Zende koyikaramo

Zende koyikaramo

Nombangi daJehova

Horowora eraka Rukwangali

Kareni muna pongoka moukaro weni naunye

Kareni muna pongoka moukaro weni naunye

“Omu kare vapongoki moukaro weni naunye.”—1 PET. 1:15.

1, 2. (a) Yisinke Karunga ana hepa ko kovantu vendi? (b) Mapuro musinke natu ka zogera mosirongwa esi?

JEHOVA kwa gendesere mupositoli Peturusa a temwinine buke zaLevitikus ntani a faturure asi Vakriste va hepa kukara vana pongoka ngwendi moomu va kere Vaisraeli. (Resa 1 Peturusa 1:14-16.) “Mupongoki,” Jehova, kuna hepa ko kovagwavekwa “nononzwi dapeke” va kare vana pongoka moukaro wawo naunye, kapisi mwayimwe tupu!—Joh. 10:16.

2 Nsene tu konakona ugawo wopampepo ou atu gwana mwaLevitikus, ose ngatu gwanena mo uwa, ntani pokutura pasirugana eyi atu lirongo ngayi tu vatera tu kare tuna pongoka moukaro wetu naunye. Ngesi tatu ka zogera mapuro aga: Ngapi omu natu tara kuligava meheteko? Yisinke Levitikus azi tu rongo kuhamena kulimburukwa koupangeli waJehova? Yisinke natu lirongera ko kokugava nonzambo?

TAKAMESA ASI WA HA LIGAVA MEHETEKO

3, 4. (a) Morwasinke Vakriste nava nyokera kuteza po noveta nonompango doBibeli? (b) Morwasinke natu dilira kutengwida kuwoko ndi tu kare nonkoko?

3 Nsene tuna hara kuhafesa Jehova, twa hepa kukwaterera konoveta nokonompango dendi, kapisi tu ligave monkareso zokunyata  ndi meheteko. Nampili ngomu twa dira kukara moVeta zaMosesa, nompango dazo kutuvatera tu dive eyi ayi hafesa Karunga neyi ayi dili kumuhafesa. Pasihonena, Vaisraeli kwa va pangerere asi: “Walye omu tengwidire muntu kuwoko ndi asi mu mu nyengerere, nye hareni vakweneni moomu mwa lihara nyamweni. Ame nyame HOMPA.”—Lev. 19:18.

4 Jehova kapi ana hara asi tu tengwide kuwoko, ntani ana tu harere tu nyokere po kukara nonkoko. (Rom. 12:19) Nsene tu teza po noveta nonompango daKarunga, ngayi hafesa Muzonaguli, ano eyi ngayi swaukisa Jehova. Nampili nsene gumwe a tu zuvhisa kukora mowina, twa ha pulisira ehandu li tu ninkise tu kare nonkoko. Karunga ga tu pa situmbukira sokukara ‘yipako yerova’ omu mwa kara ugawo wosirugana sokuzuvhisa. (2 Kol. 4:1, 7) Nsene tu kara nonkoko kapi ngatu wapera kukara yipako yangoso!

5. Yisinke natu lirongera ko kosihorokwa saArona ntani nonomfa dovana vendi? (Tara efano pepenuno 13.)

5 Sihorokwa sokuguvisa sa horokere mepata lyaArona kwa si tjanga mwaLevitikus 10:1-11. Awo kwa tukukire apa mundiro gwa tundire meguru nokudipaga oNadabu naAbihu vana vaArona poNkongoronzugo. Ee, eheteko musi ga ligwanekerere nalyo Arona nepata lyendi mokudira kulira vemepata lyawo ava va fire! Ove kulikida asi wa pongoka pokudira kulikwatakana nava vemepata lyeni ndi navamwe ava va gusa mombunga ndi?—Resa 1 Vakolinte 5:11.

