Zende koyikaramo

Zende koyikaramo

Nombangi daJehova

Horowora eraka Rukwangali

Awo kwa ligeve vene—moNew York

Awo kwa ligeve vene—moNew York

NOMVHURA dongandi da ka pita, Cesar namukadendi, Rocio womoKalifoniya, kwa kere neparu lyokuzeruka, omu Cesar nga rugana kongesefa zonomahina dokugava mpepo zontenda nezi zompyu, ano Rocio nga rugana harufa zezuva momberewa zandokotora. Awo kwa kere nembo ntani kwato vanona. Nye koyili ya horokere eyi ya rundwilire eparu lyawo. Yininke musinke oyo?

MwaSikukutu 2009, mberewa zomutayi zomoAmerika kwa tumine mbilive konombungakriste, mokuhundira valizambeli ava va kara noudivi va ture mo mahundiro gokukarugana karuwogona koBeteli mokukavatera enenepeko lyomberewa zaWallkill, moNew York. Nampili ava va pitakana ponomvhura 35 nawo kwa va zigidire. Cesar naRocio kwa tanta asi: “Morwa nomvhura detu, ose twa yi divire asi ezi kuna kara mpito zelike zokuvhura kukarugana koBeteli. Kapi twa here kuzumbanesa mpito ozo!” Valikwali ava yipo va tulire mo ehundiro.

Valizambeli vamwe ava vana kurugana koWarwick

Kwa pitire po mvhura zimwe, va hana kuvatambura koBeteli. Nampili ngoso, awo kwa rugene ko yuma mokusikisa mo sitambo sawo pokurerupika eparu lyawo. Cesar kwa tanta asi: “Ose kwa ninkire ngarase zetu zi kare nzugo yipo tu wape kuheheresa embo lyetu kwagumwe. Makura tatu diruka membo lyetu lyenene eli twa tungire nomvhura dongandi da ka pita nokudirukira monzugo zonunu. Kutura po marunduruko gangoso, kwa tu vaterere va tu tambure koBeteli, mpito ezi atu gwana rumwe tupu meparu.” Kutunda opo, yisinke ya horokere? Rocio kwa simwitira asi: “Konyima zokwedi kumwe zapa twa dirukilire monzugo zonunu, ose kwa gwene ezigido lyokukarugana ngovalizambeli wokaruwogona koWallkill. Ayo kwa tu zererere asi pokurerupika eparu lyetu, kwa pere Jehova mpito zokututungika.”

Jason naCesar, ntani William

 KWA VA TUNGIKA MORWA NKARESO ZAWO ZELIZAMBERO

Ngwendi Cesar naRocio, vanavazinyetu mafere kwa tura po malizambero yipo va ya lihameke mosirugana setungo esi sina kara mositata saNew York. Sinzi sawo kuna kuvatera kenenepeko lyomberewa Wallkill, ano vamwe ketungo lyomberewa zonene zomoWarwick. * Sinzi sovalikwali kwa siga mambo gawo gomawa noyirugana yawo ntani noyikorama yawo eyi va weka yipo va karere Jehova momunene. Jehova ga tungika elizambero lyawo ndi? Nhi, ga va tungika!

Way

Pasihonena, Way, ogu a rugana noyikwamarutjeno, ntani mukadendi Debra, wonomvhura dokoyiha 50 ngoso womoKansas, kwa randesa embo lyawo noyiweka yawo nokudirukira koWallkill va ka kare vavateli wokoBeteli. * Nampili ngomu pwa hepa malizambero meparu, awo kulizuvha asi malizambero gangoso mulyo unene. Kuhamena sirugana sawo sokoBeteli, Debra kwa tanta asi: “Poyiruwo yimwe ame kulizuvha asi name nina hamene mosirugana setungo matungo gomoParadisa aga ava likida moyimbapiratjangwa yetu!”

Melvin naSharon wokoMbindakano zaKarolina kwa randesa embo lyawo noyiweka yawo yipo va wape kuvatera koWarwick. Nampili ngomu ya kara udigu kutura po marunduruko gangoso, valikwali owo kulizuvha mfumwa mokulihameka mosirugana sangesi setungo. Awo kwa tanta asi: “Ayo kutuhafesa pokudiva asi kuna kusikisa mo sininke esi ngasi retera mauwa mbunga zaJehova mouzuni mudima.”

