Zende koyikaramo

Zende koyikaramo

Nombangi daJehova

Horowora eraka Rukwangali

Eyi ali tanta kwetu, evhumbuko lyaJesus

Eyi ali tanta kwetu, evhumbuko lyaJesus

“Ana vhumbuka.”—MAT. 28:6.

1, 2. (a) Yisinke va here kudiva vampitisili vamwe womaukarelikarunga, ntani ngapi ga va limbwilire Peturusa? (Tara efano.) (b) Yisinke ya ninkisire Peturusa a kare nouradi?

KONYIMA tupu zapa ga fire Jesus, mupositoli Peturusa kwa ligwanekerere nomakwamakwamo gokutunda kombunga zovagara vamwe. Vagara ava kwa kere vampitisili womaukarelikarunga goVajuda, ava va dipagesere Jesus. Vagara owo kwa here Peturusa a va fatwilire asi nononkondo musinke ga verwire mugara gosirema somondambo. Peturusa kwa limbwilire nouradi asi: “Mugara ogu ana sikama komeho zeni, kuna kangukire morwaJesus Kristusa Munasareta, ogu mwa pamparerere . . . , nye Karunga yiyo ga mu pindura koufe.”—Yirug. 4:5-10.

2 Pomuhowo, Peturusa kwa patanene Jesus yikando yitatu morwa utjirwe. (Mar. 14:66-72) Yisinke ya mu ninkisire a kare nouradi apa ga uyungire novampitisili womaukarelikarunga? Mpepo zokupongoka yizo za mu vaterere, ntani Peturusa ga yi divire asi Jesus va mu pindura koufe. Yisinke ya ninkisire mupositoli a pure asi Jesus muzuni? Morwasinke natu tanterera ko wopeke?

3, 4. (a) Mavhumbuko musinke ga horokere komeho vapositoli va ya va hampuruke? (b) Mavhumbuko musinke ga rugene Jesus?

3 Egano eli asi vafe ngava paruka hena kapi lya kere epe  kovapositoli vaJesus, morwa pwa kere mavhumbuko gamwe komeho va ya va hampuruke. Awo va divire asi Karunga kwa nkondopekere muporofete Eliya naElisa va rugane yitetu yokupindura vafe. (1 Vah. 17:17-24; 2 Vah. 4:32-37) Mugara gokufa kwa pindukire koufe apa simpu sendi sa gumine yisupa yaElisa. (2 Vah. 13:20, 21) Vakriste womosiruwo sovapositoli va pulire moyihorokwa oyo yomoMatjangwa, ntani asi Nonkango daKarunga usili.

4 Yosili, natuvenye kututumangeda pokuresa yihorokwa yomavhumbuko eyi ga rugene Jesus. Apa ga pindwire koufe muna gomufisayendi, mufisayendi kwa tetukire. (Ruk. 7:11-15) Posikando simwe, Jesus kwa pindwire koufe mukadona gonomvhura 12. Gazara tupu ruhafo oru va kere naro vakurona vendi apa va mwene munawo ana pinduka koufe! (Ruk. 8:49-56) Ntani gazara tupu omu va hefe ava va mwene Rasarusa kuna kutunda montoko age muzuni!—Joh. 11:38-44.

EVHUMBUKO LYAJESUS LYA LIKARERA

5. Ngapi omu evhumbuko lyaJesus lya li sigire nomavhumbuko gapeke?

5 Vapositoli va divire asi evhumbuko lyaJesus lya li sigire nomavhumbuko gapeke. Vantu owo kwa va vhumbwire nomarutu gopanyama, ano konyima va ya fire hena. Jesus kwa mu vhumbwire norutu ropampepo oru aru dili kufa. (Resa Yirugana 13:34.) Peturusa kwa tjenge asi Jesus “kwa mu dipagere parutu, nye Karunga kwa mu pindwire koufe pampepo.” Ntani hena asi “ga za meguru, a ka hingire korulyo rwaKarunga, yiyo va mu pa a pangere vaengeli novanankondo nomapangero gonompepo.” (1 Pet. 3:18-22) Mavhumbuko gapeke kwa kere gokutetukisa ntani gopasitetu, nye lyaJesus lya pitakana.

6. Ngapi omu evhumbuko lyaJesus lya kundamene varongwa vendi?

6 Evhumbuko lyaJesus kwa kundamene unene varongwa vendi. Age kapi hena ga fire ngomu da yi gazarere nonkore dendi. Jesus kwa kere muzuni ngosisitwa sononkondo esi na dira kuvhura kudipaga nkenye muntu. Evhumbuko lyendi kwa likidire asi age MunwaKarunga, ano eyi kwa hafesere unene varongwa. Awo kapi hena va kere nowoma nye kwa kere nouradi. Evhumbuko lyaJesus kwa kere sininke somulyo kositambo saJehova ntani kwa kere mbudi zongwa ezi ngava divisa uzuni mudima.

