Zende koyikaramo

Zende koyikaramo

Liwapaikira ngesi eparu mouzuni woupe

Liwapaikira ngesi eparu mouzuni woupe

‘Va korangeda va rugane yoyiwa, . . . nkumwe ngava gwane mwenyo gwanarunye gosili.’—1 TIMOTEUSA 6:18, 19.

MARUSUMO: 125, 40

1, 2. (a) Yisinke ono kundindira moParadisa? (Tara efano.) (b) Yisinke ngayi ka tu pa ruhafo rorunene mouzuni woupe?

OSE kuna kundindira “mwenyo gwanarunye.” Mupositoli Paurusa kwa gu singwenene asi “mwenyo gwanarunye gosili.” (Resa 1 Timoteusa 6:12, 19.) Kwavamwe, eyi ngayi ka tanta asi ngava ka parukira narunye pevhu moParadisa. Ayo ngayi ka tu hafesa pokupinduka noukanguki wouwa noruhafo nkenye ngurangura. (Jesaya 35:5, 6) Gazara tupu omu ngayi ka wapa kukakara kumwe novanekoro novakaume ntani nowo ngava ka vhumbura. (Johanesa 5:28, 29; Yirugana 24:15) Ngo ka kara nosiruwo sokulironga nokudiva yininke yoyipe nokukayihafera. Pasihonena, kuvhura o ka lironge yoyinzi kuhamena unsitwe. Ndi kuvhura o ka lironge kusika nomusika ndi kudika embo lyanyamoge.

2 Nampili ngomu tuna kundindira yininke nayinye eyi yoyiwa, kukarera Jehova yiyo ngayi tu pa ruhafo  rorunene. Gazara tupu omu ngali ka fana eparu apa vantu navenye ngava ka pongora edina lyaKarunga ntani nokumutambura ngoMupangeli gwawo. (Mateusa 6:9, 10) Ngayi tu hafesa mokukamona evhu lina zura vantu wokusikilira mo ngomu ga yi harerere Karunga. Ntani ngayi ka tu rerupira kunkondopeka ukaume wetu naJehova ngomu ngatu ka sikilira mo kanunu-kanunu!—Episarome 73:28; Jakopo 4:8.

3. Yisinke twa hepa kurugana ngesi?

3 Twa yi diva asi Jehova Karunga nga rugana yininke eyi yoyiwa morwa kwendi “nayinye ureru.” (Mateusa 19:25, 26) Nsene tuna hara kukaparuka mouzuni woupe, ngesi yiso siruwo sokukondja yipo tu ka ‘gwane mwenyo gwanarunye.’ Tuna yi diva asi uhura pepi una kara, yipo twa hepera kuparuka monkedi ezi azi likida asi uhura kuvhura u wize nkenye siruwo. Twa hepa kulitura mo unene ngesi mokuliwapaikira eparu mouzuni woupe. Ngapi natu yi rugana?

OMU NO LIWAPAIKIRA

4. Ngapi natu liwapaikira ngesi eparu mouzuni woupe? Gava sihonena.

4 Ngapi natu liwapaikira ngesi eparu mouzuni woupe? Nsene kuna liwapaikira kukatunga kosirongo sapeke, kuvhura tu liwapaikire eparu lyomosirongo oso. Pasihonena, kuvhura tu tameke kulironga eraka nonompo dovantu ava va tunga mo. Kuvhura tu heteke ko kumakera nondya dawo. Mokulifana, kuvhura tu liwapaikire eparu mouzuni woupe pokuparuka ngwendi nare yimo tuna kara. Tu konakoneni nonkedi dimwe omu natu yi rugana.

5, 6. Ngapi omu kulimburukwa mavyukiso gombunga zaJehova ngayi tu vatera tu liwapaikire eparu mouzuni woupe?

