Zende koyikaramo

Zende koyikaramo

Nombangi daJehova

Horowora eraka Rukwangali

‘Ngomu kara vahompa novapristeli’

‘Ngomu kara vahompa novapristeli’

‘One ngomu kara vahompa novapristeli nombunga zokupongoka.’ —EX. 19:6.

1, 2. Kosinke ruvharo romukadi va hepere kurupopera, ntani morwasinke?

UPOROFETE wokuhova va tjanga moBibeli kwa kara nomulyo mokukwata egano omu ngasi ka sika mo sitambo saJehova. Apa ga tulisire po etumbwidiro lyomoEdeni, Karunga gosili kwa divisire asi: ‘Ngani paka unkore pokatji koge [Satana] nomukadi ntani pokatji koruvharo roge noru rwendi.’ Ngapi omu va u faturura unkore owo? Jehova kwa tente asi: “Aro ngaru myona mutwe goge [Satana], ove ngoru huma kosinsinsina saro.” (Gen. 3:15) Unkore pokatji kezoka nomukadi ngau kara wounene, ou ngau ninkisa Satana a ruganese nonkondo dendi nadinye mokuhara kuzonagura po ruvharo romukadi.

2 Eyi yiyo muepisarome ga kanderere kuhamena vantu vaKarunga asi: “Tara! Nonkore doge kuna kundundana, ava va ku nyenga vana katuka; Awo kuna kugazarera vantu woge yigazo yoyidona; kuna kulizuvha ava o popere. Awo kuna kutanta asi: ‘Tokweni tu ka hanagure muhoko gwawo.’” (Epis. 83:2-4) Ruvharo romukadi va hepere kurupopera va dire kuruzonagura po ndi kurunyateka. Yipo Jehova ga tulisire po malizuvhasano gopaveta mokusikisa mo sitambo sendi.

 EGWANEKERO ELI LYA POPERERE RUVHARO

3, 4. (a) Siruwoke egwanekero lyoVeta lya tamekere kusika mo, ntani yisinke gwa rugene ko muhoko goVaisraeli? (b) Yisinke lya silikire egwanekero lyoVeta?

3 Apa ruvharo rwaAbirahamu naIsaka ntani naJakopo rwa vhukire unene, Jehova yipo ga ru tulire ru kare muhoko goVaisraeli. Kupitira mwaMosesa, Jehova kwa tulire po egwanekero lyokulikarera kumwe nomuhoko pokugupa Veta, ntani ago kwa tambwire egwanekero olyo. Bibeli kwa tanta asi: “Age [Mosesa] makura ta gusa buke zomalikwatakano, makura ta zi resere mbunga. Ano awo makura tava tanta asi: ‘Nayinye eyi ga uyunga HOMPA, ngatu yi rugana oku tatu yi limburukwa.’ Ano Mosesa makura ta gusa honde a zi sampere mbunga oku ta tanta asi: ‘Ezi honde zomalikwatakano aga ga panga HOMPA neni, ago kwa ga dikisa kononkango edi nadinye.’”—Ex. 24:3-8.

4 Egwanekero lyoVeta kwa tamekere kusika mo momvhura 1513 komeho zokuwiza Kristusa. Kupitira megwanekero, muhoko goVaisraeli kwa kere muhoko ogu ga horowere Karunga. Jehova kwa ya kere ‘Mupangeli noMugameni ntani naHompa gwawo.’ (Jes. 33:22) Ehistoli lyoVaisraeli kwa likidire yitundwamo yokulimburukwa nokudira kulimburukwa nompango daKarunga. Veta ezi za silikire kulikwara novapagani ntani nokulihameka moukareli woyimpempa, kwa zi tulilire po mokuvatera ruvharo rwaAbirahamu ru dire kulinyateka.—Ex. 20:4-6; 34:12-16.

5. (a) Mpito musinke egwanekero lyoVeta lya geve koVaisraeli? (b) Morwasinke Karunga ga nyokere Vaisraeli?

