Zende koyikaramo

Zende koyikaramo

Nombangi daJehova

Horowora eraka Rukwangali

To diworoka ndi?

To diworoka ndi?

Wa resa nawa yifo yoyipe yoRuhungu ndi? Tara nsene kuvhura o limburure mapuro gana kukwama ko:

Ya wapa koVakriste va hwike simpu ndi?

Yi kare asi simpu tava si hwike ndi hawe, eyi kwa korera ketokoro lyomuntu mwene ndi lyekoro. Nampili ngomu Bibeli za dira kuuyunga ko momunene kweyi, koneka asi simpu sahompa Sauru nesi samunwendi Jonatana kwa yi hwikire makura yisupa tava yi vhumbike. (1 Sam. 31:2, 8-13)—6/15, epenuno 7.

Ngapi omu no uyunga namunoge, mwa hana kulitangwisa?

Walye mudinkantu kuna hara kuhetekera ko kuruganesa nondunge dendi, ntani nampo kapi ana tamba egano eli ana pwagesa. Mevango lyokutwikira kulitangwisa, mu pura a rugurure egano lyendi. Kareni nepongo ngepata mokuzogera noveta demembo.—1/1, epenuno 8-10.

Maudigu musinke nava vhura kuligwanekera nago ava va dirukira koyirongo yapeke oku vana hepa vazuvhisi?

Maudigu gatatu (1) mparukiso, (2) kurongora kembo, ntani (3) kutulisa po ukaume. Navenye ava va lididimikira maudigu aga kwa va tungika.—7/15, epenuno 4-5.

Nomfa uhura womuntu ndi?

Mavhumbuko aga ga rugene Jesus kwa geve umbangi wene-wene asi Karunga ga pa Jesus nonkondo dokufunda po nomfa. Yosili, Bibeli kutanta asi Jesus ngesi kuna kara “noyipatururo yonomfa.” (Ehor. 1:18) Yipo nye Jesus nga paturura mavero gonontoko, ngwendi moomu ga pangerere vantu va sindumune ko emanya kontoko zaRasarusa. (Joh. 5:28, 29)—3/1, epenuno 6, 7.

Morwasinke yitratate yoyipe ya karera ureru kuruganesa?

Yitratate nayinye yoyipe kwa yi wapaika monkedi zokulifana. Nkenye sitratate kwa kara mo etjangwa eli natu resera ogu tuna kuzuvhisira ntani nokumupura epuro. Yi kare asi ta limburura asi nhi ndi hawe ndi walye, penuna monda zositratate nokuuyunga asi eyi yiyo azi uyunga Bibeli. Ntani twa hepa kumulikida epuro eli ngatu ya zogera nage petengwiropo.—8/15, epenuno 13-14.

Nonkedi musinke ntatu omu no nyokera po maheteko?

Ado kuna kara (1) gamena meho goge, (2) gamena magazaro goge, (3) gamena nonzira doge. Diworoka asi ove kuhafesa Karunga apa o nyokere po maheteko! (Yis. 27:11)—5/1, epenuno 12-14.

Yisinke nava rugana vakurona woVakriste mokupakera vana vawo mbili?

Ayo kwa kara nomulyo kupurakena kovanona yipo mu va dive. Kondjeni mokuvaronga. Pasihonena, nsene vana veni vana kara nomasinganyeko kuhamena usili, va vyukiseni neharo.—9/15, epenuno 18-21.

Ngapi Karunga a tara kukoka makanya?

Kupitira moNonkango dendi Bibeli, Jehova Karunga kuturonga tu kare nomutaro gomuwa kuhamena eparu ntani nomarutu getu. Yosili, Karunga ana tu harere tu ruganese nawa eparu nomarutu getu ntani nokugatekura monkedi zefumadeko. (2 Kol. 7:1)—7/1, epenuno 4-6.

Egwanekero musinke eli ali pulisire wopeke mokukapangera naKristusa?

Konyima zokutulisa po Murarero gwaHompa, Jesus kwa tulisire po egwanekero novarongwa vendi wovalimburukwi, eli ava tumbura asi egwanekero lyoUhompa. (Ruk. 22:28-30) Egwanekero eli kwa va pa mpito zokukapangera naJesus meguru.—10/15, epenuno 16-17.

Yilye ogu ga sita Karunga?

Age kwa hovere kukara po komeho a site yisitwa yemeguru, Munwendi ntani vaengeli. (Joba 38:4, 7; Koros. 1:15) Eyi kulikida asi age gelike ga hovere kukara po. Age kapi va mu sita.—9/1, epenuno 15.

Wolye ‘mbunga zedina lyaKarunga’ ezi ga uyungire Jakopo moYirugana 15:14?

Kuna kara Vajuda novapagani wovapuli ava ga horowora Karunga va kare ezimo eli va horowora ‘mokuudisa yitetu yendi.’ (1 Pet. 2:9, 10)—11/15, epenuno 24-25.