5 Mouzuni ou, Satana kuna harere vantu va gazare asi kuvhura va rugane nkenye eyi vana hara. Wovanzi kulizuvha asi ayo mulyo kulipangera vene ntani kapisi hepero kulimburukwa kwaKarunga. Yitundwamo? Ruhepo noruguwo. (Jeremiya 10:23) Nye Jehova, Mupangeli geharo. Ee, omu tupu ngali ka wapa eparu mouzuni woupe apa navenye ngava ka mu limburukwa!

6 Mouzuni woupe, ngatu ka hafera kukwama mavyukiso gombunga zaJehova mokukaninka evhu li ka kare paradisa zongwa ntani nokukaronga ava ngava ka vhumbura. Jehova nga ka tu pa yirugana yoyinzi. Ngapi nsene ava ava pitisire va tu pura tu rugane yininke yongandi eyi twa dira kuhara? Tatu limburukwa ndi? Ngatu kondja mokuyisikisa mo nokuyihafera ndi? Mokuliwapaikira eparu mouzuni woupe, twa hepa kulimburukwa ngesi mavyukiso gombunga zaJehova.

7, 8. (a) Morwasinke natu ruganena kumwe nava vana kupitisira? (b) Marunduruko musinke va ligwanekera nago Vakriste vamwe? (c) Yisinke ngatu ka hafera mouzuni woupe?

7 Mokuliwapaikira eparu mouzuni woupe, twa hepa kulironga kuruganena kumwe nombunga zaJehova ntani novakwetetu. Pasihonena, nsene tu gwana sirugana sosipe, twa hepa kusitambura noruhafo nokusisikisa mo. Nsene tu ruganena kumwe nava vana kupitisira  ngesi, mouzuni woupe ngayi ka tu rerupira. (Resa Vahebeli 13:17.) Apa Vaisraeli va hwililire moSirongo sEtumbwidiro, kwa va pere mavango oku nava tunga. (Numeri 26:52-56; Josuwa 14:1, 2) Kapi tuna diva nkenye gumwe gwetu oku ngava ka mu pera evango lyokukatunga mouzuni woupe. Nye nsene tu lironga kuruganena kumwe, ngatu ka hafera kukarugana mpango zaJehova nkenye oku ngatu ka tunga.

8 Gazara tupu omu ngayi ka wapa kukarera Karunga mouzuni woupe mepangero lyoUhompa. Eyi yiyo ya karera nomulyo kuruganena kumwe nombunga zaJehova ngesi nokurugana nkenye eyi zina kutupura. Poyiruwo yimwe kuvhura va tu rundwilire kosirugana sapeke. Pasihonena, Vabeteli vamwe womoAmerika kwa va tuma mosirugana sokuzuvhisa. Ano morwa ukurupe ndi maukaro gongandi, vatareli vamwe wokudingura kwa va tura va kare vazuvhisi wosiruwo nasinye. Awo kuhafera sirugana sawo sosipe ntani Jehova kuvatungika. Nsene tu hundira Jehova a tu vatere, nokukondja mokumukarera ntani nokuhafera nkenye sirugana vana tu pe, ose ngatu hafa ntani Jehova nga tu tungika. (Resa Yisewe 10:22.) Ngapi nsene mouzuni woupe mbunga zaJehova ngazi ka tu pura tu ka tunge kevango lyapeke nye ose kwa hara kutunga pevango limwe lyongandi? Yomulyo po kapisi oku ngatu ka tunga nye eyi ngatu ka rugana. Ose ngatu ka hafa asi kuna kuparuka mouzuni woupe.—Nehemiya 8:10.

9, 10. (a) Morwasinke ngatu hepera elididimiko mouzuni woupe? (b) Ngapi natu likida asi twa kara nelididimiko ngesi?