5 Egwanekero lyoVeta kwa geve ewapaiko lyoupristeli, mundundumba gweyi yokomeho. (Heb. 7:11; 10:1) Kupitira megwanekero eli, Vaisraeli va gwene mpito zokulikarera zokukara vahompa ‘novapristeli,’ pokusikisa mo noveta daJehova. (Resa Exodus 19:5, 6.) Nye Vaisraeli kapi va sikisire mo noveta odo. Mevango lyokutambura Mesiyasa, ruha rokuhova roruvharo rwaAbirahamu, awo kwa mu nyokere. Morwa eyi, Karunga nage ga va nyokere.

Kudira kulimburukwa koVaisraeli kapi ya tente asi egwanekero lyoVeta kapi lya sikisire mo sitambo salyo (Tara paragarafu 3-6)

6. Yisinke za sikisa mo Veta?

6 Morwa Vaisraeli kapi va limburukwire kwaJehova, kapi ya tente asi egwanekero lyoVeta lyokutulisa po vahompa novapristeli kapi lya sikisire mo sitambo salyo. Veta kwa poperere ruvharo nokuvatera vantu va dimburure Mesiyasa. Apa Kristusa ga wizire ntani nokumudimburura, sitambo soveta kwa sikire mo. Bibeli kutanta asi: “Kristusa yige ga hagesesa po Veta.” (Rom. 10:4) Makura wolye ngava gwana mpito zokukara vahompa novapristeli? Jehova Karunga kwa tulisire po elizuvhasano  lyopaveta eli lya tulisire po muhoko gomupe.

KWA TULISIRE PO MUHOKO GOMUPE

7. Yisinke ga porofetere Jehova kupitira mwaJeremiya kuhamena egwanekero lyepe?

7 Komeho egwanekero lyoVeta li ka hage po, Jehova kwa porofetere kupitira mwaJeremiya asi age nga paka po “egwanekero lyepe” nomuhoko gwaIsraeli. (Resa Jeremiya 31:31-33.) Egwanekero eli kapi lya fene ngwendi egwanekero lyoVeta morwa kapi lya hepere nonzambo doyikorama mokugusa po nonzo. Ngapi omu lya vhulire kuyisikisa mo eyi?

8, 9. (a) Yisinke za sikisa mo honde zaJesus? (b) Mpito musinke va gwana ava va hamena megwanekero lyepe? (Tara efano pepenuno 13.)

8 Sikando sokukwama ko va tumbura egwanekero lyepe moBibeli kuna kara apa Jesus ga tusilire po Murarero gwaHompa moNisani 14, momvhura 33. Pokuuyunga kuhamena nkinda zovhinyu, age kwa tanterere vapositoli vendi 11 wovalimburukwi asi: “Nkinda ezi egwanekero lyepe lyomohonde zange, ezi ngava mu tjisangera.” (Ruk. 22:20) Mateusa kwa temwininine eyi ga uyungire Jesus kuhamena vhinyu asi: “Ezi yizo honde zange zegwanekero lyepe, ezi ngazi tjikangerera wovanzi edongonono lyononzo.”—Mat. 26:27, 28.

9 Honde zaJesus kunkondopeka egwanekero lyepe. Ano honde ezi kwa gusa po nonzo pwarumwe tupu. Jesus kapisi ruha rwegwanekero olyo lyepe. Morwa age kwa sikilira mo, kapi ga hepere egusiropo. Nye Karunga kwa ruganesa honde zaJesus mokugusira po ruvharo rwaAdamu. Karunga ga vhulire kutambura vantu wokuligava va kare ‘ngovana’ vendi pokuvagwaveka nompepo zokupongoka. (Resa Varoma 8:14-17.) Morwa Karunga kuvatara asi va kuhuka, awo ngava fana ngwendi Jesus, va kare vana vaKarunga wokudira nonzo. Vagwavekwa ava ngava kara “vapingi kumwe naKristusa” ntani va gwana mpito zokukara ‘vahompa novapristeli.’ Kuhamena “vapingi kumwe naKristusa,” mupositoli Peturusa kwa tente asi: “One ko ezimo eli va horowora, mbunga zovapristeli zopasiuhompa, muhoko gokupongoka, vantu vaKarunga ava ga horowora asi mu udise yitetu yendi. Age yige ga mu zigida mu tunde momundema mu wize mouzera wendi wokutetura.” (1 Pet. 2:9) Ee, omu tupu egwanekero lyepe lya kara nomulyo! Alyo kupulisira varongwa vaJesus mokukara ruha rwauvali roruvharo rwaAbirahamu.

