Zende koyikaramo

Zende koyikaramo

Nombangi daJehova

Horowora eraka Rukwangali

Wa kara norupandu kweyi va ku pa ndi?

Wa kara norupandu kweyi va ku pa ndi?

“Ose . . . , kwa tu pa Mpepo zokutunda mwaKarunga, asi tu koneke mauhwi aga ga tu pa Karunga.”—1 KOL. 2:12.

1. Ngapi vantu wovanzi ava lizuvhu kweyi va kara nayo?

OVE wa zuvha muntu ana kuuyunga asi: ‘Muntu kapi a kara norupandu kweyi ga weka dogoro noku yina mu pili ntani.’ Nove wa lizuvha rumwe ngoso ndi? Pasihonena, muntu ogu ga kulira mepata lyoungawo kuvhura a dire kukara norupandu kwanayinye eyi ga kara nayo. Morwa kudira kukara nediwo, mudinkantu kuvhura a dire kukwata egano yininke yomulyo po meparu.

2, 3. (a) Yisinke nava nyokera po vadinkantu? (b) Yisinke nayi tu vatera tu likide rupandu kweyi ga tu pa Jehova?

2 Nsene ove mudinkantu, yisinke yomulyo po koge? Vadinkantu wovanzi womouzuni kutara emona asi mulyo kupitakana elikwatakano lyawo naKarunga. Kuvhura va hare yirugana yokufuta nawa nembo lyewa noserefoni zompe ntani nayimwe ngoso yoyipe. Apa ava tura muhowo yininke eyi meparu lyawo, awo kuzumbanesa sininke somulyo, elikwatakano lyawo naKarunga. Nsene asi vakurona woge Vakriste, ove ngoso wa gwana upingwa wopampepo wouwa po. (Ruk. 11:28) Kudira kukara norupandu koupingwa owo, kuvhura  yi kundame eparu lyoge nalinye momudona.

3 Kuvhura o yi nyokere po eyi. Yisinke nayi vhura kukuvatera? Tatu ka konakona yihonena yomoBibeli eyi nayi vhura kukuvatera o kare norupandu koupingwa woge wopampepo. Yihonena eyi kapi tupu nayi ka vatera vadinkantu nye nanatuvenye yipo tu likide rupandu kweyi ga tu pa Jehova.

KAPI VA LIKIDIRE RUPANDU

4. Yisinke 1 Samwere 8:1-5 azi tu tantere kuhamena vana vaSamwere?

4 MoBibeli mwa kara yihonena yavamwe ava va dilire kulikida rupandu koupingwa wawo wopampepo. Muporofete Samwere kwa tamekere kukarera Jehova age munonagona ntani ga twikilire ngorooro kumulimburukwa. (1 Sam. 12:1-5) Samwere kwa tulire po sihonena sosiwa, nye vana vendi, Joeli naAbiya kapi va kweme sihonena soguhwe. Awo ngava rugana yininke yoyidona. Bibeli kutanta asi awo ngava tambura yombumbo ntani kapi ngava ‘pangura mousili.’—Resa 1 Samwere 8:1-5.

5, 6. Yisinke va rugene vana vaJosiya ntani namutekurwendi?

5 Eyi kwa lifene novana vahompa Josiya. Josiya nage kwa tulire po sihonena sosiwa mokukarera Jehova. Apa va gwene buke zoVeta nokuzimuresera, age kwa sikisire mo mapukururo gaJehova. Age kwa zonagwire po yikarunga yoyimpempa mosirongo nasinye ntani nokukorangeda vantu va limburukwe Jehova. (2 Vah. 22:8; 23:2, 3, 12-15, 24, 25) Ou kwa kere upingwa wouwa kovana vaJosiya. Konyima zosiruwo, vana vendi vatatu ntani namutekurwendi gumwe kwa ya kere mouhompa, nye kwato gumwe gwawo ga likidire rupandu koupingwa wawo.