9 Mouzuni woupe, poyiruwo yimwe ngatu ka hepa elididimiko. Pasihonena, kuvhura ngatu ka zuvhe asi vantu vamwe vana hafa morwa vanekoro novakaume vawo vana va vhumbura. Ngatu ka hepa kukandindira va ka vhumbure vanekoro vetu. Nsene ngayi ka horoka oyo, ngatu ka hafesa ko vakwetu nokukalididimikira ndi? (Varoma 12:15) Nsene tu lironga kundindira nelididimiko ngesi Jehova a sikise mo matumbwidiro gendi, ngayi ka tu vatera komeho mouzuni woupe.—Muudisi 7:8.

10 Kuvhura hena tu liwapaikire mouzuni woupe pokulididimika apa atu gwana marunduruko mekwatogano lyetu kuhamena usili woBibeli. Ose kulironga mauzera aga gomape, nokundindira nedidimiko nsene kapi tuna kuyikwata nawa egano ndi? Nsene yimo, mouzuni woupe ngayi ka tu rerupira kulididimikira nkenye apa Jehova nga ka tu pa mavyukiso gomape.—Yisewe 4:18; Johanesa 16:12.

11. Morwasinke natu lirongera kudongwenena po wopeke ngesi, ntani ngapi ngayi ka tu vatera mouzuni woupe?

11 Nkedi zimwe natu liwapaikira eparu mouzuni woupe kuna kara pokulironga kulidongwenena po. MoNomvhura  Eyovi dEpangero lyaKristusa, kuvhura ngayi ka guse siruwo kwanatuvenye mokukasikilira mo. (Yirugana 24:15) Ngatu ka lilikida eharo nokukadongwenena po ndi? Nsene tu lironga ngesi kulidongwenena po nokukara nelikwatakano lyewa novakwetu, mouzuni woupe ngayi ka kara ureru.—Resa Vakorosi 3:12-14.

Mouzuni woupe ngatu ka hepa yikara eyi ana kuturonga Jehova ngesi

12. Morwasinke natu liwapaikilira ngesi eparu mouzuni woupe?

12 Mouzuni woupe, kuvhura ngatu dire kukagwana nayinye eyi twa hara ndi ngatu hepa kukayindindira. Twa hepa kukahafera nkenye ukaro ou ngatu ka kara nawo. Ngatu ka hepa yikara eyi ana kuturonga Jehova ngesi. Nsene tu likida yikara eyi ngesi, tatu likida asi uzuni woupe yipo ngau kara ntani kuna kuliwapaikira eparu lyanarunye. (Vahebeli 2:5; 11:1) Ntani tatu likida asi tuna hara kukaparuka mouzuni omu navenye ngava ka limburukwa Jehova.

DEMENENA KOKUKARERA JEHOVA

Kuzuvhisa mbudi zongwa noupampi

13. Yisinke ngatu ka tura muhowo mouzuni woupe?

13 Mouzuni woupe, ngatu ka kara nanayinye eyi twa hepa mokuhafera eparu. Nye eyi ngayi ka tu pa ruhafo rorunene, elikwatakano lyetu naJehova. (Mateusa 5:3) Ose ngatu ka litura mo mosirugana saJehova ntani nokukahafera kumukarera. (Episarome 37:4) Yipo nye, nsene tu tura Jehova muhowo meparu lyetu, ose ngoso kuna kuliwapaikira eparu mouzuni woupe.—Resa Mateusa 6:19-21.

14. Yitambo musinke vadinkantu nava litulira po mosirugana saJehova?

14 Ngapi natu hafera kukarera Jehova? Pokulitulira po yitambo. Nsene o mudinkantu, gazadara ko unene kuhamena kuruganesa eparu lyoge  mokukarera Jehova. Ayo ya wapa kurugana mapaparo moyimbapiratjangwa yetu kuhamena yirugana yokulisiga-siga yosiruwo nasinye. Kuvhura o litulire po sitambo simwe. * Zogera nava va karera Jehova nomvhura dononzi mosirugana oso. Nsene o ruganesa eparu lyoge mokukarera Jehova, ngo gwana edeuro lyewa. Edeuro eli ngali ka ku vatera mouzuni woupe.