Kenneth

Kenneth, ogu ga hageka yirugana yendi yokutunga, naMaureen, wonomvhura dokoyiha 50 ngoso, kwa diruka moKalifoniya va ka rugane ketungo lyaWarwick. Awo kwa tura po mawapaiko namunazinyetukadi gomombungakriste yipo a pakere mbili embo lyawo ntani nokuhundira ekoro lyawo li pakere mbili oguhwe vaKen wokukurupa. Awo kulivera kweyi va tura po malizambero yipo va ka rugane koBeteli ndi? Hawe! Ken kwa tanta asi: “Ose kuna kugwanena mo mauwa gomanzi. Kwato maudigu ndi? Hawe, nye ose kuna kuparuka nawa, ntani kuna kuharera wopeke va ya lihameke mosirugana esi.”

KUFUNDA PO YILIMBIKISO

Navenye ava va ligava vene va hepere kufunda po yilimbikiso yongandi. Pasihonena, William naSandra, wonomvhura dokoyiha 60 ngoso, ava va tungire momukunda gwaPennsylvania, kwa haferere  eparu. Awo kwa kere nongesefa ezi azi rugana maruha gonomahina, omu va kutire vantu 17. Awo kwa kere mombungakriste omu va kulira kutunda kounona wawo, ntani sinzi sekoro lyawo kwa tungire momukunda ogo. Apa mpito za monekere zokukakara vavateli koWallkill, awo va yi divire asi va hepa kusiga vakaume ntani nanayinye eyi va yikire. William, kwa tanta asi: “Ayo kwa kere udigu kusiga doropa zetu zongwa.” Nye konyima zokuyitura momakanderero, valikwali va tokwere kudiruka ntani kapi vana kulivera. William, kwa tanta asi: “Ruhafo oru tuna kara naro ntani nokuruganena kumwe nepata lyoBeteli nokuvhura si kuyihetakanesa nankenye eyi twa siga. Name naSandra ngesi tuna hafa kupitakana pwanare!”

Valikwali vamwe ava vana kurugana koWallkill

Ricky, mugendesi gosirugana setungo moHawaii, kwa mu zigidire a ka rugane ngomuvateli koBeteli mokukakwatesa ko sirugana sokoWarwick. Mukadendi, Kendra, kwa mu harerere a tambure ezigido olyo. Nye va kere nosinka sokupakera mbili munwawo gomumati Jacob, gonomvhura 11. Awo kwa lipulire nsene ya wapa mokukakara mositata saNew York ntani nsene munwawo nga vhura kukayika mparukiso zompe.

Ricky kwa tanta asi: “Sitambo setu simwe kwa kere sokukakara mombungakriste omu mwa kara vadinkantu ava va kara nelikwatakano lyewa naJehova. Ose kwa harerere Jacob a kare novakaume wovawa.” Nye mbungakriste ezi va ka kere kwa kara mo Vabeteli wovanzi nye vadinkantu vasesu. Ricky kwa tanta asi: “Konyima zepongo lyetu lyokuhova, ame kwa pulire Jacob omu ga lizuvhire kuhamena mbungakriste zompe, unene po mokumona asi mwato vanona vepupi lyendi. Age kwa tanterere nge asi: ‘Tate, mwa ha kara nosinka. Vakaume vange ngava kara vadinkantu womoBeteli.’”

Jacob novakurona vendi kuna kuhafera ukaume noVabeteli womombungakriste zawo

Yosili, Vabeteli kwa ya tulisire po ukaume naJacob. Yitundwamo? Ricky kwa tanta asi: “Esiku limwe, apa na ya pitire konzugo zendi tani mono noramba kuna kutema. Ame kwa gazarere asi age kuna kudana maudano gokokompiuta nani nye kuna kuresa Bibeli! Apa na mu pulire eyi ana kurugana, age kwa tente asi: ‘Ame Mubeteligona, nina hara kumana kuresa Bibeli nazinye momvhura.’” Ricky naKendra kwa hefe unene, kapisi morwa Ricky ta ya lihameke mosirugana setungo koWarwick nye hena morwa ediruko eli kwa vaterere munwawo a kare nelikwatakano lyewa naJehova.—Yis. 22:6.