6, 7. (a) Nsene kuna kutokora kukara pekwareko eli nali ka karera mongereka, yisinke twa hepa kugazadara ko? (Tara nonkango dokonhi.) (b) Ngapi no fatwilira vekoro lyoge wovahapuli nsene vana ku zigida kekwareko eli ngali ka karera mongereka?

6 Nampo kuvhura tu dire kuligwanekera neheteko lyenene ngwendi eli ga ligwanekerere nalyo Arona nepata lyendi. Nye ngapi nsene va tu zigida kekwareko lyovanekoro eli ngali karera mongereka? Nampili ngomu asi Matjangwa kapi ga silika kukakara po, nye pwa kara nompango doBibeli edi nadi tu vatera pokutulisa po etokoro ndi? *

7 Vekoro lyoge wovahapuli kuvhura va dire kukukwata egano nsene o dira kulihameka mosihorokwa esi vana tumbura. (1 Pet. 4:3, 4) Yimo, kapi tuna hara kuvahandukisa, nye ya wapa kuvafatwilira monkedi zongwa zokuvyukilira. Kuvhura o yi rugane eyi komeho ngasi ka horoke silika oso. Kuvhura o va pandure kweyi vana ku zigida kosilika sekwareko. Makura kuvhura o va fatwilire asi morwa kuna hamene mo ukarelikarunga, kapi nayi wapa koge mokukalihameka mo morwa eyi wa pura kuvhura yi ka donganese silika. Monkedi zangesi ngayi ku vatera mokudira kuteza po ulimburukwi woge.

LIMBURUKWA KOUPANGELI WAJEHOVA

8. Ngapi buke zaLevitikus za nkondopeka upangeli waJehova?

8 Buke zaLevitikus kwa nkondopeka upangeli waJehova. Noveta domwaLevitikus kwa gava mfumwa kwaJehova kupitakana yikando 30. Mosesa ga yi dimbwilire eyi ntani ga rugene eyi ga mu pangerere Jehova. (Lev. 8:4, 5) Nose twa hepa kurugana nkenye apa eyi ana tu harere Mupangeli gwetu, Jehova. Monkedi zangesi, ose kuna kukwatesa ko mbunga zaKarunga. Nye kuvhura tu ligwanekere neheteko nsene nyoselike tuna kara, ngwendi moomu ya horokerere Jesus momburundu. (Ruk. 4:1-13) Nsene tu demenena koupangeli waKarunga  nokumuhuguvara, kwato eyi ngayi tu ninkisa tu gwire meheteko ndi tu kare nowoma.—Yis. 29:25.

9. Morwasinke vantu vaJehova da va nyengera nomuhoko nadinye?

9 Ngovasikuli vaKristusa noNombangi daJehova, ose kuligwanekera nomahepeko. Eyi yiyo natu ndindira, morwa Jesus kwa tanterere varongwa vendi asi: “Ngava mu gava nye, va mu hepeke momudona, makura tava mu dipaga. One nkenye muhoko ngagu mu nyenga morwedina lyange.” (Mat. 24:9) Nampili ngomu va tu nyenga, ose kulididimikira pokuzuvhisa mbudi zoUhompa nokutwikira kukara tuna pongoka kosipara saJehova. Mokumona asi ose vanamvharerwa wokulimburukwa konoveta dosirongo, morwasinke va tu nyengera? (Rom. 13:1-7) Morwa twa horowora Jehova a kare Mupangeli gwetu! Ose kumukarera “gelike” ntani kapi atu teza po noveta nonompango dendi.—Mat. 4:10.