6 MunwaJosiya, Joahasi yige ga mu kweme mouhompa, age ‘kwa zonene kwaHOMPA.’ Age kwa pangerere tupu makwedi gatatu makura hompa gwaEgipite Farawo ta mu kwata, ntani kwa ka fililire moomo mounkwate. (2 Vah. 23:31-34) Ano mumbyendi Jehoyakimu kwa pangerere nomvhura 11. Nage kapi ga kere norupandu kweyi ga pingire koguhwe. Age kwa donapere unene, yipo Jeremiya ga porofetere kumuhamena asi: “Age ngava mu vhumbika moomu ava vhumbike sindongili.” (Jer. 22:17-19) MunwaJosiya Sedekiya namutekurwendi Jehoyakini nawo kwa donapere unene ntani kapi va kweme sihonena soulimburukwi saJosiya.—2 Vah. 24:8, 9, 18, 19.

7, 8. (a) Ngapi Saromo ga zumbanesere upingwa wendi wopampepo? (b) Yisinke natu lirongera ko koyihonena yomoBibeli yava va zumbanesere upingwa wawo?

7 Saromo kwa pingire uhompa koguhwe, Ndafita. Nampili ngomu Saromo ga lirongerere koguhwe kukarera Jehova, nye konyima kapi ga ya likidire rupandu. Bibeli kutanta asi: “Ano Saromo eyi ana kurupa, vakadi vendi makura tava hamesere mutjima gwendi kovakarunga woyimpempa. Mutjima gwendi kapi gwa hamenene nawa-nawa kwaHOMPA Karunga gwendi, moomu gwa kere gwaguhwe Ndafita.” (1 Vah. 11:4) Moruhura, Saromo ga zumbanesere elikwatakano lyendi naJehova.

8 Vagara ava navenye va kere nompito zokudiva Jehova nokurugana youhunga. Awo va zumbanesere nompito odo. Nye kapisi vadinkantu navenye womosiruwo sina va zumbanesere upingwa wawo wopampepo, eyi yina lifana nanaina. Tu konakoneni yihonena yoyiwa eyi nava vhura kuhonena vadinkantu naina.

 KWA LIKIDIRE RUPANDU KWEYI VA GWENE

9. Ngapi vana vaNowa va tulire po sihonena sosiwa? (Tara efano pepenuno 27.)

9 Vana vaNowa kwa tulisire po sihonena sosiwa. Awo va gwene situmbukira sokuvatera guhyawo mokutunga emuwato yipo vantu va parukire mo. Vana vaNowa va likidire rupandu pokurugana mpango zaJehova. Va yi divire asi va hepere kulimburukwa Jehova, ntani va hwililire memuwato komeho ru tameke ruhanzo. (Gen. 7:1, 7) Yitundwamo musinke ya kere? Genesis 7:3 kutanta asi awo kwa hwilidire yikorama memuwato ‘asi nkenye kakorama nokadira ngayi livhare hena pevhu.’ Vantu nawo kwa va parwire. Morwa vana vaNowa kwa kere norupandu kweyi va gwene kwaguhyawo, awo kwa parwire vantu ntani nokutengwidira po ukareli wousili apa pevhu.—Gen. 8:20; 9:18, 19.

10. Ngapi vadinkantu vane woVahebeli va likidire rupandu kousili ou va lirongere?

10 Konyima zonomvhura dononzi, vadinkantu vane woVahebeli kwa likidire asi eyi va lirongere kovakondi vawo mulyo unene. Hananiya naMisayeli naAsaliya ntani Ndaniyera kwa va twere koupika moBabironi momvhura 617 komeho zokuwiza Kristusa. Awo kwa kere vamati wovawa mosipa ntani nondunge, ano eyi ngano ya va ninkisire nawo va hafere eparu lyewa lyomoBabironi. Nye awo kapi va yi rugene morwa kapi va divarere upingwa wawo neyi va va rongere apa va kere simpe vanona. Eyi yiyo ga va tungikilire Jehova.—Resa Ndaniyera 1:8, 11-15, 20.

11. Ngapi wopeke va gwanena mo uwa mosihonena saJesus?

11 Jesus kwa kere sihonena sosiwa unene sogu ga likidire rupandu koupingwa wendi. Age kwa here unene eyi va mu rongere oGuhwe. Eyi kwa yi zeresa apa ga tente asi: “Yininke eyi ani uyunga yeeyi ga ronga nge Tate.” (Joh. 8:28) Age kwa haferere kutantera ko wopeke eyi ga lirongere yipo nawo va gwanene mo uwa. Age kwa tente asi: “Ame nyame tupu kukaudisira hena moyitata peke Mbudi zoNgwa zoUntungi waKarunga, yeeyi yiyo va tumina nge.” (Ruk. 4:18, 43) Age kwa vaterere vapurakeni vendi va dimburure mulyo gokudira “kuhamena kouzuni,” ou au dili kumona mulyo goyininke yopampepo.—Joh. 15:19.