KUDIRA KUKARA NOSINKA SEYI YOKOMEHO

Luis naDale

Sirugana setungo sokoWallkill nesi sokoWarwick ntaantani ngasi pwe, ava vana kuvatera va yi diva asi sirugana sawo sopokaruwogona tupu. Vanavazinyetu ava vana kara nosinka kuhamena oku  ngava ka kara ntani neyi ngava ka rugana ndi? Hawe! Wovanzi kulizuvha ngwendi valikwali wokoFlorida. John, mugendesi getungo namukadendi Carmen, ava vana kuvatera koWarwick kwa tanta asi: “Ose twa mona omu Jehova ga tu pakera mbili. Ose twa yi diva asi Jehova kapi ga tu reta oku makura konyima nga tu sige.” (Epis. 119:116) Luis, ogu a wapaike yokudimisisa mundiro, ntani namukadendi Quenia, nawo kuvatera koWallkill. Awo kwa tanta asi: “Ose twa mona ugavi waJehova monkedi omu ga tu pakera mbili. Nampili ngomu tuna dili kudiva eyi ngayi horoka komeho, ose  twa kara nehuguvaro asi nga twikira kutupakera mbili.”—Epis. 34:10; 37:25.

‘NGA MU TJUKUMWINA YOYINZI YOYIWA’

John naMelvin

Wovanzi ava va vatera kosirugana setungo moNew York kapi ngano va lizamberere. Nye, va hetekere Jehova, ngomu tupu ana kutuzigida natuvenye asi: “Hetekeni nge, ngomu mone tani zegurura makende geguru ni mu tjukumwine yoyinzi yoyiwa yomarudi nagenye.”—Mara. 3:10.

Nove ngo heteka Jehova nokulimonena yoyinzi yoyiwa ndi? Gazadara ko eyi no vhura kurugana yipo o lihameke mosirugana esi somulyo, yi kare asi moNew York ndi komavango gapeke vana kutunga matungo goUhompa, nokulimonena omu Jehova nga ku tungika.—Mar. 10:29, 30.

Gary

Dale, ogu a faneke omu nava tunga matungo naCathy, womoAlabama, kuhafera unene sirugana esi. Pokuvatera koWallkill, awo kwa tanta asi: “Nsene o lizambera mokusiga eparu lyoge lyewa, ove ngo gwana mpito zokulimonena omu Jehova ana kukutungika.” Yisinke ya hepa po mokulizambera? Dale kwa tanta asi: “Wa hepa kurerupika unene eparu lyoge. Kapi ngo livera!” Gary, gokoMuzogo gwaKarolina, kwa kara mugendesi mosirugana setungo nomvhura 30. Nage namukadendi, Maureen, kwa tanta asi uwa umwe ava hafere koWarwick kuna kara “kuponga nokukara kumwe novanavazinyetu ava va karera Jehova nomvhura dononzi moBeteli.” Gary kwa gweda ko asi: “Mokukara moBeteli, wa hepa kurerupika eparu lyoge, ano ezi nkedi zongwa zeparu mouzuni ou woudona.” Jason, ogu ga rugene kongesefa zomarutjeno naJennifer wokoIllinois, kwa uyunga kuhamena sirugana setungo sokoWallkill asi kuna kara “sirugana esi nasi kuninkisa o lizuvhe ngwendi mouzuni woupe ono kara.” Jennifer kwa gweda ko asi: “Ayo kuhafesa pokumona asi nkenye eyi ono kurugana kuna kuhafesa Jehova ntani kuna kara nkedi zokuliwapaikira uzuni woupe. Jehova nga ku tjukumwina nayinye eyi wa hepa.”

^ para. 6 Tara Yearbook of Jehovah’s Witnesses zomo-2014, pepenuno 12-13.

^ para. 7 Vavateli wokoBeteli kupakera vene mbili mambo gawo noyifutwa yipo va rugane mosivike ezuva limwe ndi gavali koBeteli.