Kulitulira po yitambo mosirugana saJehova

15. Yitambo musinke natu litulira po mosirugana saJehova?

15 Yitambo yinzi natu litulira po mosirugana saJehova. Pasihonena, kuvhura tu litulire po sitambo sokulironga nkedi zompe zokuzuvhisa. Ndi kuvhura tu kwate nawa egano nompango doBibeli nokulironga omu natu di sikisa mo meparu lyetu. Kuvhura tu wapukurure nkedi zetu zokuresa ndi zokugava yiuyungwa ndi zokulimburura komapongo. Nsene o litulira po yitambo mokukarera Jehova, ngayi ku vatera o kare noupampi nokuliwapaikira eparu mouzuni woupe.

NKEDI ZONGWA PO ZEPARU

Kara norupandu kwanayinye eyi a ku pe Jehova

16. Morwasinke kukarera Jehova za karera nkedi zongwa po zeparu?

16 Apa atu ruganesa siruwo setu mokuliwapaikira uzuni woupe waKarunga, ose ngoso kuna kuzumbanesa eparu lyewa mouzuni ou ndi? Hawe! Kukarera Jehova yizo nkedi zongwa po zeparu. Kapi atu karere Jehova morwa kutusininika ndi tu ka paruke poudigu wounene. Apa atu kara nelikwatakano lyewa naJehova eparu lyetu kuwapa ntani kukara noruhafo. Monkedi ezi yimo ga tu harera tu paruke. Pokutuhara Jehova nokugwana mavyukiso gendi kureta uwa meparu lyetu kupitakana nkenye eyi. (Resa Episarome 63:1-3.)  Kuvhura tu lizuvhe ruhafo rokukarera Jehova nomutjima nagunye. Vamwe ava va karera Jehova nomvhura dononzi kuvhura va uyunge asi ezi kuna kara nkedi zongwa po zeparu.—Episarome 1:1-3; Jesaya 58:13, 14.

Papara mavyukiso moBibeli

17. MoParadisa ngamu ka kara malihafeso ntani noyilihafeso ndi?

17 MoParadisa, ngatu ruganesa siruwo setu simwe koyininke eyi twa hara ntani nokulihafesa. Jehova yige ga tu sita neharo lyokulihafesa, ntani kwa tumbwidira asi nga ka ‘kutika nayinye.’ (Episarome 145:16; Muudisi 2:24) Twa hepa yilihafeso nepwizumuko, nye apa atu tura muhowo Jehova meparu lyetu, ose kuyihafera unene. Yimo ngayi ka kara ngoso mouzuni woupe. Yipo nye ya wapera asi tu ‘hove tanko kupapara Uhompa waKarunga’ ntani nokudemenena komatungiko aga atu gwana pokumukarera.—Mateusa 6:33.

Apa atu kara nelikwatakano lyewa naJehova eparu lyetu kuwapa ntani kukara noruhafo

18. Ngapi natu likida asi ose kuna kuliwapaikira kukaparuka narunye moParadisa?

18 Mouzuni woupe, eparu ngali ka wapa kupitakana omu atu yi gazara. Ngano tu likide asi tuna hara kukakara mo pokuliwapaikira ngesi mokukagwana “mwenyo gwanarunye gosili.” Tu tungeni po yikara eyi ana kuturonga Jehova ntani nokukara nomupampi mokuzuvhisa mbudi zongwa. Ngano tu gwane ruhafo rokutunda mokutura muhowo ukareli waJehova meparu lyetu. Ose twa kara nehuguvaro lyokupama asi Jehova nga ka rugana nayinye eyi ga tumbwidira. Yipo nye, tu parukeni ngwendi nare mouzuni woupe tuna kara!

^ para. 14 Tara buke Young People Ask—Answers That Work, Volume 2, epenuno 311-318.