7. Yisinke ana kurugana ngesi Jesus, ntani mapuro musinke ayi retesa po?

7 NgoNombangi daJehova, ose twa diva asi Jesus kapi tupu ga kere mugara gomunene. Age muzuni ntani kuna kugendesa sirugana zokuzuvhisa esi vana kurugana pevhu. NgaHompa goUhompa waKarunga, Jesus Kristusa ntaantani nga ka zerese evhu koudona naunye ntani nokukalininka li ka kare paradisa omu ngava ka parukira vantu narunye. (Ruk. 23:43) Ngano Jesus kapi va mu pindwire koufe, ngano kapi ngayi horoka eyi. Nokonda musinke twa kara nado deyi natu pulira asi kwa mu pindwire koufe? Yisinke ali tanta kwetu evhumbuko lyendi?

JEHOVA KULIKIDA NONKONDO DENDI KUHAMENA NOMFA

8, 9. (a) Morwasinke vampitisili womaukarelikarunga goVajuda va pulire Piratusa va ka nomene ntoko zaJesus? (b) Yisinke ya horokere apa vakadi va menekerere kontoko?

8 Konyima zapa va dipagere Jesus, vapristeli wovanene ntani noVafalisayi kwa wizire kwaPiratusa nokutanta asi: “Muhona, ose tuna diworoka eyi ga uyungire mupukisi ogu pouzuni wendi asi, ‘Ngapa pita mazuva gatatu, makura tani vhumbuka.’ Ano gava nye eraka, va ka nomene ntoko  dogoro nemezuva lyautatu, neisi mpamwe ngava mu vaka mo varongwa vendi, ngava ya tantere mbunga asi, ‘Age kuna vhumbuka koufe.’ Makura yimpempa yokuhulilira ngano ngayi donapa nye unene, kupita yomuhowo.” Piratusa ta va limburura asi: “Vanomeni wowo, zendeni mu ka nomene ntoko moomu mwa divira.” Yosili, oyo yiyo va rugene.—Mat. 27:62-66.

9 Simpu saJesus kwa si rangekere mekombombo makura tava tura ko sinongweneso kemanya lyontoko. Omo yimo vampitisili womaukarelikarunga goVajuda va harere Jesus a kare dogoro narunye. Nye Jehova kwa kere negano lyapeke. Apa Mariya Mangadarena naMariya mukwawo va menekere kontoko mezuva lyautatu, awo kwa ka gwene emumanya vana li sindumuna ko, ano muengeli kuna hingire po. Muengeli kwa tanterere vakadi va tare montoko ano azo kwa kere siporongwa. Muengeli tava tantere asi: “Age omu mutupu mo, ana vhumbuka.” (Mat. 28:1-6) Jesus kwa kere muzuni!

10. Umbangi musinke ga geve Paurusa kuhamena evhumbuko lyaJesus?

10 Yihorokwa eyi ya horokere momazuva 40 kwa geve umbangi wene-wene asi Jesus ana pinduka koufe. Mokukwatakanesa maumbangi, mupositoli Paurusa kwa tjangerere Vakolinte asi: “Ame kwa mu ronga pomuhoverera yomulyo eyi na lironga name, yeyi asi Kristusa kwa fira nonzo detu, moomu ga tanta matjangwa, hena asi kwa mu vhumbika, yiyo va mu pindura koufe mezuva lyautatu, moomu ga tanta matjangwa. Makura ta monekere Peturusa, ntani ana kuyamonekera vena murongo navavali. Makura ntani ana kuyamonekera pwarumwe tupu vakwetetu wokupitakana mafere gatano, sinzi sawo simpe poveli, nye vamwe va fa. Ana kuyininka ta ya monekere Jakopo, ntani kovapositoli navenye. Moruhura kwanavenye ntani nye ana kuyamonekera name, ogu na fana ngwendi gogu va hampuruka, ago mazuva ga hana kusika mo.”—1 Kol. 15:3-8.