10. Mosihorokwa simwe, yisinke ya horokere apa munazinyetu ga ligeve moukwayita?

10 Ose hena kapi twa ‘hamena kouzuni.’ Eyi yiyo atu dilire kulihameka moyita nomoupolitika. (Resa Johanesa 15:18-21; Jesaya 2:4.) Vakareli vamwe vaKarunga kwa tezere po ulimburukwi wawo. Sinzi sawo kwa litezwilire nokutengwidira po elikwatakano lyawo naGuhyawo gemeguru. (Epis. 51:17) Nye wovasesu kapi va litezwilire. Pasihonena, moYita yaUvali yoUzuni, vakwayita kwa pongaikire vanazinyetugara 160 wokonhi zonomvhura 45 womonodorongo nadinye domosirongo saHungary nokuvatura modoropa zimwe. Omo yimo va va pangerere va lihameke moukwayita. Vanavazinyetu wovalimburukwi kwa nyokere, nye ntane kwa gusire sirugana soukwayita nokudwara mudwaro goukwayita. Konyima zonomvhura mbali, gumwe govanavazinyetu ava va ligeve moukwayita, kwa mu pere situmbukira sokudipaga Nombangi doulimburukwi pokudiroya. MoNombangi omo kwa kere mo mumbyendi! Nampili ngoso, Nombangi odo kapi va di dipagere.

GAVA YOYIWA PO KWAJEHOVA

11, 12. Yisinke natu lirongera ko kononzambo edi ngava gava Vaisraeli?

11 Kuliza noVeta zaMosesa, Vaisraeli va hepere kugava nonzambo edi ga va pulire Jehova. (Lev. 9:1-4, 15-21) Nonzambo da hepere kukara donongwa po morwa ado kwa fanekesere nzambo zaJesus zokusikilira mo. Nkenye nzambo ezi ngava gava va hepere kukwama mavyukiso aga ga va pere. Pasihonena, koneka eyi ga hepere kurugana mukadi ogu ga hampurukire mukeke. Levitikus 12:6 kwa tanta asi: “Ruveze rwekuhuro lyendi lyopampo, nsene runa pu, ru hamene komunona gomugara ndi kogu gomukadi, a tware nye komupristeli nzwigona zomvhura zimwe zonzambo zeswakerero nomputukuwa ndi nkutji zonzambo zononzo pevero lyoNkongoronzugo zoMagwanekerero.” Nampili ngomu Karunga ga tumbwire kuvyukilira eyi ga hepere ko kwawo, eharo lyendi kulimonenena monoveta edi ga va pere. Nsene mukadi kapi ana kugwana nzwigona, age kwa mu pulisilire a gave nonkutji mbali ndi nomputukuwa mbali. (Lev. 12:8) Nampili ngomu ga kere asi age hepwe, nzambo zendi ga zi tambwire Jehova. Yisinke natu vhura kulirongera ko?

12 Mupositoli Paurusa kwa korangedere vapuli vakwawo mokugava kwaKarunga “nzambo zompandu.” (Heb. 13:15) Tu ruganeseni tuna twetu pokudivisa edina lyokupongoka, Jehova. Vanavazinyetu woyipurupuru nawo kuhamberera Karunga morupurupuru. Vanavazinyetu wokukurupa unene nava wokuvera-vera nawo  kuhamberera Karunga pokuzuvhisa kupitira koterefona ntani kuzuvhisira ava ava va pakere mbili ntani ava ava va dingura. Nzambo zetu zompandu zokudivisa edina lyendi nokuudisa mbudi zongwa, za hepa kuliza noukaro wetu. Nye za hepa kukara zongwa po.—Rom. 12:1; 2 Tim. 2:15.

