nononkango dokupama asi Kristusa kwa fira nonzo detu yiyo va mu vhumbika, makura tava ya mu vhumbura. Yisinke ya ninkisire Paurusa a uyunge nonkango dokupama ngoso? Konda zimwe kuna kara asi umbangi wokovantu wovanzi. Apa va mu vhumbwire, Jesus ga monekerere vantu vamwe (kukwatera mo Paurusa mwene) nokonombunga, ntani pwarumwe kombunga zonene zokusika ko-500, ano sinzi sawo pomuhowo kapi va pulire mevhumbuko lyaJesus. (Rukasa 24:1-11) Sinzi sovantu ava kwa kere simpe vazuni mosiruwo soPaurusa ntani nkenye ogu ya mu pere mpito zokuvhura kuvapura kuhamena emoneko eli. (1 Vakolinte 15:6) Umbangi womuntu gumwe ndi vavali ureru kuupatana, nye kapisi umbangi wovantu 500 ndi wokupitakana opo.

Koneka hena asi Paurusa ruvali ga tumbwire asi nomfa nevhumbiko ntani nevhumbuko lyaJesus kwa horokere ngwendi “moomu ga tanta matjangwa.” Yihorokwa oyo kwa likidire asi mauporofete gomoMatjangwa goRuhebeli kuhamena Mesiyasa kwa sikililire mo, nokulikida asi Jesus sili yige Mesiyasa getumbwidiro.

Kugusa ko umbangi wovantu ava va yi mwene ntani womoMatjangwa, pwa kere ntani poveli ava va dira kupura mevhumbuko lyaJesus. Vamwe kuuyunga asi simpu saJesus kwa si veke mo varongwa vendi ava va ya tente asi va mwene evhumbuko lyendi. Nampili ngoso, varongwa kapi va kere nononkondo dokuzeda vanomeni woVaroma ava va sikeme kontoko zina. Vamwe kutanta asi sihorokwa sevhumbuko kwa kere emoneko tupu. Eyi ayi lirwanesa negano olyo kuna kara asi Jesus kwa monekerere vantu wovanzi poyiruwo yokulisiga-siga. Ntani umbangi umwe hena kuna kara asi Jesus kwa dosere nomfi nokudigavera kovarongwa vendi moGalireya va lye. (Johanesa 21:9-14) Ngano Jesus ga pulire  varongwa vena va hingilire monzugo va mu gume nsene asi alyo kwa kere emoneko tupu ndi?—Rukasa 24:36-39.

Vamwe kwa pura asi evhumbuko kuna kara tupu esimwititi eli va totere po varongwa. Nye uwa musinke ngano va gwanenene mo mokutota po esimwititi lyangoso? Kugavera umbangi wevhumbuko lyaJesus ya ninkisire varongwa va va swaure nokuvahepeka ntani nokuvadipaga. Morwasinke nava litulira momaudigu gangoso nsene alyo esanseko lyoyimpempa? Mokugwederera ko, pomuhowo varongwa kwa geve umbangi moJerusarema komeho zovarwanesi vawo ava va here kuvapangura.

Evhumbuko kuna kara sininke esi sa nkondopekere varongwa mokugavera umbangi kuhamena Hompa gwawo nampili momahepeko gomanene. Evhumbuko kuna kara etateko lyepuro lyoSikriste. Vakriste ava va hovere kapi va tulire maparu gawo mosiponga morwa kuhara tupu kugavera umbangi kuhamena murongi gonondunge ogu va dipagere. Awo kwa yi ruganenene morwa evhumbuko kwa likidire asi age sili yige Kristusa, MunwaKarunga, muntu gononkondo ogu ga va kwatesere ko nokuvapitisira. Evhumbuko lyendi kwa likidire asi nawo ngava va vhumbura koufe. Yosili, ngano Jesus kapi va mu pindwire koufe ngano kapi kwa kara Ukriste. Ngano Jesus kapi va mu vhumbwire koufe, nose ngano kapi twa mu diva.

Yinke ali tanta evhumbuko lyaKristusa kwetu naina?

^ para. 5 MoBibeli, nkango zoRugereka va toroka “evhumbuko” kutanta asi: “kusikama hena.” Azo kufaturura asi muntu kuvhura kutengwira hena keparu nokufana moomu ga fene nomagazaro ntani noyikara yendi.

^ para. 13 Vena “murongo navavali” kuna tamba “vapositoli,” nampili ngomu va kere 11 pokaruwogona, morwa Judasa Isikalyoto kwa ka lidipagere mwene. Posiruwo simwe, vapositoli 10 tupu ga monekerere Jesus morwa Tomasa kapi ga kere po.—Johanesa 20:24.