EYI TWA PULIRA ASI JESUS KWA MU PINDWIRE KOUFE

11. Ngapi evhumbuko lyaJesus lya horokere “moomu ga tanta matjangwa”?

11 Konda zokuhova kuna kara asi evhumbuko lyendi kwa horokere “moomu ga tanta matjangwa.” Nonkango daKarunga kwa pumbire evhumbuko lyendi. Pasihonena, Ndafita kwa tjenge asi “Mupongoki” gwaKarunga kapi ngava mu sigilira mosirongo sovafe. (Resa Episarome 16:10.) Mezuva lyoPentekoste 33, mupositoli Peturusa kwa tambesere uporofete ou kwaJesus, pokutanta asi: “Ndafita kwa mwene yokomeho yaKarunga, yiyo nye ga uyungilire yepinduro koufe lyaKristusa asi: ‘Mwenyo gwendi kapi ngava gu sigilira mosirongo sovafe, ano rutu rwendi kapi ngaru wora.’”—Yirug. 2:23-27, 31.

12. Wolye va mwene Jesus ogu va vhumbwire?

12 Konda zauvali kuna kara asi ose twa kara nomaumbangi gokutunda kovantu wovanzi ava va yi mwene. Ure womazuva gokupitakana 40, Jesus ogu va vhumbwire kwa monekerere varongwa vendi mosipata omu za kere ntoko nomonzira zokuza koEmausi ntani nakumwe ngoso. (Ruk. 24:13-15) Poyiruwo oyo, age nga uyungisa nkenye muntu pwagelike, kukwatera mo Peturusa ntani nombunga zovantu. Sikando simwe, Jesus ogu va vhumbwire kwa monekerere mbunga zovantu wokupitakana 500! Morwa oyo, umbangi wangoso nokuvhura si kuupatana.

13. Ngapi upampi wovarongwa wa likidire asi awo va divire asi Jesus ga pinduka koufe?

13 Konda zautatu kuna kara asi upampi ou va likidire varongwa vendi mokuudisa  evhumbuko lyendi. Morwa kuudisa nomupampi evhumbuko lyaKristusa, awo kwa va hepekere nokuvadipaga. Nsene Jesus kapi ga pinduka koufe, morwasinke Peturusa ngano ga tulire eparu lyendi mosiponga pokuudisa evhumbuko lyaKristusa kovampitisili womaukarelikarunga, ava va nyengere Jesus ntani nokumudipagesa? Morwa Peturusa novarongwa vakwawo kwa divire asi Jesus muzuni ntani yige ga gendesere sirugana sokuzuvhisa. Ntani hena, evhumbuko lyaJesus kwa pere ehuguvaro vasikuli vendi asi nawo ngava ka va pindura koufe. Pasihonena, Sitefanesa kwa fire nehuguvaro eli asi ngava mu pindura koufe.—Yirug. 7:55-60.

14. Morwasinke twa pulira asi Jesus muzuni?

14 Konda zaune kuna kara asi ose twa kara noumbangi asi age ngesi kuna kupangera ngaHompa ntani ngoMutwe gombungakriste. Ngoyitundwamo, ukareli wousili kuna kukura. Jesus ngano kapi va mu vhumbwire, eyi ngano kuna kuhoroka ndi? Nampo ngano kapi twa mu zuvha. Nye twa kara nonokonda dokupama deyi twa pulira asi Jesus muzuni ntani asi age ngesi kuna kutupitisira nokutuvyukisa ngomu tuna kuudisa mbudi zongwa evhu nalinye.

EYI ALI TANTA KWETU EVHUMBUKO LYAJESUS

15. Morwasinke evhumbuko lyaJesus ali tu pere uradi wokuzuvhisa?

15 Evhumbuko lyaJesus kutupa uradi wokuzuvhisa. Monomvhura 2 000, nonkore daKarunga kwa ruganesa nonkedi dokulisiga-siga mokuhagekesa po mbudi zongwa ngwendi marwaneso, marundiro, nyanya, masiliko, mahepeko ntani madipago. Nye, kwato sirwiso esi da ruganesa sa vhura kuhagekesa po sirugana setu sokuzuvhisa Uhompa ntani nokutura po varongwa. (Jes. 54:17) Ose kapi atu tjira vakareli vaSatana. Jesus nose ga kara ntani kutuvatera ngomu ga yi tumbwidira. (Mat. 28:20) Eyi yiyo twa karera nouradi, nampili nonkore detu di hetekere ko, ado kapi ngadi tu hagekesa!

Evhumbuko yaJesus kutupa uradi wokuzuvhisa (Tara paragarafu 15)

16, 17. (a) Ngapi evhumbuko lyaJesus lya pameka eyi nga rongo? (b) Kuliza naJohanesa 11:25, nonkondo musinke Karunga ga pa Jesus?

