Zende koyikaramo

Zende koyikaramo

Nombangi daJehova

Horowora eraka Rukwangali

Jehova kutungika ava ava gava neharo

Jehova kutungika ava ava gava neharo

MUSITI gwetu kwa pa vantu uhwi wemanguruko lyokutura po matokoro. Ntani age kutungika ava ava ruganesa uhwi owo mokutwara komeho ukareli wousili nokupongora edina lyendi nokukwatesa ko sitambo sendi. Jehova kapi a tu sininike tu mu limburukwe. Nye, age kuyihafera apa atu mu limburukwa morwa eharo norupandu rwetu kwendi.

Pasihonena, apa Vaisraeli va kere momburundu zaSinayi, Jehova kwa va tanterere va tunge evango lyoukareli. Age kwa tente asi: “Gaveni nonzambo kwaHOMPA. Ogu ana hara kuyirugana eyi, a rete nonzambo.” (Ex. 35:5) Nkenye Muisraeli ga vhulire kugava eyi ga kere nayo, ntani nkenye sigava si kare asi sokufana ngapi ndi sokuhura kupi, nayinye kwa yi ruganesere mokusikisa mo sitambo saKarunga. Yitundwamo musinke ya kere?

“Nkenye ogu ga here kuyirugana, makura ta reta sigava kwaHOMPA.” Vagara novakadi kwa retere yigava yokuruganesa mosirugana saJehova: nongondo noyimbilingwa nomakwarara nomaurenga peke-peke nongorodo nosisiliveli nongoporo nonongodi dosineguru nedi dopurupuli nedi donongeha nekehe lyewa lyezera nekehe lyonongodi doyikombo nosipapa sonzwi va kwita mbapa zongeha nosipapa sa pya kusunta nositji somusu nomamanya gomutaro noyidumba nomaholi. Yininke eyi va twere “kwa pitakanene pweyi va hepere mokumana yirugana nayinye.”—Ex. 35:21-24, 27-29; 36:7.

Eyi ya hafesere Jehova kapisi nonzambo edi va geve, nye eharo lyawo lyokukwatesa ko ukareli wousili. Ntani hena eharo lyawo kwa va tumangedere va ruganese siruwo nononkondo dawo. Etjangwa kwa tanta asi: “Nonkurungu nadinye tadi poho nongodi.” Yosili “nonkurungu dononkadi nadinye kwa pohwere nongodi donohuki doyikombo.” Ntani Jehova kwa pere Besareli ‘nondunge nomayere noukonentu wounkurungu wankenye karugana.’ Age kwa zwidire Besareli naOhaliyaba unkurungu wounzi.—Ex. 35:25, 26, 30-35.

Apa Jehova ga tanterere Vaisraeli va gave yigava, age ga kere nehuguvaro asi “nkenye ogu ga here kuyirugana” kwa kwatesere ko ukareli wousili. Ano age ga va tungikire pokuvapa mavyukiso noruhafo. Eyi kulikida asi apa Jehova a tungike eharo lyovakareli vendi, age kudivilisa asi va gwane nayinye eyi va hepa mokusikisa mo sitambo sendi. (Epis. 34:9) Ngomu ono kukarera Jehova neharo, age nga ku tungika.