13. Morwasinke natu gavera nonzapo detu doyirugana yokuzuvhisa?

13 Nonzambo detu dompandu kudigava nomutjima nagunye morwa twa hara Karunga. (Mat. 22:37, 38) Nye ose kutupura hena tu gave nonzapo detu domoyirugana yokuzuvhisa. Ngapi omu atu tara ewapaiko lyangoso? Nonzapo detu edi atu gava nkenye kwedi kuna kara ruha roukareli wetu. (2 Pet. 1:7) Twa ha lizuvha asi kuna kutusininika tu rugane unene moyirugana yokuzuvhisa yipo tu gave novili dononzi. Eyi yiyo va pulisilira vanavazinyetu wokukurupa unene nava wokuvera-vera va gave nominute nampili 15 mevango lyokugava novili. Jehova kuhafera nominute odo nsene asi vanazinyetu owo kuna kudigava morwa eharo lyawo kwendi ntani nokulikida rupandu kositumbukira sawo sokukara Nombangi dendi. Ngwendi Vaisraeli vena va dilire kuvhura kugava nonzambo dononene, vakareli vaJehova ava ayi dili kutompoka kugava novili, nawo kuvhura va gave nampili nominute. Nonzapo detu edi atu gava kudipakerera kumwe va gwane sivaro sonovili edi twa rugana mouzuni mudima, ano eyi kuvatera mbunga zaKarunga zi ture po mawapaiko goyirugana yetu yoUhompa. Ngoso kutupura tu rugane unene moyirugana yokuzuvhisa yipo tu gave novili dononzi ndi?

NKARESO ZETU ZOKULIRONGA BIBELI NTANI NONZAMBO DOMPANDU

14. Faturura eyi twa hepera kukonakona nkareso zetu zokulironga Bibeli.

14 Konyima zokukonakona maugawo gamwe gopampepo mwaLevitikus, kuvhura o gazare asi: ‘Ame ngesi nina kwata egano nawa eyi buke ezi za karera moNonkango daKarunga.’ (2 Tim. 3:16) Ove ono tokomene mokukara ono pongoka ndi? Jehova kuna hepa ko koge o gave yoyiwa po morwa ya mu fira. Nampo eyi ono lirongo mwaLevitikus moyirongwa eyi yivali yina nkondopeke eharo lyoge lyokukonakona momunene Matjangwa. (Resa Yisewe 2:1-5.) Konakona nawa nkareso zoge zokulironga Bibeli. Yosili, ono hara Jehova a tambure nzambo zoge zompandu. Ove kuyidimburura asi malikwamo gokotivi nonovidiyo nomaudano ndi yininke eyi wa hara kurugana kumana siruwo soge ntani kukudonganesa koyininke yopampepo ndi? Nsene yimo, pokuteda ko kononkango domupositoli Paurusa edi va tjanga mobuke zoVahebeli, ngo gwanena mo uwa.

Ove kuna kutura elirongo lyoBibeli noukareli wepata muhowo meparu lyoge ndi? (Tara paragarafu 14)

15, 16. Morwasinke Paurusa ga vyukilire kuuyunga apa ga tjangerere Vakriste woVahebeli?

15 Paurusa kwa uyungire kuvyukilira apa ga tjangerere Vakriste vakwawo woVahebeli. (Resa Vahebeli 5:7, 11-14.) Mupositoli kapi ga uyungire nonkango dononkukutu, nye age kwa va tanterere asi awo kwa ‘limbanderere’ mokuzuvha kwawo.  Morwasinke Paurusa ga uyungire kuvyukilira? Age kwa likidire eharo nelituromo eli ga kara nalyo Jehova koVakriste ava ngava nu tupu masini gopampepo. Ayo ya kara nomulyo asi tu lironge madi gopomuhowo gononkango daKarunga. Nye twa hepa hena “nondyaandya” mokukura tu kare vakurona pampepo.

16 Mevango lyokukura pampepo yipo va vhure kuronga vakwawo, Vakriste woVahebeli kwa here tupu kuvaronga. Morwasinke? Morwa awo kwa nyokere “nondyaandya.” Lipura asi: ‘Ame na kara nonkareso zongwa konondyaandya dopampepo ndi? Ame kudilya ndi? Ndi ame kapi na hara kukanderera ntani nokulironga yininke yokonhiinhi yomoBibeli?’ Nsene yimo, ayo kulikida asi wa kara noudigu wokulironga Bibeli. Sitambo setu kapisi sokuzuvhisira tupu vantu nye sokuvaronga va kare varongwa vaJesus.—Mat. 28:19, 20.