16 Evhumbuko lyaJesus kupameka nayinye eyi nga rongo. Paurusa kwa tjenge asi nsene Kristusa kapi va mu pindura koufe, eudiso lyetu nepuro lyetu kwato mulyo. Mulirongi gumwe goBibeli kwa tjenge asi: “Nsene Kristusa kapi va mu pindura koufe, . . . Vakriste tava kara vanayimpempa wovanene.” Pwa hana evhumbuko lyaJesus, yihorokwa yomoMavangeli tayi kara ngwendi esimwititi lyoruguwo lyomugara gomuwa gonondunge ogu da dipagere nonkore dendi. Nye Kristusa ga pinduka koufe, ano eyi kwa yi pameka eyi nga rongo, kukwatera mo eyi ga uyungire kuhamena meho.—Resa 1 Vakolinte 15:14, 15, 20.

17 Jesus kwa tente asi: “Nyame evhumbuko nomwenyo. Ogu ana kupura nge ta kara nomwenyo, nampili a kare asi kuna fu.” (Joh. 11:25) Nonkango odo ngadi sika mo. Jehova kwa pa Jesus nonkondo dokupindura vafe, kapisi vaava tupu ngava ka parukira meguru nye hena nanavenye ava va kara nehuguvaro lyomwenyo gwanarunye apa pevhu. Nzambo zaJesus ntani nevhumbuko lyendi kulikida asi nomfa kapi ngadi ka kara ko hena. Pokudiva eyi, ayo ngayi ku vatera o lididimikire mahepeko nampili gokukutwaredesa konomfa.

18. Ehuguvaro musinke ali tu pe evhumbuko lyaJesus?

18 Evhumbuko lyaJesus kutupa ehuguvaro asi vantu ngava ka va pangura kuliza nonompango douhunga daJehova. Pokuuyungisa  mbunga zovantu moAtena, Paurusa kwa tente asi Karunga “ga tokora ezuva eli nga pangwisisa uzuni mouhungami koMugara ogu ga horowora. Age ga horwera navenye usili weyi pokumupindura koufe.” (Yirug. 17:31) Karunga kwa horowora Jesus a kare Mupanguli, ntani twa yi diva asi age nga pangura mouhunga nemeharo.—Resa Jesaya 11:2-4.

19. Ngapi epuro lyetu mevhumbuko lyaKristusa ali tu kundama?

19 Kupura mevhumbuko lyaJesus kututumangeda tu rugane mpango zaKarunga. Ngano kapi ga geve nzambo zendi ntani a vhumbuke, ngano ose ha twa karera moupika wonzo nonomfa. (Rom. 5:12; 6:23) Ngano Jesus kapi ga vhumbuka, ngano kuvhura kutanta asi: “Tu lyeni nye oku tatu nu, yeeyi mungura tatu fu.” (1 Kol. 15:32) Nye ose kapi atu demenene komalihafeso geparu. Ose kuhafera ehuguvaro lyevhumbuko ntani nokupurakena komavyukiso gaJehova mwanayinye.

20. Ngapi evhumbuko lyaJesus ali gava umbangi wononkondo daKarunga?

20 Evhumbuko lyaKristusa kwa gava umbangi wounene asi Jehova yige “a futu ava ava mu papara.” (Heb. 11:6) Ee, nonkondo nounongo musi ga kara nawo Jehova mokuvhumbwira Jesus keparu lyokudira kufa meguru! Ntani monkedi ezi, Karunga kwa likida asi age kusikisa mo matumbwidiro gendi. Eyi kwa kwatera mo uporofete waKarunga wokuhamena ‘ruvharo’ oru ngaru gusa po nompata doupangeli. Mokusikisa mo uporofete owo, Jesus ga hepere kufa nokuvhumbuka.—Gen. 3:15.

21. Yisinke ali tanta ehuguvaro lyevhumbuko koge?

21 Ove kulikida rupandu kwaJehova, ogu ga kupa ehuguvaro lyevhumbuko ndi? Matjangwa kwa gava ehuguvaro eli asi: “Tara, nzugo zaKarunga pozili povantu. Age ta ya tungu pwawo, awo ngava kare muhoko gwendi. Karunga mwene nga kara pwawo, a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.” Ehuguvaro olyo lyokutetukisa kwa ligeve komupositoli Johanesa, ogu ga va tanterere asi: “Tjanga, yeeyi nonkango edi dosili dokuvhura kuhuguvara.” Kwalye Johanesa ga gwene mbudi ozo? Azo kwa tundire kwaJesus Kristusa ogu va vhumbura.Ehor. 1:1; 21:3-5.