LIKIDA RUPANDU KWEYI WA GWANA

12. (a) Ngapi ukaro va faturura mwa-2 Timoteusa 3:14-17 una lifana nou wovadinkantu naina? (b) Mapuro musinke va hepa kulipura vadinkantu?

12 Nsene wa kara novakurona ava va hara Jehova, ove ngoso wa gwana upingwa wopampepo. Eyi aga uyunga Matjangwa kuhamena Timoteusa, yina lifana noukaro woge. (Resa 2 Timoteusa 3:14-17.) Kovakurona woge yiko wa ‘lirongera’ kuhamena Karunga gosili nomu no vhura kumuhafesa. Nampo vakurona woge kwa tamekere kukuronga ove simpe mukeke. Eyi ya ku vatera o kare noukonentu yipo o “paruke pokupura Jesus Kristusa” ntani o ‘fire kuruganena’ Karunga. Nye wa kara norupandu kweyi wa gwana ndi? Likonakona pokulipura mapuro aga asi: ‘Ngapi omu ani lizuvhu kuhamena kukara ruha ronombangi doulimburukwi edi da parukire nare? Ame kulizuvha ruhafo mokukara gumwe goNombangi daJehova ndi? Ame na dimburura mulyo gokukara kaume kaKarunga ndi? Ame kulikida rupandu kweyi na diva usili ndi?’

Ngapi ani lizuvhu kuhamena kukara ruha ronombangi doulimburukwi edi da parukire nare? (Tara paragarafu 9, 10, 12)

13, 14. Yisinke ava heteke kurugana vadinkantu vamwe ava va kulira mousili? Gava sihonena.

 13 Vadinkantu vamwe ava va kulira momapata govakurona woVakriste kapi va dimburura mulyo gokukarera Jehova noudona wouzuni waSatana. Vamwe kwa siga usili nokuheteka eparu lyomouzuni. Kuvhura o dukire komeho zetuwa lina kuduka morwa ono hara kudiva nsene asi kuvhura li ku lyate ndi li ku dipage ndi? Hawe, kapi to yi rugana! Mokulifana, kapi wa hepa kuza mouzuni mokukadimburura ‘ukaro wamo wonkoha-nkohi.’—1 Pet. 4:4.

14 Gener, ogu ga tunga moAsia, kwa mu rerera mousili. Age kwa gwene ekuho nonomvhura 12. Age kwa ya here eparu lyomouzuni. Age kwa tanta asi: “Ame kwa here kulimonena umanguruki womouzuni.” Gener yipo ga tamekere kurugana yoyidona mokahore-hore. Apa ga ya kere nonomvhura 15, nga ruganesa yikorwesa mepuko nombuuyungiso zokunyata ngwendi vakaume vendi womouzuni. Gener nkenye apa nga wiza kembo masiku, konyima zokudana maudano gonyanya gokokompiuta novakaume vendi. Mwaza siruwo, ga ya yi dimbwilire asi yininke yomouzuni kapi ayi reta ruhafo. Ayo kwa fene ngwendi kuna kutjida mpepo. Ngesi ga tengwira mousili. Age kwa tanta asi poyiruwo noyiruwo age kuhara kutengwira konkareso zendi, nye ga dimburura asi elikwatakano lyendi naJehova mulyo unene.

15. Yi kare asi kwa lironga usili kovakurona woge ndi hawe, yisinke wa hepa kugazara ko?

15 Nampili ngomu vakurona woge va dira kukara mousili, gazara uwa ou wa gwana pokudiva Musiti goge nokumukarera. Diworoka asi movantu mamiliyona nomamiliyona uzuni mudima, Jehova kwa ku kokera kwendi ntani nokukuhorwera usili womoBibeli. Alyo kuna kara etungiko lyenene! (Joh. 6:44, 45) Mwankenye vantu 1 000 mouzuni mudima, gumwe movantu owo yige ga diva usili, ano ove kuna kara gumwe gwawo. Yi kare asi kwa lironga usili kovakurona woge ndi hawe, ove kuvhura kuhafa mokuudiva. (Resa 1 Vakolinte 2:12.) Gener kwa tanta asi: “Nyame yilye nye a ka dive  nge Jehova, Musiti goyininke nayinye yomouzuni?” (Epis. 8:4) Munazinyetukadi gumwe kwa tanta asi: “Varongwa kuhafa apa ava divikwa kovarongi vawo. Ee, ruhafo musi mokudivikwa koMurongi goMunene, Jehova!”