17, 18. (a) Morwasinke natu hepera kulya nondyaandya dopampepo nkenye apa? (b) Ngapi natu tara kuruganesa yikorwesa komeho zokuza komapongo?

17 Sinzi setu, kulironga Bibeli kapisi ureru. Jehova kapi a tumangeda vantu vendi va lironge Bibeli pokuvaninka va lizuvhe unzoni. Yi kare asi ose kwa karera Karunga nomvhura dononzi ndi dononsesu tupu, twa hepa kutwikira kulya nondyaandya dopampepo. Pokurugana ngoso, ose ngatu kara tuna pongoka moukaro wetu naunye.

18 Mokukara tuna pongoka, twa hepa kukonakona nawa Matjangwa nokurugana eyi ana hepa ko Karunga kwetu. Konakona sihorokwa saNadabu naAbihu, vana vaArona ava nampo va korwere, makura tava zamba mundiro ogu ga dilire ‘kuvapangera’ Jehova, eyi ya ninkisire a va dipage. (Lev. 10:1, 2) Koneka eyi Karunga ga tanterere Arona. (Resa Levitikus 10:8-11.) Sihorokwa esi kulikida asi epuko kunwa yikorwesa komeho zokuza komapongo ndi? Gazadara ko kweyi: Ose kapi twa kara moVeta zaMosesa. (Rom. 10:4) Moyirongo yimwe, vanavazinyetu kuruganesa yikorwesa yoyisesu pokulya nondya komeho zokuza komapongo. PoPaska kwa nwine po nonkinda ne dovhinyu. Apa ga tulisire po Murarero, Jesus kwa ninkire varongwa vendi va nwe vhinyu ezi za fanekesere honde zendi. (Mat. 26:27) Bibeli kwa silika kunwa unene yikorwesa ntani unkorwe. (1 Kol. 6:10; 1 Tim. 3:8) Vakriste wovanzi, ezwi lyawo lyokomutjima kuvasilika kumakera yikorwesa komeho zokulihameka mwankenye yirugana yokupongoka. Nampili ngoso, maukaro kwa lisiga tunda sirongo zende sirongo, ntani yomulyo po kuna kara asi Vakriste va ‘hangure nawa pokatji keyi ya kuhuka neyi ya nyata,’ yipo va kare vana pongoka nokuhafesa Karunga.

19. (a) Yisinke twa hepa kudiworoka nsene kuna kurugana ukareli wepata ntani elirongo lyanyamwetu? (b) Yisinke ono tokomene kurugana mokukara ono pongoka?

19 Nsene o lironga Nonkango daKarunga, ove ngo gwana maugawo gomanzi gopampepo. Ruganesa yiruganeso yepaparo mokuwapukurura ukareli woge wepata ntani nelirongo lyanyamoge lyoBibeli. Kulika ediwo lyoge kwaJehova nokositambo sendi. Hedera Jehova pepi. (Jak. 4:8) Kanderera kwaKarunga ngwendi muepisarome ogu ga dimbire asi: “Mahura meho gange ni mone yitetu yomoVeta zoge.” (Epis. 119:18) Wa ha teza po noveta nonompango domoBibeli. Limburukwa nomutjima nagunye konoveta daJehova “Mupongoki,” ntani rugana noupampi ‘yirugana yokupongoka yombudi zongwa zaKarunga.’ (1 Pet. 1:15; Rom. 15:16) Kara ono pongoka momazuva aga gopouhura. Ngano natuvenye tu kare tuna pongoka ntani nokulimburukwa koupangeli waKarunga gwetu gokupongoka, Jehova.

^ para. 6 Tara “Mapuro gokutunda kovaresi” moRuhungu 15 Kudumonkuru 2002, moRuingilisa.