Zende koyikaramo

Zende koyikaramo

Nombangi daJehova

Horowora eraka Rukwangali

Mosesa—Mugara geharo

Mosesa—Mugara geharo

YISINKE EHARO?

Eharo kwa hamena mo malizuvho goge kwava wopeke. Muntu geharo kuyilikida mombuuyungiso nomoyirugana yendi omu a lizuvhu kuhamena ava ga hara, nampili kurugana ngoso kuhepa elizambero.

NGAPI OMU MOSESA GA LIKIDIRE EHARO?

Mosesa kwa likidire eharo kwaKarunga. Monkedi musinke? Nonkango domwa-1 Johanesa 5:3 kutanta asi: “Eharo lyetu lyokuhara Karunga lyeli asi, ose atu sikise mo yipango yendi.” Mosesa kwa parukire kuliza nononkango odo. Mosesa kwa limburukwire nayinye eyi ga mu pulire Karunga a rugane, pasihonena, ngwendi apa va mu pere situmbukira soudigu sokukauyunga nahompa Farawo nokuzerura mburo zendi a gonwene kuwoko kwendi kontunda zEfuta lyEgeha. Yi kare asi mpango ozo kwa kere ureru ndi udigu kuzisikisa mo, Mosesa kwa zi limburukwire. “Makura ta rugana nayinye moomu tupu ga mu pangerere HOMPA.”—Exodus 40:16.

Mosesa kwa likidire eharo koVaisraeli vakwawo. Awo va yi divire asi Jehova kwa ruganesere Mosesa a va pitisire, yipo va hedererere Mosesa va mu tantere maudigu gawo gokulisiga-siga. Tatu resa asi: “Vantu tava sikama pwaMosesa, kutunda ngurangura dogoro ngurova.” (Exodus 18:13-16) Gazara tupu eroroko eli ga kere nalyo Mosesa konyima zokupurakena koVaisraeli ngomu va mu tanterere maudigu gawo ezuva nalinye! Nampili ngoso, Mosesa kwa hefe mokuvatera vantu ava ga here.

Kugusa ko kuvapurakena, Mosesa ga kandererere po vantu ava ga here. Ntani age ga kandererere po nava ngava tura nonzo. Pasihonena, apa mukurwaMosesa, Miliyama, ga tangwisire Mosesa, Jehova yipo ga mu tengekere nouvera woyingondwe. Mevango lyokuhafa asi vana mu tengeke, Mosesa poopo ta mu kanderere po asi: “Ani Karunga, yingasi mu verura!” (Numeri 12:13) Eharo yilyo lya ninkisire Mosesa a kanderere po Miliyama.

YISINKE NATU LIRONGERA KO?

Ose kuvhura kuhonena Mosesa pokutunga po eharo lyenene kwaKarunga. Eharo lyangoso kututumangeda tu limburukwe nompango dendi “nonomutjima nadinye.” (Varoma 6:17) Apa atu limburukwa Jehova nomutjima nagunye, ose kumuhafesa. (Yisewe 27:11) Ose hena kugwanena mo uwa. Apa atu karere Karunga morwa twa mu hara, ayo kapisi yininke tupu youhunga kurugana nye hena kutuhafesa pokuyirugana!—Episarome 100:2.

Nkedi zimwe omu natu vhura kuhonena Mosesa kuna kara pokutunga po eharo lyokulizambera kwava wopeke. Apa vakaume nekoro lyetu ava tu tantere yinka yawo, eharo kututumangeda (1) tu va purakene nomutjima nagunye; (2) tu kwate egano omu vana kulizuvha; ntani (3) tu va likide asi ose kuvapakera mbili.

Ngwendi Mosesa, nose kuvhura tu kanderere po ava twa hara. Apa ava tu tantere maudigu gawo, pamwe kuvhura tu lizuvhe asi kwato eyi natu vhura kurugana ko. Kuvhura tu va tantere noruguwo asi: ‘Eyi nani vhura kurugana ko ntudi kukukanderera po.’ Nye diworoka asi: “Ekanderero lyomutjima nagunye lyomuhungami, kwa kara nononkondo dononene.” (Jakopo 5:16) Makanderero getu kuvhura ga tumangede Jehova a rugane ko yuma komuntu ogo. Yosili, aso sininke sosiwa sokukanderera po ava twa hara! *

Nove no yi kwatesa ko asi kuvhura tu lirongere ko yoyinzi kwaMosesa. Nampili ngomu ga kere muntu ngwendi nyose, age ga tulire po sihonena sosiwa sepuro nelinunupiko neharo. Moomu tuna kukwama sihonena sendi, yimo ngatu gwanena mo mauwa kumwe nava wopeke.—Varoma 15:4.

^ para. 8 Mokuninka asi Karunga a purakene komakanderero getu, twa hepa kukondja mokusikisa mo nompango dendi. Komauzera gomanzi, tara egaununo 17 mobuke Yinke azi rongo Bibeli sili? va nduruka Nombangi daJehova.