EGWANEKERO LYEPE TALI TAMEKE KUSIKA MO

10. Siruwoke egwanekero lyepe lya tamekere kusika mo, ntani morwasinke?

10 Siruwoke egwanekero lyepe lya tamekere kusika mo? Kapi lya tamekere kusika mo mesiku lina Jesus ga tulisire po murarero. Mokusika mo, Jesus ga hepere kutjisanga honde zendi ntani Jehova ga hepere kutambura mulyo gonzambo zendi. Ntani hena, mpepo zokupongoka va hepere kuzipowomwena ava va ya kara “vapingi kumwe naKristusa.” Egwanekero lyepe kwa tamekere kusika mo poPentekoste momvhura 33 apa varongwa vaJesus va va gwavekere nompepo zokupongoka.

11. Ngapi egwanekero lyepe lya gava mpito koVajuda nokovapagani va kare ruha roVaisraeli wopampepo, ntani vangapi va hamena mo megwanekero eli?

11 Apa Jehova ga divisire egwanekero lyepe kupitira mwaJeremiya, egwanekero lyoveta kapi lya hege dogoro paapa egwanekero lyepe lya tamekere kusika mo. (Heb. 8:13) Apa ya horokere eyi, Karunga kwa tere Vajuda novapagani wovapuli ava  va dira kurugana yovamba monkedi zokulifana, morwa ‘erugano lyawo lyovamba, sininke somomutjima sopampepo, kapisi sopaveta zokutjanga.’ (Rom. 2:29) Pokutulisa po egwanekero lyepe kumwe nawo, Karunga kwa tulire noveta edi ‘momagazaro gawo nokuditjanga konomutjima dawo.’ (Heb. 8:10) Sivaro sava va hamena megwanekero lyepe kuna kara 144 000, ‘muhoko gwaKarunga’ gomupe goVaisraeli wopampepo.—Gar. 6:16; Ehor. 14:1, 4.

12. Malifano musinke ga kara pokatji kegwanekero lyoVeta negwanekero lyepe?

12 Ngapi egwanekero lyoVeta ntani egwanekero lyepe ga lifana? Egwanekero lyoVeta kwa hamenene mo Jehova ntani Vaisraeli, ano egwanekero lyepe kwa hamena hena Jehova ntani Vaisraeli wopampepo. Moomu Mosesa ga kere mugwanekedesi megwanekero lyoVeta, Jesus kuna kara Mugwanekedesi megwanekero lyepe. Egwanekero lyoVeta kwa li nkondopekere kupitira mohonde zoyimuna, ano egwanekero lyepe kwa li nkondopeka kupitira mohonde zaJesus. Megwanekero lyoVeta, Mosesa kwa kere mupitisili gomuhoko goVaisraeli, ano Jesus, mutwe gombungakriste, kuna kara Mupitisili gwava va hamena megwanekero lyepe.—Efe. 1:22.

13, 14. (a) Ngapi egwanekero lyepe lya likwatakana noUhompa? (b) Yisinke ya hepa po koVaisraeli wopampepo mokukapangera kumwe naKristusa meguru?

13 Egwanekero lyepe kwa likwatakana noUhompa mokugava mpito komuhoko gokupongoka gu kare vahompa novapristeli moUhompa wemeguru. Muhoko ogo kwa tulisa po ruha rwauvali roruvharo rwaAbirahamu. (Gar. 3:29) Egwanekero lyepe kwa nkondopeka egwanekero naAbirahamu.