YISINKE NGO RUGANA?

16. Sihonena musinke va hepa kukwama vadinkantu naina?

16 Gazara kuhamena upingwa woge wopampepo, ntani si kare sitambo soge mokukarera Jehova. Kwama sihonena sosiwa sovakareli vanare vaKarunga wovalimburukwi. Wa ha honena vadinkantu womouzuni ou una vyuka kezonauko ava vana dili kudiva kuhamena meho zawo.—2 Kol. 4:3, 4.

17-19. Morwasinke ya karera nomulyo asi tu lisige nouzuni?

17 Yosili, kapi ya kara ureru kulisiga nouzuni. Nye ayo kuna kara yininke youhunga kurugana. Mokuyifanekesa: Gazara kuhamena mudani ogu a wapere komarumbasano gomanene mouzuni mudima. Mokukasika pontambo ozo, ga hepa kulisiga novadani vakwawo womapupi gendi. Ntani ga hepa kunyokera po yininke yoyinzi eyi nayi vhura kumana siruwo sendi, morwa ga hepa siruwo sosinzi mokuliyomberesa yipo a ka sike kositambo sendi.

18 Vantu wovanzi mouzuni kapi ava gazara yitundwamo yoyirugana yawo yoyidona, nye vakareli vaJehova va lisiga. Nsene tu lisiga nouzuni pokunyokera po nkareso zokunyata ezi nazi zonagwisa po elikwatakano lyetu naJehova, ose ngatu ka gwana “mwenyo gwanarunye gosili.” (1 Tim. 6:19) Munazinyetukadi vana tumbura muhowo, kwa tanta asi: “Nsene o popera epuro lyoge, ngo lizuvha ruhafo. Ntani ayo ngayi likida asi ono kara nononkondo dokunyokera po uzuni waSatana. Nye unene po, ayo ngayi kara ngwendi asi ove kuna kumona Jehova Karunga omu ana kumwenyamenya nokukuhafera! Monkedi zangoso, ngo lizuvha ruhafo morwa kulisiga nouzuni!”

19 Wa ha mana siruwo soge pokukondjera tupu yininke eyi no vhura kugwana ngesi. (Muud. 9:2, 10) Ngomudinkantu, wa kwata egano eyi va tu sitira ntani wa kara nompito zokukaparuka narunye. Eyi ngayi ku vatera o ture po matokoro gomawa ntani nokunyokera po kurugana “moomu ava rugana vapagani.” Monkedi zangesi eparu lyoge ngali kara nositambo.—Efe. 4:17; Mara. 3:18.

20, 21. Yisinke ngatu ka hafera nsene tu tura po matokoro gouhunga, nye yisinke Karunga ga hepa ko kwetu?

20 Nsene tu tura po matokoro gouhunga, ose ngatu hafera eparu ngesi ntani mwenyo gwanarunye mouzuni woupe waKarunga. Jehova nga tu tungika kupitakana omu atu yi gazara. (Mat. 5:5; 19:29; 25:34) Nye Karunga kapi a gava matungiko ogo kwankenye muntu. Age kwa hepa ko kwetu asi tu mu limburukwe. (Resa 1 Johanesa 5:3, 4.) Nye kumukarera ngesi noulimburukwi, mulyo unene!

21 Jehova ga tu pa nare yoyinzi. Ose twa kara nediwo lyoNonkango dendi ntani nokukwata nawa egano usili kumuhamena nositambo sendi. Ose kuhafera situmbukira sokutuzigidisa kedina lyendi nokukara Nombangi dendi. Karunga kwa tu tumbwidira asi nga tu kwafa. (Epis. 118:7) Ngano natuvenye, vadinkantu ndi vakondi, tu likide rupandu momparukiso zetu asi tuna kara neharo lyokufumadeka Jehova “narunye nanarunye”!—Rom. 11:33-36; Epis. 33:12.