14 Egwanekero lyepe kwa tulisa po Vaisraeli wopampepo ntani kwa va pa mpito mokukakara “vapingi kumwe naKristusa.” Nye ngapi nava vhura Vaisraeli wopampepo kulipakerera kumwe naJesus moUhompa wendi wemeguru mokukakara vahompa novapristeli? Kupitira megwanekero limwe.

EGWANEKERO ELI ALI PULISIRE WOPEKE MOKUKAPANGERA NAKRISTUSA

15. Egwanekero musinke ga tulisire po Jesus novasikuli vendi wovalimburukwi?

15 Konyima zokutulisa po Murarero gwaHompa, Jesus kwa tulisire po egwanekero novarongwa vendi wovalimburukwi, eli ava tumbura asi egwanekero lyoUhompa. (Resa Rukasa 22:28-30.) Egwanekero eli kwa hamena mo Jesus ntani vasikuli vendi wovagwavekwa, eli lya lisiga nomagwanekero makwawo omu mwa hamena Jehova. Apa ga uyungire asi “moomu va u tumbwidira nge otate,” Jesus kwa tembe kegwanekero eli ga tulisire po Jehova kumwe nendi a kare “mupristeli gwanarunye, pomukaro gwaMerekisedeki.”—Heb. 5:5, 6.

16. Mpito musinke egwanekero lyoUhompa ali gava koVakriste wovagwavekwa?

16 Vapositoli 11 wovalimburukwi ‘kwa kere kumwe naJesus momaheteko gendi.’ Egwanekero lyoUhompa kwa va huguvaresa asi ngava ka hingira poyipundi meguru nokukapangera ngovahompa novapristeli. Nampili ngoso, vapositoli 11 kapisi yiwo velike va gwana situmbukira oso. Jesus kwa monekerere mupositoli Johanesa nokumutantera asi: “Ogu ana kufunda, ngani mu pa evega lyokuhingira kumwe name posipundi sange souhompa, moomu na funda name, yiyo na hingira kumwe noTate posipundi sawo souhompa.” (Ehor. 3:21) Yipo nye, egwanekero lyoUhompa kwa litulisa po noVakriste wovagwavekwa  144 000. (Ehor. 5:9, 10; 7:4) Egwanekero eli kwa gava mpito koVakriste owo va ka pangere naJesus meguru. Eyi kuna lifana nomufuko ogu a ya kwarere mepata lyosiuhompa ntani nokugwana nonkondo dokupangera kumwe nahompa. Mokulifana, Matjangwa kutumbura Vakriste wovagwavekwa asi “mufuko” gwaKristusa, ‘mukadona gomukuhuki’ va tumbwidira mokukalikwara naKristusa.—Ehor. 19:7, 8; 21:9; 2 Kol. 11:2.

KARA NEPURO LYOKUPAMA MOUHOMPA WAKARUNGA

17, 18. (a) Tumbura magwanekero tuna zogere aga ga likwatakana noUhompa. (b) Morwasinke natu karera nepuro lyokupama moUhompa?

17 Magwanekero nagenye tuna zogere moyirongwa eyi yivali, kwa likwatakana noUhompa. (Tara kakende “Omu Karunga nga ka sikisa mo sitambo sendi” mosirongwa sa ka pita.) Usili ou kwa nkondopeka asi ewapaiko lyoUhompa kwa litatekera komalizuvhasano gopaveta. Tuna kara nokonda zonene zokutura ehuguvaro lyetu moUhompa woUmesiyasa ngewapaiko eli ana kuruganesa Karunga mokukasikisa mo sitambo sendi kevhu nokovantu.—Ehor. 11:15.

Kupitira moUhompa woUmesiyasa, Jehova nga sikisa mo sitambo sendi kevhu (Tara paragarafu 15-18)

18 Yosili, eyi ngau ka sikisa mo Uhompa ngayi ka retera vantu matungiko gokukarerera. Nehuguvaro lyenene, ose kudivisa asi Uhompa waKarunga yiwo welike ngau ka gusa po maudigu nagenye govantu. Tu litureni mo mokuudisa noupampi usili ou kwava wopeke!—Mat. 24:14.